ಉಡುಪಿ: ನಗರದ ಇಂದ್ರಾಳಿ, ಈಶ್ವರ ನಗರ, ಸರಳೇಬೆಟ್ಟು, ಮೂಡುಪೆರಂಪಳ್ಳಿ, ನರಸಿಂಗೆ ಸಹಿತ ವಿವಿಧೆಡೆ ಗಾಳಿ&ಮಳೆ ಸಂದರ್ಭದಲ್ಲಿ ಹೋದ ವಿದ್ಯುತ್​ ಸಂಪರ್ಕ 2-3 ದಿನಗಳ ಬಳಿಕ ಬಂದಿದೆ. ಈ ಭಾಗದ ಸಾರ್ವಜನಿಕರು ತುಂಬ ಸಮಸ್ಯೆ ಅನುಭವಿಸಿದ್ದಾರೆ. ಜುಲೈ ಮೊದಲ ವಾರದಲ್ಲಿ ವಿದ್ಯಾರ್ಥಿಗಳಿಗೆ ಪರೀಕ್ಷೆಯೂ ಇತ್ತು. ಕರೆಂಟ್​ ಇಲ್ಲದ್ದರಿಂದ ಅವರಿಗೂ ಸಹ ಮನೆಯಲ್ಲಿ ಸಿದ್ಧತೆ ಮಾಡಿಕೊಳ್ಳಲು ತೊಡಕಾಗಿತ್ತು. ಪದೇಪದೆ ಜನರ ತಾಳ್ಮೆ ಪರೀಕ್ಷೆ ಮಾಡಬೇಡಿ ಎಂದು ಮೆಸ್ಕಾಂ ಅಧಿಕಾರಿಗಳಿಗೆ ಶಾಸಕ ಯಶ್​ಪಾಲ್​ ಸುವರ್ಣ ಸೂಚಿಸಿದರು.

ಮುಂಗಾರು ಮಳೆ ಆರಂಭದ ಬಳಿಕ ಉಡುಪಿ ನಗರಸಭೆಯಲ್ಲಿ ಶುಕ್ರವಾರ (ಜು.10) ಆಯೋಜಿಸಿದ್ದ ವಿಶೇಷ ಸಭೆಯಲ್ಲಿ ವಿವಿಧ ಇಲಾಖೆಗಳ ಅಧಿಕಾರಿಗಳೊಂದಿಗೆ ಮಾತನಾಡಿ, ನಗರಸಭೆ ವ್ಯಾಪ್ತಿಯಲ್ಲಿ ಹಲವೆಡೆ ಮರಬಿದ್ದು ಸಮಸ್ಯೆಯಾಗುತ್ತಿದೆ. ಕೂಡಲೇ ಅಪಾಯಕಾರಿ ಮರಗಳ ತೆರವಿಗೆ ನಗರಸಭೆ ಮತ್ತು ಮೆಸ್ಕಾಂನವರಿಗೆ ಅನುಮತಿ ನೀಡಿ ಎಂದು ಅರಣ್ಯ ಇಲಾಖೆಯ ಅಧಿಕಾರಿಗಳಿಗೆ ಸಲಹೆ ನೀಡಿದರು.

ನಗರ ವ್ಯಾಪ್ತಿಯಲ್ಲಿ ಎಲ್ಲೆಲ್ಲಿ ಅಪಾಯಕಾರಿ ಮರಗಳಿವೆ ಎಂದು ಮೆಸ್ಕಾಂನವರು ಪಟ್ಟಿಮಾಡಿ, ಜಿಪಿಎಸ್​ ಆಧಾರಿತ ಫೋಟೋಗಳನ್ನು ಅರಣ್ಯ ಇಲಾಖೆಯವರಿಗೆ ಕಳುಹಿಸಿ ತೆರವಿಗೆ ಕ್ರಮಕೈಗೊಳ್ಳಬೇಕು. ಮರ ತೆರವಿಗೆ ಪರಿಣಿತ ಐವರನ್ನು ನೇಮಿಸಿಕೊಳ್ಳಬೇಕು. ನಗರಸಭೆ, ಮೆಸ್ಕಾಂ, ಅಗ್ನಿಶಾಮಕ ದಳದವರು ಸಮನ್ವಯದಿಂದ ಕೆಲಸ ನಿರ್ವಹಿಸಬೇಕು. 35 ವಾರ್ಡ್​ಗಳ ನಿಕಟಪೂರ್ವ ಸದಸ್ಯರು ತಮ್ಮ ವ್ಯಾಪ್ತಿಯಲ್ಲಿ ಅಪಾಯಕಾರಿ ಮರಗಳಿದ್ದರೆ ಮಾಹಿತಿ ನೀಡಬೇಕು ಎಂದರು.

