ಉಡುಪಿ: ಜಿಲ್ಲೆಯಲ್ಲಿ ಖಾಸಗಿ ನೆಟ್​ವರ್ಕ್​ ಸಂಸ್ಥೆಗಳ 500ಕ್ಕೂ ಅಧಿಕ ಟವರ್​ಗಳಿದ್ದು ಅವರಂತೆಯೇ ಸೇವೆ ನೀಡಬೇಕಾದರೆ ಬಿಎಸ್​ಎನ್​ಎಲ್​ ಟವರ್​ಗಳ ಈಗಿರುವ 235 ಸಂಖ್ಯೆಯನ್ನು 500ರ ವರೆಗೆ ಹೆಚ್ಚಿಸಬೇಕಾಗಿದೆ. ಇನ್ನೂ 200ಕ್ಕೂ ಅಧಿಕ ಬಿಎಸ್​ಎನ್​ಎಲ್​ ಟವರ್​ಗಳ ಅಗತ್ಯತೆ ಇದ್ದು, ಅಧಿಕಾರಿಗಳು ಪಟ್ಟಿ ಮಾಡಿಕೊಟ್ಟರೆ ಕೇಂದ್ರಕ್ಕೆ ಪ್ರಸ್ತಾವನೆ ಸಲ್ಲಿಸುವುದಾಗಿ ಸಂಸದ ಕೋಟ ಶ್ರೀನಿವಾಸ ಪೂಜಾರಿ ತಿಳಿಸಿದರು.

ಉಡುಪಿ ನಗರದಲ್ಲಿರುವ ಬಿಎಸ್​ಎನ್​ಎಲ್​ ಮುಖ್ಯ ಕಚೇರಿಯಲ್ಲಿ ಇಲಾಖಾ ಅಧಿಕಾರಿಗಳೊಂದಿಗೆ ಗುರುವಾರ (ಏ.9) ಆಯೋಜಿಸಿದ್ದ ಸಭೆಯಲ್ಲಿ ಬಿಎಸ್​ಎನ್​ಎಲ್​ ಟವರ್​ ಕಾರ್ಯದಕ್ಷತೆ ಹೆಚ್ಚಿಸಲು ಹಾಗೂ ಗ್ರಾಹಕರ ಹಿತರಕ್ಷಣೆಗೆ ಸಂಬಂಧಿಸಿ ಸಮಾಲೋಚನೆ ನಡೆಸಿದರು.

ಜಿಲ್ಲೆಯಲ್ಲಿ ಪ್ರಸ್ತುತ ಬಿಎಸ್​ಎನ್​ಎಲ್​ 196 ಟವರ್​ಗಳಿದ್ದು ಇತ್ತೀಚೆಗೆ 39 ಹೊಸ 4ಜಿ ಟವರ್​ ಮಂಜೂರಾಗಿದ್ದು, 30 ಟವರ್​ಗಳಿಗೆ ಸಂಪರ್ಕ ಕಲ್ಪಿಸಲಾಗಿದೆ. 196ರಲ್ಲಿ 115 ಟವರ್​ಗಳನ್ನು 3ಜಿಯಿಂದ 4ಜಿಗೆ ಪರಿವರ್ತನೆ ಮಾಡಲಾಗಿದ್ದು ಈಗ ಸುಮಾರು 235 ಟವರ್​ ಸೇವೆಯಲ್ಲಿದೆ. ಈ ಹಿಂದೆ ಟವರ್​ಗಳಲ್ಲಿ ಬ್ಯಾಟರಿ ಸಮಸ್ಯೆಗಳಿದ್ದು ಇದೀಗ ಬಹುತೇಕ ಬಗೆಹರಿದಿದೆ. ಜನರೇಟರ್​ ಸಮಸ್ಯೆ ಪರಿಹಾರ ಕಾರ್ಯವೂ ನಡೆದಿದೆ. ಹೊಸ 4ಜಿ ಟವರ್​ಗಳಿಗೆ ಸೋಲಾರ್​ ವ್ಯವಸ್ಥೆ ಇರುವುದರಿಂದ ಸಮಸ್ಯೆ ಇಲ್ಲ ಎಂದರು.

ಸಾಲಿಗ್ರಾಮ ಮತ್ತು ಸಾಸ್ತಾನ ನೆಟ್​ವರ್ಕ್​ ಸಮಸ್ಯೆ, ಜಾತ್ರೆಗಳಲ್ಲಿ ಬಿಎಸ್​ಎನ್​ಎಲ್​ ಬಗ್ಗೆ ಪ್ರಚಾರ ಪಡಿಸುವ ಕುರಿತ ಅಧಿಕಾರಿಗಳ ನಿರಾಸಕ್ತಿ, ಮಣಿಪಾಲದಂತಹ ಪ್ರಮುಖ ಪಟ್ಟಣದಲ್ಲಿಯೇ ನೆಟ್​ವರ್ಕ್​ ಸಮಸ್ಯೆಗಳಿರುವ ಬಗ್ಗೆ ಸಲಹಾ ಸಮಿತಿಯ ಸದಸ್ಯರು ಗಮನ ಸೆಳೆದರು. ಮಾಹೆ ಮುಖ್ಯಸ್ಥರಿಗೆ ಕೂಡಲೇ ಪತ್ರ ಬರೆದು ಮಣಿಪಾಲ ಆಸ್ಪತ್ರೆ ಹಾಗೂ ಎಂಐಟಿ ಸೇರಿದಂತೆ ಮೂರ್ನಾಲ್ಕು ಕಡೆಗಳಲ್ಲಿ ಟವರ್​ ಅಳವಡಿಸುವಂತೆ ಸಂಸದ ಕೋಟ ಅಧಿಕಾರಿಗಳಿಗೆ ಸೂಚಿಸಿದರು.

ಸಭೆಯಲ್ಲಿ ಬಿಎಸ್​ಎನ್​ಎಲ್​ನ ಜನರಲ್​ ಮೆನೇಜರ್​ ಹೇಮಂತ್​ ಬೊರ್ಲೆ, ಡೆಪ್ಯುಟಿ ಜನರಲ್​ ಮೆನೇಜರ್​ಗಳಾದ ಗೀತಾ ಕುಮಾರಿ, ಕೃಷ್ಣ ಮೊಗೇರ, ಮಮತಾ ಎನ್​. ಇತರರು ಉಪಸ್ಥಿತರಿದ್ದರು.

"