ಉಡುಪಿ: ಕರಾವಳಿ ಹಾಗೂ ಧಾರ್ಮಿಕ ನಗರಿ ಉಡುಪಿಯಲ್ಲಿ ಶುಕ್ರವಾರ ಬೆಳಗ್ಗೆ ಪ್ರಧಾನಿ ನರೇಂದ್ರ ಮೋದಿ ಅಲೆ ಎದ್ದಿತ್ತು. ಉಡುಪಿ ಶ್ರೀಕೃಷ್ಣ ಮಠದಲ್ಲಿ ಪರ್ಯಾಯ ಪುತ್ತಿಗೆ ಮಠದಿಂದ ಗೀತಾ ಜಯಂತಿ ನಿಮಿತ್ತ ಒಂದು ತಿಂಗಳ ಕಾಲ ಬೃಹತ್​ ಗೀತೋತ್ಸವ ನಡೆಯುತ್ತಿದ್ದು, ತನ್ನಿಮಿತ್ತ ಶ್ರೀಕೃಷ್ಣ ಮಠದ ಪಾರ್ಕಿಂಗ್​ ಪ್ರದೇಶದಲ್ಲಿ ಆಯೋಜಿಸಿದ್ದ ಲಕ್ಷ ಕಂಠ ಗೀತಾ ಪಾರಾಯಣದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಪಾಲ್ಗೊಂಡರು. 

ಮಂಗಳೂರು ವಿಮಾನ ನಿಲ್ದಾಣದಿಂದ ಹೆಲಿಕಾಪ್ಟರ್​ ಮೂಲಕ ಆಗಮಿಸಿದ ಮೋದಿ ಬೆಳಗ್ಗೆ 11 ಗಂಟೆಗೆ ಸರಿಯಾಗಿ ಆದಿಉಡುಪಿಯ ಹೆಲಿಪ್ಯಾಡ್​ಗೆ ಆಗಮಿಸಿದರು. ರಾಜ್ಯದ ಪರವಾಗಿ ರಾಜ್ಯಪಾಲ ಥಾವರಚಂದ್​ ಗೆಹ್ಲೋತ್​ ಹಾಗೂ ಉಡುಪಿ ಜಿಲ್ಲಾಡಳಿತದ ಪರವಾಗಿ ಜಿಲ್ಲಾಧಿಕಾರಿ ಸ್ವರೂಪಾ ಟಿ.ಕೆ. ಸ್ವಾಗತಿಸಿ ಬರಮಾಡಿಕೊಂಡರು. ಕೇಂದ್ರ ಸಚಿವ ಪ್ರಹ್ಲಾದ್​ ಜೋಶಿ, ಜಿಲ್ಲಾ ಪೊಲೀಸ್​ ವರಿಷ್ಠ ಹರಿರಾಮ ಶಂಕರ್​, ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಉಪಸ್ಥಿತರಿದ್ದರು.

ಹೆಲಿಪ್ಯಾಡ್​ನಿಂದ ಎಸ್​ಪಿಜಿ ಭದ್ರತೆಯಲ್ಲಿ ಕಾರಿನ ಮೂಲಕ ಕರಾವಳಿ ಜಂಕ್ಷನ್​ ಮಾರ್ಗವಾಗಿ ಬೆಳಗ್ಗೆ 11:10ಕ್ಕೆ ಉಡುಪಿ ಶ್ರೀಕೃಷ್ಣ ಮಠದತ್ತ ಸಂಚಾರ ಆರಂಭಿಸಿದರು. ಬನ್ನಂಜೆಯ ಡಾ. ವಿ.ಎಸ್​. ಆಚಾರ್ಯ ಬಸ್​ ನಿಲ್ದಾಣ ಮುಂಭಾಗದಲ್ಲಿ ಶ್ರೀ ನಾರಾಯಣಗುರು ಸರ್ಕಲ್​ನಿಂದ ರೋಡ್​ ಶೋ ಆರಂಭಿಸಿದರು. ಕಾರಿನ ಫುಟ್‌ಪಾತ್​ ಮೇಲೆ ನಿಂತು ಜನರತ್ತ ಕೈಬೀಸುತ್ತ ಆಗಮಿಸಿದರು.

