ರಿಕ್ಷಾ ಚಾಲಕರಿಗೆ ಮೂಲ ಸೌಕರ್ಯ ಒದಗಿಸಲು ಆದ್ಯತೆ

ಉಡುಪಿ: ಬ್ರಹ್ಮಾವರ ಭಾಗದ ರಿಕ್ಷಾ ಚಾಲಕರು ಮತ್ತು ಮಾಲೀಕರ ಪ್ರಮುಖ ಬೇಡಿಕೆಯಂತೆ ಧೂಪದಕಟ್ಟೆಯಿಂದ ಉಪ್ಪಿನಕೋಟೆವರೆಗೆ ಸರ್ವಿಸ್​ ರಸ್ತೆ, ರಿಕ್ಷಾ ಬಾಡಿಗೆ ದರ ಪರಿಷ್ಕರಣೆ, ಸಿಎನ್​ಜಿ ನಿರಂತರ ಪೂರೈಕೆಗೆ ಕ್ರಮ ವಹಿಸಲಾಗುವುದು. ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯಲ್ಲಿ ಮಹತ್ತರ ಪಾತ್ರವಹಿಸುವ ತಮ್ಮೆಲ್ಲ ಬೇಡಿಕೆ ಈಡೇರಿಸಲು ಹಾಗೂ ಪೂರಕ ಮೂಲ ಸೌಕರ್ಯ ಒದಗಿಸಲು ವಿಶೇಷ ಆದ್ಯತೆ ನೀಡುವುದಾಗಿ ಉಡುಪಿ ಶಾಸಕ ಯಶ್​ಪಾಲ್​ ಸುವರ್ಣ ಭರವಸೆ ನೀಡಿದರು.

ಬೈಕಾಡಿ ದೇವಕಿ ಕನ್ವೆನ್ಷನ್​ ಸಭಾಂಗಣದಲ್ಲಿ ಭಾನುವಾರ (ಜು.19) ಸಂಜೆ ಆಯೋಜಿಸಿದ್ದ ಬ್ರಹ್ಮಾವರ ವಲಯದ ರಿಕ್ಷಾ ಚಾಲಕರು ಮತ್ತು ಮಾಲೀಕರ ಕುಂದು-ಕೊರತೆಗಳ ಹಾಗೂ ಸಮಾಲೋಚನಾ ಸಭೆಯಲ್ಲಿ ಮಾತನಾಡಿದರು.

ತಾಲೂಕು ಕೇಂದ್ರವಾಗಿರುವ ಬ್ರಹ್ಮಾವರದಲ್ಲಿ ವಾರದಲ್ಲಿ ಒಂದು ದಿನ ಸಾರಿಗೆ ಇಲಾಖೆಗೆ ಸಂಬಂಧಿತ ಕೆಲಸ&ಕಾರ್ಯ ಮಾಡಿಕೊಳ್ಳುವಂತಾಗಲು ಆರ್​ಟಿಒ ಕ್ಯಾಂಪ್​ ನಡೆಸಲಾಗುವುದು. ಅಲ್ಲದೆ, ರಿಕ್ಷಾ ನಿಲ್ದಾಣದಲ್ಲಿ ಶೆಲ್ಟರ್​ ನಿಮಾರ್ಣಕ್ಕೆ  ಆದ್ಯತೆಯ ಮೇಲೆ ಪ್ರಯತ್ನಿಸುವುದಾಗಿ ಯಶ್​ಪಾಲ್​ ತಿಳಿಸಿದರು.

ಬ್ರಹ್ಮಾವರ ವ್ಯವಸಾಯ ಸೇವಾ ಸಹಕಾರಿ ಸಂಘದ ಅಧ್ಯಕ್ಷ ಬಿರ್ತಿ ರಾಜೇಶ್​ ಶೆಟ್ಟಿ ಮಾತನಾಡಿದರು.

ಬ್ರಹ್ಮಾವರ ವಲಯದ ವಿವಿಧ ರಿಕ್ಷಾ ನಿಲ್ದಾಣದ ಸುಮಾರು 200 ಚಾಲಕರು ಪಾಲ್ಗೊಂಡಿದ್ದರು. ತಮ್ಮ ಸಮಸ್ಯೆ ಹಾಗೂ ಬೇಡಿಕೆಗಳ ಕುರಿತಾಗಿ ಶಾಸಕರೊಂದಿಗೆ ಸಮಾಲೋಚನೆ ನಡೆಸಿದರು.

ಸಭೆಯಲ್ಲಿ ಉಡುಪಿಯ ಹಿರಿಯ ವಕೀಲ ಹರಿಮಕ್ಕಿ ರತ್ನಾಕರ್​ ಶೆಟ್ಟಿ, ರಿಕ್ಷಾ ಚಾಲಕರ ಸಂಘದ ಮುಖಂಡರಾದ ಭಾಸ್ಕರ್​ ಪೂಜಾರಿ, ಸೂರ್ಯ ಪೂಜಾರಿ ಉಪಸ್ಥಿತರಿದ್ದರು.

ಆರೂರು ಗ್ರಾಪಂ ಮಾಜಿ ಅಧ್ಯಕ್ಷ ರಾಜೀವ್​ ಕುಲಾಲ್​ ಸ್ವಾಗತಿಸಿದರು. ಕಮಲಾಕ್ಷ ಹೆಬ್ಬಾರ್​ ವಂದಿಸಿದರು. ಮನೋಜ್​ ಶೆಟ್ಟಿ ಕಳ್ತೂರು ಕಾರ್ಯಕ್ರಮ ನಿರೂಪಿಸಿದರು.

"

ರಿಕ್ಷಾ ಚಾಲಕ&ಮಾಲೀಕರ ತುರ್ತು ಬೇಡಿಕೆಗಳಿಗೆ ಶಾಸಕ ಯಶ್​ಪಾಲ್​ ಸುವರ್ಣ ಶೀಘ್ರವಾಗಿ ಸ್ಪಂದಿಸುತ್ತಾರೆ. ಅವರ ಕಾರ್ಯವೈಖರಿಗೆ ಪೂರಕವಾಗಿ ಅಗತ್ಯ ಸಂದರ್ಭದಲ್ಲಿ ರಿಕ್ಷಾ ಚಾಲಕರಿಗೆ ಉಚಿತವಾಗಿ ಕಾನೂನು ಸಲಹೆ ನೀಡಲು ಸದಾ ಸಿದ್ಧನಿದ್ದೇನೆ.

— ಬೈಕಾಡಿ ಸುಪ್ರಸಾದ್​ ಶೆಟ್ಟಿ. ಹಿರಿಯ ವಕೀಲ.