ಉಡುಪಿ: ನಮ್ಮ ಚತುರ್ಥ ಪರ್ಯಾಯ 'ವಿಶ್ವ ಗೀತಾ' ಪರ್ಯಾಯದ ಸಮಾರೋಪಾದಿಯ ಸಮಾರಂಭವಿದು. ಎರಡು ವರ್ಷದ ಪರ್ಯಾಯದ ಅವಧಿಯ ಎಲ್ಲ ಕಾರ್ಯಕ್ರಮಗಳ ಸಮಾರೋಪವು ಇದೀಗ ಗಿರಿಯ ತುದಿಯಲ್ಲಿ ನಡೆಯುತ್ತಿದೆ. ಆನಂದ ತೀರ್ಥರ ಮೂಲಕ ನಮ್ಮ ಪರ್ಯಾಯ ಸಮರ್ಪಿಸುವುದು ಸಂಪ್ರದಾಯ. ಆದರೆ, ಹಿಂದು ಸಮಾಜದ ದೊಡ್ಡ ಆಸ್ತಿಯಾಗಿರುವ ಆದಿಚುಂಚನಗಿರಿಯ ನಿರ್ಮಲಾನಂದನಾಥ ಶ್ರೀಗಳಿಂದ ಉಡುಪಿ ಶ್ರೀಕೃಷ್ಣನಿಗೆ ಇಂದು ಅರ್ಪಿತವಾಗಿದೆ ಎಂದು ಸುಗುಣೇಂದ್ರ ತೀರ್ಥ ಶ್ರೀಪಾದರು ತಿಳಿಸಿದರು.

ಉಡುಪಿಯ ರಾಜಾಂಗಣದಲ್ಲಿ ಮಂಗಳವಾರ (ಜ.6) ಆಯೋಜಿಸಿದ್ದ ಪುತ್ತಿಗೆ ಪರ್ಯಾಯದ ಅವಧಿಯ ಕಾರ್ಯಕ್ರಮ ಸರಣಿಗಳ ಸಮಾರೋಪ ಸಮಾರಂಭದಲ್ಲಿ ಮಾತನಾಡಿದರು.

ಪರ್ಯಾಯದ 730 ದಿನಗಳಲ್ಲಿ ಶ್ರೀಕೃಷ್ಣನ ಆರಾಧನೆಯನ್ನು ಭಗವದ್ಗೀತೆಯ ಮೂಲಕ ಆಚರಿಸಲು 'ವಿಶ್ವ ಗೀತಾ' ಪರ್ಯಾಯ ಎಂದು ನಾಮಕರಣ ಮಾಡಲಾಗಿತ್ತು. ಕೋಟಿ ಜನರಿಂದ ಗೀತೆ ಬರೆಸಿ ಅದನ್ನು ಶ್ರೀಕೃಷ್ಣನಿಗೆ ಸಮರ್ಪಿಸುವ ಕೋಟಿ ಗೀತಾ ಲೇಖನ ಯಜ್ಞ, ಗೀತಾಮಂದಿರದಲ್ಲಿ ಅಖಂಡ ಗೀತಾ ಪಾರಾಯಣ, ವಿಶ್ವಗೀತಾ ಸಮ್ಮೇಳನ, ಭಗವದ್ಗೀತೆಯ ಯಾಗಗಳು, ಲಕ್ಷ ಜನರಿಂದ ಗೀತಾ ಪಾರಾಯಣ, ಸಾವಿರಾರು ವಿದ್ವಾಂಸರಿಂದ ಗೀತೆಯ ಸಂವಾದ ಹಾಗೂ ಪ್ರವಚನ, ನೂರಾರು ಮಠಾಧಿಪತಿಗಳಿಂದ ಸಂತ ಸಂದೇಶ, ಸಾವಿರಾರು ಕಲಾವಿದರಿಂದ ಭರತನಾಟ್ಯ, ಸಂಗೀತ, ಪಾಠ-ಪ್ರವಚನ ಎಲ್ಲವೂ ಸಹ ಗೀತಾಮಯವಾಗಿಯೇ ನಡೆದು ನಮ್ಮ ಸಂಕಲ್ಪ ಎಲ್ಲವೂ ಈಡೇರಿದೆ ಎಂದರು.