ಮೋದಿ ರೋಡ್​ ಶೋ ಮೆರಗು ಹೆಚ್ಚಿಸಲು ಜಿಲ್ಲಾ ಬಿಜೆಪಿ ವತಿಯಿಂದ ಕರಾವಳಿಯ ಕಲೆ, ಸಂಸ್ಕೃತಿ ಬಿಂಬಿಸುವ ಕಲಾ ತಂಡಗಳಿಂದ ಸಾಂಸ್ಕೃತಿಕ ಕಾರ್ಯಕ್ರಮ ಸಜ್ಜುಗೊಳಿಸಲಾಗಿತ್ತು. ನಾರಾಯಣಗುರು ಸರ್ಕಲ್​ ಬಳಿ ರಾಧಾ-ಕೃಷ್ಣ ವೇಷಧಾರಿ (ದರ್ಪಣ ರಾಜ್​ ಟವರ್​ ಉಡುಪಿ) ಹಾಗೂ ಪಾಂಚಜನ್ಯ (ವಿಘ್ನೇಶ್​ ಮತ್ತು ಬಳಗ ಕರ್ವಾಲು), ಜಯಲಕ್ಷ್ಮೀ ಸಿಲ್ಕ್ಸ್ ಬಳಿ ಕರಾವಳಿಯ ಪ್ರಮುಖ ಕಲೆಯಾದ ಯಕ್ಷಗಾನ (ಯಕ್ಷಗಾನ ಕಲಾರಂಗದ ಕಲಾವಿದರು), ಸಿಟಿ ಬಸ್​ ನಿಲ್ದಾಣದ ಸಮೀಪ ಹರ್ಷ ಮಳಿಗೆ ಮುಂಭಾಗದಲ್ಲಿ ಹುಲಿವೇಷ (ಪಡು ಬೈಲೂರು ಇಷ್ಟ ಮಹಾಲಿಂಗೇಶ್ವರ ದೇವಸ್ಥಾನ), ಕಲ್ಸಂಕ ಸರ್ಕಲ್​ಗಿಂತ ಮೊದಲು ಕೊಂಬು ವಾದ್ಯ (ರಾಜು ಮತ್ತು ತಂಡ ಕಡಿಯಾಳಿ)  ಹಾಗೂ ಕಲ್ಸಂಕ ಸರ್ಕಲ್​ ಬಳಿ ಚಂಡೆ ವಾದ್ಯ (ವಿ.ಸ್ವಾಮಿ ಚಿಂಗಾರಿ ಮೇಳ ಕೊಡವೂರು)ದ ಮೂಲಕ ಪ್ರಧಾನಿಯನ್ನು ಅದ್ದೂರಿಯಾಗಿ ಸ್ವಾಗತಿಸಲಾಯಿತು.

