ಉಡುಪಿ ಜಿಲ್ಲೆಯಲ್ಲಿ 650ಕ್ಕೂ ಅಧಿಕ ಮೆಡಿಕಲ್​ ಶಾಪ್​ ಬಂದ್​

ಉಡುಪಿ: ಆನ್ಲೈನ್​ ಸೇವೆ ಸ್ಥಗಿತಗೊಳಿಸಲು ಆಗ್ರಹಿಸಿ ಜಿಲ್ಲೆಯಾದ್ಯಂತ 650ಕ್ಕೂ ಅಧಿಕ ಮೆಡಿಕಲ್​ಗಳು ಬಂದ್​ ಮಾಡಿ ಪ್ರತಿಭಟನೆ ನಡೆಸಿದ್ದಾರೆ.

ಅಖಿಲ ಭಾರತ ಔಷಧ ವ್ಯಾಪಾರಿಗಳ ಸಂಘದ ಜಿಲ್ಲಾ ಅಧ್ಯಕ್ಷ ಅಮ್ಮುಂಜೆ ರಮೇಶ್​ ನಾಯಕ್​ ಮಾತನಾಡಿ, ಆನ್​ಲೈನ್​ ಔಷಧ ಸೇವೆಯಿಂದ, ಯುವಕರು ಸುಲಭವಾಗಿ ಮಾದಕ ವ್ಯಸನಗಳಿಗೆ ತುತ್ತಾಗುತ್ತಿದ್ದಾರೆ. ವೈದ್ಯರ ಚೀಟಿ ಇಲ್ಲದೆ ಔಷಧಿ ನೀಡಲಾಗುತ್ತದೆ. ಎಐ ಮೂಲಕ ನಕಲಿ ಚೀಟಿಗಳನ್ನು ಸಿದ್ಧಪಡಿಸಿ ಔಷಧ ಪಡೆಯಲಾಗುತ್ತದೆ. ಕೋವಿಡ್​ ಸಮಯದಲ್ಲಿ ಆನ್​ಲೈನ್​ ಸೇವೆಗೆ ಅವಕಾಶ ನೀಡಲಾಗಿದೆ. ಆಗ ಈ ಸೇವೆಯ ಅಗತ್ಯ ಇತ್ತು. ಜನರಿಗೆ ಅನುಕೂಲವಾಗಿತ್ತು. ವೈದ್ಯರ ಚೀಟಿ ಇಲ್ಲದೆ ಔಷದ ವ್ಯಾಪಾರ ನಡೆಯುತ್ತಿದೆ ಎಂದು ಆರೋಪಿಸಿದರು.

ಪಿಡಿಎಫ್​ ಎಡಿಟರ್​ ಮೂಲಕವೂ ಔಷಧ ಚೀಟಿ ಬದಲಾಯಿಸುತ್ತಾರೆ. ಈ ಕಳ್ಳ ವ್ಯವಹಾರ ಆನ್​ಲೈನ್​ನವರಿಗೆ ಗೊತ್ತಾಗುವುದಿಲ್ಲ. ಆರೋಗ್ಯದಲ್ಲಿ ಏರುಪೇರಾದರೆ ಯಾರು ಹೊಣೆ. ಜನರ ಸುರಕ್ಷತೆಗೋಸ್ಕರ ನಾವು ಪ್ರತಿಭಟನೆ ಮಾಡುತ್ತಿದ್ದೇವೆ. ನಾವು ಕೂಡ ಸಾಕಷ್ಟು ವಿನಾಯಿತಿ ನೀಡುತ್ತೇವೆ. ನಮ್ಮ ಬಳಿ ಔಷಧಿ ಬಂದ ಎಲ್ಲಾ ವಿವರಗಳು ಬ್ಯಾಚ್​ ನಂಬರ್​ ಇರುತ್ತದೆ. ಫಾರಂ 5ರ ಅನುಸಾರ ಕಾರ್ಯನಿರ್ವಹಿಸುತ್ತೇವೆ. ಸರ್ಕಾರ ನಿಗದಿಪಡಿಸಿದ ದರದಲ್ಲಿ ಮಾರಾಟ ಮಾಡುತ್ತೇವೆ ಎಂದರು.

ಔಷಧಿ ಕಂಪನಿಗಳು ಶೇ. 40 ಮಾರ್ಜಿನ್​ ಕೊಡುತ್ತವೆ. ಆದರೆ ಆನ್​ಲೈನ್​ನಲ್ಲಿ ಶೇ.50 ಡಿಸ್ಕೌಂಟ್​ ನೀಡುತ್ತಾರೆ. ಇದರಿಂದ ಸಣ್ಣಪುಟ್ಟ ಮೆಡಿಕಲ್​ಗಳಿಗೆ ಸಮಸ್ಯೆಯಾಗುತ್ತಿದೆ . ಈ ವ್ಯವಹಾರದಲ್ಲಿ ಪಾರದರ್ಶಕತೆ ಇಲ್ಲ. ಸರ್ಕಾರ ನಮಗೆ ನ್ಯಾಯ ನೀಡಬೇಕು. ಅನೇಕ ಬಾರಿ ಗಮನ ಸೆಳೆದರು ಪ್ರಯೋಜನವಾಗಿಲ್ಲ. ಹೀಗಾಗಿ ಜಿಲ್ಲಾಧಿಕಾರಿಗಳ ಮೂಲಕ ಪ್ರಧಾನ ಮಂತ್ರಿಗಳಿಗೆ ಮನವಿ ನೀಡುತ್ತೇವೆ ಎಂದರು.

ಅಖಿಲ ಭಾರತ ಔಷಧಿ ವ್ಯಾಪಾರಿಗಳ ಸಂಘಟನೆ ವತಿಯಿಂದ ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಪ್ರಧಾನಿ ನರೇಂದ್ರ ಮೋದಿಯವರಿಗೆ ಜಿಲ್ಲಾಧಿಕಾರಿ ಸ್ವರೂಪ ಟಿ.ಕೆ ಮೂಲಕ ಮನವಿ ಸಲ್ಲಿಸಲಾಯಿತು. ಈ ಸಂದರ್ಭದಲ್ಲಿ ಸಂಘದ ಅಧ್ಯಕ್ಷ ಅಮ್ಮುಂಜೆ ರಮೇಶ್​ ನಾಯಕ್​, ಕಾರ್ಯದರ್ಶಿ ಯು.ಸುಬ್ರಮಣ್ಯ ರಾವ್​, ಕೋಶಾಧಿಕಾರಿ ಗುರುಕೃಪ ವಿ. ರಾವ್​, ಶರಣಂ ಶೆಟ್ಟಿ, ವಿನೋದ್​ ನಾಯಕ್​, ರವೀಂದ್ರ ಕಾಮತ್​, ಅಜಿತ್​ ಮೆಂಡನ್​, ಅಶೋಕ್​ ಶೆಟ್ಟಿ, ಸತೀಶ್​, ವಿನಯ್​ ಮೊದಲಾದವರು ಉಪಸ್ಥಿತರಿದ್ದರು.