ಉಡುಪಿ ಕ್ಷೇತ್ರದ ಸುಂದರೀಕರಣ, ವೈಭವೀಕರಣದಲ್ಲಿಯೂ ಸಹ ಭಗವದ್ಗೀತೆಯ ಮೂಲಕವೇ ಕೃಷ್ಣನನ್ನು ಆರಾಧಿಸುವ ಕನಸೂ ನೆರವೇರಿದೆ. ಶ್ರೀಕೃಷ್ಣನಿಗೆ ಸ್ವರ್ಣಮಯ ದಶಾವತಾರ ಕವಚ, ಪಾರ್ಥ ಸಾರಥಿ ರಥ, ಸ್ವರ್ಣ ತೀರ್ಥ ಮಂಟಪ, ಕನಕನ ಕಿಂಡಿಗೆ ಸ್ವರ್ಣ ಕವಚ, ಸರ್ವಜ್ಞ ಪೀಠಕ್ಕೆ ಸ್ವರ್ಣ ಕವಚ, ಶ್ರೀಕೃಷ್ಣನಿಗೆ ಮುತ್ತಿನ ಕವಚ ತೊಡಿಸಲಾಗಿದೆ. ಇವೆಲ್ಲವೂ ಸಹ ಸದ್ಭಕ್ತರ ಸಹಕಾರದಿಂದ ಅತ್ಯಂತ ಯಶಸ್ವಿಯಾಗಿ ನೆರವೇರಿದೆ ಎಂದು ತಿಳಿಸಿದರು.

ಪುತ್ತಿಗೆ ಪರ್ಯಾಯ ಕಾರ್ಯಕ್ರಮಗಳ ಸಮಾರೋಪ ಸಮಾರಂಭವನ್ನು ಆದಿಚುಂಚನಗಿರಿಯ ನಿರ್ಮಲಾನಂದನಾಥ ಶ್ರೀಗಳು ಉದ್ಘಾಟಿಸಿದರು. ಪುತ್ತಿಗೆ ಶ್ರೀಗಳ ಪರ್ಯಾಯದ ಕೊನೆಯ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿರುವುದು ನಿಜಿಕ್ಕೂ ಸಂತಸ ತಂದಿದೆ. ಸನಾತನ ಧರ್ಮ ರಕ್ಷಣೆಯಲ್ಲಿ, ವಿಶ್ವವ್ಯಾಪಿಯಾಗಿ ಗೀತೆಯ ಪ್ರಚಾರದಲ್ಲಿ ತೊಡಗಿರುವ ಅವರ ಕಾರ್ಯ, ಕೊಡುಗೆ ಅನನ್ಯ ಎಂದರು.

ಪುತ್ತಿಗೆ ಕಿರಿಯ ಯತಿ ಸುಶ್ರೀಂದ್ರ ತೀರ್ಥ ಶ್ರೀಪಾದರು ಸಾನ್ನಿಧ್ಯ ವಹಿಸಿದ್ದರು. ಮಠದ ದಿವಾನ ನಾಗರಾಜ್​ ಆಚಾರ್ಯ, ಪ್ರಸನ್ನ ಆಚಾರ್ಯ, ಮಹಿತೋಷ ಆಚಾರ್ಯ, ಜಯಕರ್​ ಶೆಟ್ಟಿ ಇಂದ್ರಾಳಿ, ಹರಿಶ್ಚಂದ್ರ, ಡಾ. ವ್ಯಾಸರಾಜ ತಂತ್ರಿ ಇತರರಿದ್ದರು.