ರಸ್ತೆಯ ಇಕ್ಕೆಲಗಳಲ್ಲಿ ನಿಂತಿದ್ದ ಜನರ ಸಾಲುಗಳ ಮಧ್ಯೆ ಅಲ್ಲಲ್ಲಿ ಕೆಲ ಯುವ ಕಲಾವಿದರು ಹಾಗೂ ಹಿರಿಯ ಕಲಾವಿದರು ಮೋದಿ ಅವರ ವಿವಿಧ ಬಗೆಯ ಚಿತ್ರತ ಫೋಟೋವನ್ನು ಪ್ರದರ್ಶಿಸಿದರು. ಮೋದಿಯನ್ನು ತಬ್ಬಿಕೊಂಡಿರುವ ಶ್ರೀರಾಮಂಚಂದ್ರ, ತಾಯಿ ಹೀರಾ ಬೆನ್​ ಅವರೊಂದಿಗೆ ಕುಳಿತಿರುವ ನರೇಂದ್ರ ಮೋದಿ ಹೀಗೆ ವಿವಿಧ ಚಿತ್ರಗಳನ್ನು ಪ್ರದರ್ಶಿಸಲಾಯಿತು. ಇದನ್ನು ನೋಡಿದ್ದ ಪ್ರಧಾನಿ ಮೋದಿ, ರೋಡ್​ ಶೋ ಬಳಿಕ ನಡೆದ ಸಮಾರಂಭದಲ್ಲಿ ಮಾತನಾಡುವಾಗ, ಆ ಎಲ್ಲ ಚಿತ್ರಗಳನ್ನು ಪಡೆದುಕೊಳ್ಳುವಂತೆ ಎಸ್​ಪಿಜಿ ಸಿಬ್ಬಂದಿಗೆ ಸೂಚಿಸಿದರು. ಅಲ್ಲದೆ, ದೆಹಲಿಗೆ ತೆರಳಿದ ಬಳಿಕ ಚಿತ್ರಿಸಿದ ಎಲ್ಲರಿಗೂ ಧನ್ಯತಾ ಪತ್ರ ಬರೆದು ಕಳುಹಿಸುವುದಾಗಿ ತಿಳಿಸಿದರು.

ಲಕ್ಷ ಕಂಠ ಗೀತಾ ಪಾರಾಯಣದಲ್ಲಿ ಪಾಲ್ಗೊಳ್ಳಲು ಆಗಮಿಸುವ ಪ್ರಧಾನ ಮೋದಿ, ಮೊದಲಿಗೆ ಶ್ರೀಕೃಷ್ಣ ಮಠಕ್ಕೆ ತೆರಳಿ ದೇವರ ದರ್ಶನ ಹಾಗೂ ಶ್ರೀಗಳೊಂದಿಗೆ ಮಾತುಕತೆ ನಡೆಸಲಿರುವ ಹಿನ್ನೆಲೆಯಲ್ಲಿ ಶುಕ್ರವಾರ ಬೆಳಗ್ಗೆ 8ರಿಂದ ಮಧ್ಯಾಹ್ನ 2:30ರ ವರೆಗೆ ಕೃಷ್ಣ ಮಠಕ್ಕೆ ಭಕ್ತರ ಪ್ರವೇಶಕ್ಕೆ ನಿರ್ಬಂಧ ವಿಧಿಸಲಾಗಿತ್ತು.

ರೋಡ್​ ಶೋ ಮೂಲಕ ಆಗಮಿಸಿದ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಉಡುಪಿಯ ಜನತೆ ಭವ್ಯವಾಗಿ ಸ್ವಾಗತಿಸಿತು. ಜಿಲ್ಲಾ ಬಿಜೆಪಿ ವತಿಯಿಂದ ವಿತರಿಸಿದ್ದ ಕೇಸರಿ ಟೋಪಿ, ಶಾಲು ಧರಿಸಿದ್ದ ಬಿಜೆಪಿ ಕಾರ್ಯಕರ್ತರು, ಮೋದಿ ಅಭಿಮಾನಿಗಳು ಹರ್ಷೋದ್ಗಾರ ವ್ಯಕ್ತಪಡಿಸಿದರು. ಕಾರಿನ ಫುಟ್‌ಪಾತ್​ ಮೇಲೆ ನಿಂತು ಜನರತ್ತ ಕೈಬೀಸುತ್ತ ಆಗಮಿಸುತ್ತಿದ್ದ ಅವರ ಮೇಲೆ ಜನರು ಹೂವುಗಳನ್ನು ಎಸೆದು ಮೋದಿ... ಮೋದಿ... ಎಂದು ಸಂತಸ ವ್ಯಕ್ತಪಡಿಸಿದರು. ಭಾರತ ಮಾತೆಗೆ ಹಾಗೂ ಪ್ರಧಾನಿಗೆ ಜೈಕಾರ ಹಾಕಿದರು. ತನ್ನ ಕಾರಿನ ಮೇಲೆ ಸಂಗ್ರಹಗೊಂಡಿದ್ದ ಹೂವುಗಳ ರಾಶಿಯನ್ನೇ ಬಾಚಿ, ಬಾಚಿ ತೆಗೆದು ಅದನ್ನು ಜನರತ್ತ ಎಸೆದು ನರೇಂದ್ರ ಮೋದಿ ಅವರೂ ಅಹ ಸಂತಸ ವ್ಯಕ್ತಪಡಿಸಿದರು.