ವಿವಿಧ ವಾರ್ಡ್​ಗಳಲ್ಲಿ ಅನಗತ್ಯ ಬೆಳೆದಿರುವ ಹುಲ್ಲು, ಗಿಡಗಂಟಿಗಳ ತೆರವು ಮಾಡಬೇಕು. ಕಸ ಸಂಗ್ರಹ ಕಾರ್ಯವೂ ಸಮರ್ಪಕವಾಗಿ ನಡೆಯಬೇಕು. ನಾಗರಪಂಚಮಿ, ಸ್ವಾತಂತ್ರ್ಯೋತ್ಸವ, ಗಣೇಶನ ಹಬ್ಬ ಬರಲಿದೆ. ಈ ಸಂದರ್ಭದಲ್ಲಿ ಸ್ವಚ್ಛತೆಗಾಗಿ ಪೂರ್ವಸಿದ್ಧತೆ ಮಾಡಿಕೊಳ್ಳಬೇಕು. ಹೆಚ್ಚುವರಿ ಸ್ವಚ್ಛತಾ ಕಾರ್ಮಿಕರನ್ನೂ ನೇಮಿಸಬೇಕು ಎಂದು ಯಶ್​ಪಾಲ್​ ನಗರಸಭೆಯ ಅಧಿಕಾರಿಗಳಿಗೆ ಸೂಚಿಸಿದರು.

ಪರ್ಕಳ ಸಹಿತ ವಿವಿಧೆಡೆ ಕುಡಿಯುವ ನೀರು ಸರಿಯಾಗಿ ಪೂರೈಕೆಯಾಗುತ್ತಿಲ್ಲ ಎಂಬ ದೂರುಗಳು ಬರುತ್ತಿವೆ. ಸೂಕ್ತ ಕ್ರಮಕೈಗೊಳ್ಳಿರಿ ಎಂದು ಶಾಸಕರು ಸೂಚಿಸಿದರು. ಇದಕ್ಕೆ ಅಧಿಕಾರಿಗಳು ಪ್ರತಿಕ್ರಿಯಿಸಿ, ನೀರು ಪೂರೈಕೆಯ ಪೈಪ್​ಲೈನ್​ ಹಾನಿಯಾಗಿದ್ದರಿಂದ ಕೆಲವೆಡೆ ಸಮಸ್ಯೆಯಾಗಿತ್ತು. ಅದನ್ನು ಸರಿಪಡಿಸಲಾಗಿದೆ. ವಾರಾಹಿಯಿಂದ ಸದ್ಯ ನೀರು ಸರಬರಾಜು ಆಗುತ್ತಿಲ್ಲ. ನಗರ ಸಹಿತ ಹತ್ತಿರದ ಗ್ರಾಮಗಳಿಗೆ ಬಜೆ ಡ್ಯಾಂನಿಂದಲೇ ನೀರು ಪೂರೈಸಲಾಗುತ್ತಿದೆ ಎಂದು ಮಾಹಿತಿ ನೀಡಿದರು.

ಸಭೆಯಲ್ಲಿ ನಗರಸಭಾ ಪೌರಾಯುಕ್ತ ಮಹಾಂತೇಶ ಹಂಗರಗಿ, ಮಾಜಿ ಅಧ್ಯಕ್ಷರಾದ ಪ್ರಭಾಕರ್​ ಪೂಜಾರಿ, ಕಿರಣ್​ ಕುಮಾರ್​ ಬೈಲೂರು, ಸುಮಿತ್ರಾ ನಾಯಕ್​, ಮಾಜಿ ಸದಸ್ಯರಾದ ಗಿರಿಧರ್​ ಆಚಾರ್ಯ, ಬಾಲಕೃಷ್ಣ ಶೆಟ್ಟಿ, ಹರೀಶ್​ ಶೆಟ್ಟಿ, ಗಿರೀಶ್​ ಅಂಚನ್​, ವಿಜಯ ಕೊಡವೂರು, ಕಲ್ಪನಾ ಸುಧಾಮ, ಅನಿತಾ ಡಿಸೋಜ, ಭಾರತಿ ಪ್ರಶಾಂತ್​, ಅರಣ್ಯ ಇಲಾಖೆ, ಅಗ್ನಿಶಾಮಕ, ಮೆಸ್ಕಾಂನ ಹಾಗೂ ನಗರಸಭೆಯ ವಿವಿಧ ಅಧಿಕಾರಿಗಳು ಉಪಸ್ಥಿತರಿದ್ದರು.