ಉಡುಪಿ: ಬೆಹರೈನ್​ ದೇಶದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಯೋಗದಲ್ಲಿ 10ನೇ ಬಾರಿ ದಾಖಲೆ ನಿರ್ಮಿಸುವ ಮೂಲಕ ತನುಶ್ರೀ ಪಿತ್ರೋಡಿ, ವಿಶ್ವದಲ್ಲಿಯೇ ಭಾರತದ ಕೀರ್ತಿ ಹೆಚ್ಚಿಸಿದ್ದಾಳೆ. ಆಕೆ ಕಲಿತ ಶಾಲೆಯಲ್ಲಿಯೇ 'ಗೋಲ್ಡನ್​ ಬುಕ್​ ಆಫ್​ ರೆಕಾರ್ಡ್ಸ್​'ನ ಪ್ರಮಾಣ ಪತ್ರ ವಿತರಿಸಲು ಹೆಮ್ಮೆಯಾಗುತ್ತಿದೆ. ಯೋಗಕ್ಕೆ ವಿಶೇಷ ಮಹತ್ವ, ಪ್ರೋತ್ಸಾಹ ನೀಡುವ ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗೆ ತನುಶ್ರೀ ಭೇಟಿ ಮಾಡಿಸಿ ಆಕೆಯ ಯೋಗ ಸಾಧನೆ ತಿಳಿಸುವ ಪ್ರಯತ್ನ ಮಾಡುತ್ತೇನೆ. ಯೋಗ ಕ್ಷೇತ್ರದಲ್ಲಿ ಆಕೆಯ ಸಾಧನೆ ಇನ್ನಷ್ಟು ಮೇಳೈಸಲಿ ಎಂದು ಶಾಸಕ ಯಶ್​ಪಾಲ್​ ಸುವರ್ಣ ಆಶಯ ವ್ಯಕ್ತಪಡಿಸಿದರು.

ಉಡುಪಿಯ ಸೈಂಟ್​ ಸಿಸಿಲಿ ಹೈಸ್ಕೂಲ್​ನ ಸಭಾಂಗಣದಲ್ಲಿ ಶನಿವಾರ (ನ.22) ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಅ.24ರಂದು ಬೆಹರೈನ್​ನಲ್ಲಿ 50 ನಿಮಿಷದಲ್ಲಿ ಯೋಗದ 333 ವಿವಿಧ ಪ್ರಕಾರ ಪ್ರದರ್ಶಿಸಿ 10ನೇ ಬಾರಿಗೆ ವಿಶ್ವ ದಾಖಲೆ ನಿರ್ಮಿಸಿದ ಹಿನ್ನೆಲೆಯಲ್ಲಿ ಲಭಿಸಿದ "ಗೋಲ್ಡನ್​ ಬುಕ್​ ಆ್​ ರೆಕಾರ್ಡ್ಸ್​' ಪ್ರಮಾಣ ಪತ್ರ ವಿತರಿಸಿ ಮಾತನಾಡಿದರು.

ಜಿಪಂ ಮಾಜಿ ಸದಸ್ಯೆ ಗೀತಾಂಜಲಿ ಸುವರ್ಣ ಮಾತನಾಡಿ, ಯೋಗ ಕ್ಷೇತ್ರದಲ್ಲಿ ತನುಶ್ರೀ ಇಂತಹ ಸಾಧನೆ ಮಾಡುವಲ್ಲಿ ತಂದೆ-ತಾಯಿ ಪರಿಶ್ರಮ, ಪ್ರೋತ್ಸಾಹವೇ ಕಾರಣ. ಮಕ್ಕಳ ಶ್ರೇಯೋಭಿವೃದ್ಧಿಯಲ್ಲಿ ತಂದೆ-ತಾಯಿಗಳು ಹೇಗೆ ಸಹಕರಿಸಬೇಕು ಎನ್ನುವುದಕ್ಕೆ ಸಂಧ್ಯಾ- ಹಾಗೂ ಉದಯ್​ ಪಿತ್ರೋಡಿ ದಂಪತಿ ಮಾದರಿಯಾಗಿದ್ದಾರೆ. ಯೋಗ ಕ್ಷೇತ್ರದಲ್ಲಿ ತನುಶ್ರೀ ಇನ್ನಷ್ಟು ಸಾಧನೆ, ದಾಖಲೆ ಮಾಡಲೆಂದು ಆಶಿಸುತ್ತೇನೆ ಎಂದರು.

ಬಿಲ್ಲವಾಸ್​ ಬೆಹೆರೈನ್​ ಸಂಘದ ಅಧ್ಯಕ್ಷ ಪ್ರಕಾಶ್​ ಅಂಚನ್​, ವಿದ್ಯುತ್​ ಗುತ್ತಿಗೆದಾರರ ಸಂಘದ ಮಾಜಿ ಅಧ್ಯಕ್ಷ ನಾರಾಯಣ ಶೆಟ್ಟಿ, ಜಿಲ್ಲಾ ನಾಟಕಕಾರ ಸಂಘದ ಅಧ್ಯಕ್ಷ ನವೀನ್​ ಸಾಲಿಯಾನ್​ ಪಿತ್ರೋಡಿ, ವೆಂಕಟ್ರಮಣ ಸ್ಟೋರ್ಟ್ಸ್​ ಆ್ಯಂಡ್​ ಕಲ್ಚರಲ್​ನ ಅಧ್ಯಕ್ಷ ಸಂದೀಪ್​ ಕುಮಾರ್​ ಪಿತ್ರೋಡಿ, ನೃತ್ಯ ಗುರು ರಾಮಕೃಷ್ಣ ಕೊಡಂಚ, ನಗರಸಭಾ ಸದಸ್ಯ ಬಾಲಕೃಷ್ಣ ಶೆಟ್ಟಿ ಉಪಸ್ಥಿತರಿದ್ದರು.

ರಿತುಶ್ರೀ ಪಿತ್ರೋಡಿ ಪ್ರಾರ್ಥಿಸಿದರು. ನಾಗರಾಜ್​ ರಾವ್​ ಕಾರ್ಯಕ್ರಮ ನಿರೂಪಿಸಿದರು. ತನುಶ್ರೀ ತಂದೆ ಉದಯ ಪಿತ್ರೋಡಿ, ತಾಯಿ ಸಂಧ್ಯಾ ಪಿತ್ರೋಡಿ ಸಹಕರಿಸಿದರು.

"