ಪ್ರಧಾನಿ ರೋಡ್​ ಶೋ ಮುಗಿದ ಬಳಿಕ ರಸ್ತೆಯ ಇಕ್ಕೆಲಗಳಲ್ಲಿ ನಿಂತಿದ್ದ ಜನರು ಶ್ರೀಕೃಷ್ಣ ಮಠದತ್ತ ತೆರಳಲು ಯತ್ನಿಸಿದರು. ಆದರೆ, ಭದ್ರತಾ ಕಾರ್ಯದಲ್ಲಿ ನಿಂತಿದ್ದ ಪೊಲೀಸರು ಜನರನ್ನು ತಡೆದರು. ಪ್ರಧಾನಿ ಮೋದಿ ನಿರ್ಗಮಿಸುವವರೆಗೂ ಆ ಕಡೆಯ ರಸ್ತೆಗೆ ಹೋಗಲು ಬಿಡುವುದಿಲ್ಲ ಎಂದು ಪಟ್ಟು ಹಿಡಿದರು. ಇದರಿಂದ ಕೆಲ ಹಿರಿಯರು ಪೊಲೀಸರೊಂದಿಗೆ ಮಾತಿನ ಚಕಮಕಿ ನಡೆಸಿದರು. 'ಬಿಸಿಲಿದೆ. ಇಲ್ಲಿ ನಿಲ್ಲಲು ಆಗದು. ನಮಗೆ ವಯಸ್ಸಾಗಿದೆ. ನಮ್ಮನ್ನು ಬಿಡಿ' ಎಂದು ವಿನಂತಿಸಿದರೂ ಸಹ ಪೊಲೀಸರು ಬಿಡಲಿಲ್ಲ. ಇದರಿಂದ ಜನರು ಅಸಮಾಧಾನ ವ್ಯಕ್ತಪಡಿಸಿದರು.

ಉಡುಪಿಯ ಸಿಟಿ ಬಸ್​ ನಿಲ್ದಾಣದ ಬಳಿ ಹರ್ಷ ಮಳಿಗೆ ಮುಂಭಾಗದಲ್ಲಿ (ರಸ್ತೆಯ ಎಡಭಾಗದಲ್ಲಿ) ಅಳವಡಿಸಿದ್ದ ಬ್ಯಾರಿಕೇಡ್​ ತೆರೆದು ಜನರು ಅತ್ತ (ರಸ್ತೆಯ ಬಲಭಾಗ) ಸಾಗುತ್ತಿದ್ದರು. ಇದನ್ನು ನೋಡಿದ ಹೆಚ್ಚುವರಿ ಜಿಲ್ಲಾ ಪೊಲೀಸ್​ ವರಿಷ್ಠೆ ಹರ್ಷ ಪ್ರಿಯಂವದಾ ಅವರು ಅಲ್ಲಿ ಕರ್ತವ್ಯದಲ್ಲಿ ಪೊಲೀಸ್​ ಅಧಿಕಾರಿಯನ್ನು ತರಾಟೆಗೆ ತೆಗೆದುಕೊಂಡರು. ಜನರನ್ನು ಯಾಕೆ ಬಿಡುತ್ತಿದ್ದೀರಿ? ಆ ರಸ್ತೆಯಲ್ಲಿ ಪ್ರಧಾನಿ ಮೋದಿ ನಿರ್ಗಮಿಸಬೇಕಿದೆ. ಆ ಮಾರ್ಗ ಎಸ್​ಪಿಜಿ ಅವರಿಂದ ಭದ್ರತೆಗೆ ಒಳಪಟ್ಟಿದೆ. ನಿಮಗೂ ಸ್ವಲ್ಪವೂ ಜ್ಞಾನ ಇಲ್ಲವೇ ಎಂದು ಬೈದರು. ಈ ವೇಳೆ ಅಲ್ಲಿದ್ದ ಜನರು ನಮಗೆ ಮಠದ ಸಮೀಪ ನಡೆಯುವ ಕಾರ್ಯಕ್ರಮಕ್ಕೆ ಹೋಗಬೇಕು. ನಮ್ಮನ್ನು ಬಿಡಿ ಎಂದು ವಿನಂತಿಸಿದರು. ಅದಕ್ಕೆ ಬಗ್ಗದ ಎಎಸ್​ಪಿ, ಆ ಸ್ಥಳದಲ್ಲಿ ಕರ್ತವ್ಯಕ್ಕೆ ನಿಯೋಜನೆಗೊಂಡಿದ್ದ ಅಧಿಕಾರಿಗೆ 'ನಿಮ್ಮನ್ನು ಸಸ್ಪೆಂಡ್​ ಮಾಡುತ್ತೇನೆ' ಎಂದು ಸೂಚಿಸಿ ತೆರಳಿದರು.

