ಉಡುಪಿ: ಶಿಶು ಸ್ಪರ್ಧೆಯಲ್ಲಿ ಬಹುಮಾನ ಸಿಗುವುದು ಮುಖ್ಯವಲ್ಲ. ಮಕ್ಕಳ ಆರೋಗ್ಯಕರ ಬೆಳವಣಿಗೆಗೆ ಹೆತ್ತವರು ಹೆಚ್ಚಿನ ಕಾಳಜಿ ವಹಿಸುವುದೇ ನಿಜವಾದ ಗೆಲುವು. ಪಾಲಕರಿಗೆ ದೇವರು ನೀಡಿರುವ ಅತ್ಯಮೂಲ್ಯ ಉಡುಗೊರೆಯೇ ಮಕ್ಕಳು. ಅವರನ್ನು ಪ್ರೀತಿಯಿಂದ ಬೆಳೆಸಬೇಕು ಎಂದು ಮಣಿಪಾಲ ಕೆಎಂಸಿಯ ಪೀಡಿಯಾಟ್ರಿಕ್​ ಐಸಿಯು ವಿಭಾಗದ ಪ್ರಭಾರಿ ಮುಖ್ಯಸ್ಥ, ಮಕ್ಕಳ ತಜ್ಞ ಡಾ. ಸಂದೀಪ್​ ಕುಮಾರ್​ ಕರೆ ನೀಡಿದರು. 

ಉಡುಪಿ ಪರ್ಕಳದಲ್ಲಿರುವ ಬ್ರಹ್ಮಶ್ರೀ ನಾರಾಯಣ ಗುರು ಆಡಿಟೋರಿಯಂನಲ್ಲಿ ರೋಟರಿ ಐಸಿರಿ ಪರ್ಕಳ, ಆರ್​ಸಿಸಿ ಐಸಿರಿ ಪರ್ಕಳ, ಪ್ರಾಥಮಿಕ ಆರೋಗ್ಯ ಕೇಂದ್ರ ಹಿರೇಬೆಟ್ಟು ಹಾಗೂ ಬ್ರಹ್ಮಶ್ರೀ ನಾರಾಯಣ ಗುರು ಸೇವಾ ಸಂಘ (ರಿ.) ಪರ್ಕಳ ಸಹಭಾಗಿತ್ವದಲ್ಲಿ ಭಾನುವಾರ (ಜು.19) ಆಯೋಜಿಸಿದ್ದ ತಾಯಿ-ಮಗುವಿನ ಆರೋಗ್ಯ ಮಾಹಿತಿ ಹಾಗೂ ಶಿಶು ಸ್ಪರ್ಧೆ-2026ರ ಬಹುಮಾನ ವಿತರಣಾ ಸಮಾರಂಭದಲ್ಲಿ ಮಾತನಾಡಿದರು.

ಕಾರ್ಯಕ್ರಮ ಉದ್ಘಾಟಿಸಿದ ಅಂತಾರಾಷ್ಟ್ರೀಯ ರೋಟರಿ ಜಿಲ್ಲೆ 3182ರ ವಲಯ-4ರ ತಾಯಿ-ಮಗುವಿನ ಆರೋಗ್ಯ ವಿಭಾಗದ ಸಂಯೋಜಕಿ ರೊ. ಪಿ.ಎಚ್​.ಎಫ್​. ಗೀತಾಶ್ರೀ ಎಂ. ಉಪಾಧ್ಯಾಯ ಮಾತನಾಡಿ, ಪಾಲಕರು ತಮ್ಮ ಮಕ್ಕಳೊಂದಿಗೆ ಸಾಧ್ಯವಿದ್ದಷ್ಟು ಹೆಚ್ಚು ಸಮಯ ಕಳೆಯಬೇಕು. ಅವರಿಗೆ ಮೌಲ್ಯಯುತ ಸಂಸ್ಕಾರ ನೀಡಬೇಕು. ಉಳಿದ ಕೆಲಸಗಳಿಗೆ ಸಮಯ ಮೀಸಲಿಡುವಂತೆ  ಮಕ್ಕಳಿಗಾಗಿಯೂ ಸಮಯ ಮೀಸಲಿಡಬೇಕು ಎಂದರು.

ಆರ್​ಸಿಸಿ ಐಸಿರಿಯ ಅಧ್ಯಕ್ಷೆ ಲಕ್ಷ್ಮೀ ನಾಯ್ಕ್​, ಕಾರ್ಯದರ್ಶಿ ಶಾರದಾ ಎಸ್​., ಬ್ರಹ್ಮಶ್ರೀ ನಾರಾಯಣ ಗುರು ಸೇವಾ ಸಂಘ ಪರ್ಕಳದ ಗೌರವಾಧ್ಯಕ್ಷ ಹಿರಿಯಣ್ಣ, ಅಧ್ಯಕ್ಷ ರೊ. ಅನಿಲ್​ ಕುಮಾರ್​, ಕಾರ್ಯದರ್ಶಿ ಭಾಸ್ಕರ್​ ಪೂಜಾರಿ, ಪ್ರಾಥಮಿಕ ಆರೋಗ್ಯ ಕೇಂದ್ರ ಹಿರೇಬೆಟ್ಟುವಿನ ಆರೋಗ್ಯ ಸಹಾಯಕಿ ದಾವಲ್ಬಿ ವಾಲೀಕಾರ್​ ಉಪಸ್ಥಿತರಿದ್ದರು.

ರೋಟರಿ ಐಸಿರಿ ಪರ್ಕಳ ಅಧ್ಯಕ್ಷ ರೊ.ಸಂದೀಪ್​ ಕುಮಾರ್​ ಸ್ವಾಗತಿಸಿದರು. ರೋಟರಿ ಐಸಿರಿ ಪರ್ಕಳದ ಸಮುದಾಯ ಸೇವಾ ನಿರ್ದೇಶಕ ರೊ.ಪ್ರಭಾಕರ್​ ಶೆಟ್ಟಿ ಕೆ. ಪ್ರಾಸ್ತಾವಿಕವಾಗಿ ಮಾತನಾಡಿದರು. ಕಾರ್ಯದರ್ಶಿ ರಾಜೇಶ್​ ಡಿ. ಶೆಣೈ ಬಹುಮಾನ ವಿಜೇತರ ಪಟ್ಟಿ ವಾಚಿಸಿ, ವಂದಿಸಿದರು. ಇಂಟರಾಕ್ಟ್​ ಸಭಾಪತಿ ರೊ.ವೆಂಕಟೇಶ್​ ಭಟ್​ ಕೆ.ಎಂ. ಕಾರ್ಯಕ್ರಮ ನಿರೂಪಿಸಿದರು.