ಮಾನವೀಯ ಮೌಲ್ಯಗಳು ಶಾಶ್ವತ

ಮಾಹೆಯ 34ನೇ ಘಟಿಕೋತ್ಸವ ಪ್ರಥಮ ದಿನ, 1,348 ವಿದ್ಯಾರ್ಥಿಗಳಿಗೆ ಪದವಿ ಪ್ರದಾನ
Mahe convocation
ಕೋನೆ ಎಲಿವೇರ್ಟಸ್​ ಸಂಸ್ಥೆಯ ಭಾರತ ಮತ್ತು ದಕ್ಷಿಣ ಏಷ್ಯಾ ವಿಭಾಗದ ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ಅಮಿತ್​ ಗೊಸೈನ್​ ಮಾತನಾಡಿದರು.
Published on: 

ಉಡುಪಿ: ತಂತ್ರಜ್ಞಾನ ಬದಲಾಗುತ್ತಿರುತ್ತದೆ. ಆದರೆ ಮಾನವೀಯ ಮೌಲ್ಯಗಳು ಮತ್ತು ಸಂಬಂಧಗಳು ಎಂದಿಗೂ ಶಾಶ್ವತ. ಸದಾ ಕುತೂಹಲ ಮತ್ತು ವಿನಯಶೀಲತೆಯಿಂದ ಕಲಿಯುವುದನ್ನು ಮುಂದುವರಿಸಬೇಕು. ನಮ್ಮ ವೈಯಕ್ತಿಕ ಸಾಧನೆಗಿಂತ ಇತರರ ಜೀವನದಲ್ಲಿ ನಾವು ಮೂಡಿಸುವ ಪ್ರಭಾವವೇ ನಿಜವಾದ ಯಶಸ್ಸು ಎಂದು ಕೋನೆ ಎಲಿವೇರ್ಟಸ್​ ಸಂಸ್ಥೆಯ ಭಾರತ ಮತ್ತು ದಕ್ಷಿಣ ಏಷ್ಯಾ ವಿಭಾಗದ ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ಅಮಿತ್​ ಗೊಸೈನ್​ ಹೇಳಿದರು.

ಮಣಿಪಾಲ್​ ಅಕಾಡೆಮಿ ಆಫ್​ ಹೈಯರ್​ ಎಜುಕೇಶನ್​ನ (ಮಾಹೆ) 34ನೇ ಘಟಿಕೋತ್ಸವ ಉದ್ಘಾಟನಾ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಮಾತನಾಡಿದರು.

ಮಹೆ ಸಹಕುಲಾಧಿಪತಿ ಡಾ. ಎಚ್​.ಎಸ್​. ಬಲ್ಲಾಳ್​ ಘಟಿಕೋತ್ಸವಕ್ಕೆ ಚಾಲನೆ ನೀಡಿದರು.ಮಾಹೆ ಟ್ರಸ್ಟ್​ನ ಟ್ರಸ್ಟಿ ವಸಂತಿ ಆರ್​. ಪೈ ಅಧ್ಯಕ್ಷತೆ ವಹಿಸಿದ್ದರು.

ಮಾಹೆ ಕುಲಪತಿ ಡಾ. ಶರತ್​ ಕೆ. ರಾವ್​ ಮಾತನಾಡಿ, ತಂತ್ರಜ್ಞಾನ, ವೈದ್ಯಕಿಯ ಸೇವೆ ಮತ್ತು ಸಾಮಾಜಿಕ ಅಗತ್ಯಗಳು ವೇಗವಾಗಿ ಬದಲಾಗುತ್ತಿರುವ ಈ ಕಾಲಘಟ್ಟದಲ್ಲಿ ವಿಶ್ವವಿದ್ಯಾಲಯಗಳು ಕೇವಲ ಶಿಕ್ಷಣಕ್ಕಷ್ಟೇ ಸೀಮಿತವಾಗದೆ ಅದಕ್ಕೂ ಮೀರಿದ ಜವಾಬ್ದಾರಿ ಹೊರಬೇಕು. ಕ್ಷಿಪ್ರ ಬದಲಾವಣೆಗಳಿಗೆ ಒಗ್ಗಿಕೊಳ್ಳಲು ಹಾಗೂ ಸಹಾನುಭೂತಿಯಿಂದ ಸ್ಪಂದಿಸಲು ವಿದ್ಯಾರ್ಥಿಗಳನ್ನು ಸಜ್ಜುಗೊಳಿಸಬೇಕಿದೆ ಎಂದರು.

ವಿಜ್ಞಾನ ಮತ್ತು ತಂತ್ರಜ್ಞಾನ ವಿಭಾಗದ ಸಹಕುಲಪತಿ ಡಾ. ಕರುಣಾಕರ ಕೋಟೆಗಾರ್​ ಸ್ವಾಗತಿಸಿದರು. ಎಂಐಟಿ ನಿರ್ದೇಶಕಿ ಡಾ. ಚಂದ್ರಕಲಾ ಸಿ.ಬಿ. ಮುಖ್ಯ ಅತಿಥಿಗಳನ್ನು ಪರಿಚಯಿಸಿದರು. ಸ್ಟೂಡೆಂಟ್ಸ್​ ಅಫೇರ್ಸ್​ ನಿರ್ದೇಶಕಿ ಡಾ. ಪೂರ್ಣಿಮಾ ಕುಂದಾಪುರ್​ ಚಿನ್ನದ ಪದಕ ವಿಜೇತರ ಹಾಗೂ ಸೆಂಟರ್​ ಫಾರ್​ ಡಾಕ್ಟೋರಲ್​ ಸ್ಟಡಿಸ್​ ಉಪನಿರ್ದೇಶಕಿ ಡಾ. ವಸುಧಾ ದೇವಿ ಪಿಎಚ್​ಡಿ ಪದವೀಧರರ ಹೆಸರು ವಾಚಿಸಿದರು. ಕುಲಸಚಿವ ಡಾ. ಪಿ. ಗಿರಿಧರ ಕಿಣಿ ವಂದಿಸಿದರು.

ಇಬ್ಬರಿಗೆ ಚಿನ್ನದ ಪದಕ

ಅತ್ಯುತ್ತಮ ಶೈಕ್ಷಣಿಕ ಸಾಧನೆ ತೋರಿದ ಮಣಿಪಾಲ ಕೆಎಂಸಿಯ ಎಂಬಿಬಿಎಸ್​ ಪದವೀಧರೆ ಪ್ರಿಯಾಂಶಿ ರಾಸ್ತೋಗಿ ಹಾಗೂ ಎಂಐಟಿಯ ಕಂಪ್ಯೂಟರ್​ ಸೈನ್ಸ್​ ವಿಭಾಗದ ಬಿಟೆಕ್​ ಪದವೀಧರೆ ಕೋಮಲ್​ ಮಾಥುರ್​ ಅವರಿಗೆ ಡಾ. ಟಿಎಂಎ ಪೈ ಚಿನ್ನದ ಪದಕ- ಪ್ರದಾನ ಮಾಡಿ ಗೌರವಿಸಲಾಯಿತು. ಮೊದಲ ದಿನ 53 ಪಿಎಚ್​ಡಿ ಪದವೀಧರರು ಸೇರಿದಂತೆ ಒಟ್ಟು 1,348 ವಿದ್ಯಾರ್ಥಿಗಳಿಗೆ ಪದವಿ ಪ್ರದಾನ ಮಾಡಲಾಯಿತು.