ಪ್ರಧಾನಿ ಮೋದಿ ಸಂಚರಿಸುವ ರಸ್ತೆ ಮಾರ್ಗಗಳಲ್ಲಿ ಬಿಗಿ ಪೊಲೀಸ್​ ಭದ್ರತೆ ಮಾಡಲಾಗಿತ್ತು. ಉಡುಪಿ ನಗರ ಪ್ರವೇಶಿಸುವ ಎಲ್ಲ ಮಾರ್ಗಗಳನ್ನೂ ಬಂದ್​ ಮಾಡಲಾಗಿತ್ತು. ರಸ್ತೆಯ ಇಕ್ಕೆಲಗಳಲ್ಲಿ ನಿಲ್ಲಲು ಬಂದಿದ್ದ ಸಾರ್ವಜನಿಕರು ಹಾಗೂ ಲಕ್ಷ ಕಂಠ ಪಾರಾಯಣದಲ್ಲಿ ಪಾಲ್ಗೊಳ್ಳುವ ಎಲ್ಲರನ್ನೂ ಲೋಹ ಪರಿಶೋಧಕ (ಸ್ಕ್ಯಾನಿಂಗ್​ ಡಿಟೆಕ್ಟರ್​)ದ ಮೂಲಕ ತಪಾಸಣೆ ನಡೆಸಿಯೇ ಒಳಬಿಡಲಾಯಿತು. ಪರ್ಯಾಯ ಮಾರ್ಗಗಳ ಮೂಲಕ ವಾಹನ ಸಂಚಾರಕ್ಕೆ ವ್ಯವಸ್ಥೆ ಕಲ್ಪಿಸಲಾಗಿತ್ತು. ಮೋದಿ ಆಗಮನದ ಹಿನ್ನೆಲೆಯಲ್ಲಿ ಭದ್ರತೆಗಾಗಿ 9 ಎಸ್​ಪಿ, ಒಬ್ಬರು ಹೆಚ್ಚುವರಿ ಎಸ್ಪಿ, 27 ಡಿವೈಎಸ್ಪಿ, 49 ಇನ್ಸ್​ಪೆಕ್ಟರ್​, 127 ಪಿಎಸ್​ ಐ, 232 ಎಎಸ್​ಐ, 1,917 ಪೊಲೀಸ್​ ಸಿಬ್ಬಂದಿ ಹಾಗೂ 100ಕ್ಕೂ ಅಧಿಕ ಹೋಮ್​ ಗಾರ್ಡ್ಸ್​ಗಳನ್ನೂ ನಿಯೋಜಿಸಲಾಗಿತ್ತು.