ಉಡುಪಿ: ಸಜ್ಜನರಿಗೆ ಧಾರ್ಮಿಕ ಮಾರ್ಗದಲ್ಲಿ ಸಾಗುವಾಗ ಬಹಳ ವಿಘ್ನಗಳು ಕಾಡುತ್ತವೆ. ಬಗೆ ಬಗೆಯ ಪರೀಕ್ಷೆಗಳೂ ಎದುರಾಗುತ್ತದೆ. ಹೀಗಾಗಿ ನಿತ್ಯ ಶ್ರೀಕೃಷ್ಣನನ್ನು ದರ್ಶಿಸಿದರೆ ಸಕಲ ವಿಘ್ನಗಳೂ ನಿವಾರಣೆಯಾಗುತ್ತದೆ. ಆ ಹಿನ್ನೆಲೆಯಲ್ಲಿಯೇ ಶ್ರೀಮಧ್ವಾಚಾರ್ಯರು ಶ್ರೀಕೃಷ್ಣನನ್ನು ಉಡುಪಿಯಲ್ಲಿ ಪ್ರತಿಷ್ಠಾಪಿಸಿದ್ದಾರೆ. ದೇವರ ಪ್ರಸಾದ, ಅನುಗ್ರಹದಿಂದ ಸಾಧನೆ ಮಾಡಲು ಸಾಧ್ಯ. ಸಾಧನೆ ಮಾಡುವವರಿಗೆ ಉಡುಪಿಯ ಶ್ರೀಕೃಷ್ಣನು ಪ್ರೇರಕನಾಗಿದ್ದಾನೆ ಎಂದು ಶ್ರೀಕೃಷ್ಣಾಪುರ ಮಠದ ವಿದ್ಯಾಸಾಗರ ತೀರ್ಥ ಶ್ರೀಪಾದರು ನುಡಿದರು.

ಉಡುಪಿಯ ಶ್ರೀಕೃಷ್ಣ ಮಠದ ರಾಜಾಂಗಣದಲ್ಲಿ ಪರ್ಯಾಯ ಶೀರೂರು ಮಠದ ವತಿಯಿಂದ ಮಂಗಳವಾರ (ಜ.27) ಆಯೋಜಿಸಿದ್ದ ಮಧ್ವ ನವಮಿ ಹಾಗೂ ಜ.18ರಿಂದ ಶೀರೂರು ಪರ್ಯಾಯದ ನಿಮಿತ್ತ ಆರಂಭಗೊಂಡಿದ್ದ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮದ ಸಮಾರೋಪ ಸಮಾರಂಭದಲ್ಲಿ ಆಶೀರ್ವಚನ ನೀಡಿದರು.

ಪರ್ಯಾಯ ಶೀರೂರು ಮಠದ ವೇದವರ್ಧನ ಶ್ರೀ ಆಶೀರ್ವಚನ ನೀಡಿ, ಉಡುಪಿಗೆ ಧಾರ್ಮಿಕ ಕಳೆ ಬಂದದ್ದು ಶ್ರೀಕೃಷ್ಣನಿಂದ. ಕಲಿಯುಗದಲ್ಲಿ ದೇವರ ಅವತಾರವಿಲ್ಲ. ಆದರೆ, ಅನುಗ್ರಹ ನೀಡುತ್ತಾರೆ. ಧರ್ಮಕ್ಕೆ ಸಂಕಟ ಎದುರಾದಾಗಲೆಲ್ಲ ಅವತರಿಸುತ್ತೇನೆ ಎಂದು ಗೀತೆಯಲ್ಲಿಯೇ ಶ್ರೀಕೃಷ್ಣ ತಿಳಿಸಿದ್ದಾನೆ. ಹೀಗಾಗಿ ಮಧ್ವಾಚಾರ್ಯರ ಮೂಲಕ ಕಡಗೋಲುಕೃಷ್ಣನಾಗಿ ಮತ್ತೆ ಉಡುಪಿಯಲ್ಲಿ ನಿಂತಿದ್ದಾನೆ. ಶ್ರೀಮಧ್ವಾಂತರ್ಗತ ಕೃಷ್ಣನ ಪೂಜೆಯಿಂದ, ಸೇವೆಯಿಂದ ನೆಮ್ಮದಿ ಲಭಿಸಲಿದೆ. ನಮ್ಮ ಪರ್ಯಾಯೋತ್ಸವ 10 ದಿನದ ವಿಶೇಷ ಕಾರ್ಯಕ್ರಮದ ಸಮಾರೋಪವೂ ಮಧ್ವನವಮಿಯಂದೇ ನಡೆದಿರುವುದು ವಿಶೇಷ ಎಂದರು.

ನಿತ್ಯದ ವೇದಪಾರಾಯಣ ಕಾರ್ಯಕ್ರಮದಲ್ಲಿ ವಿವಿಧ ಪಾರಾಯಣ ಪಠಿಸಿದ ವಿದ್ವಾಂಸರುಗಳಿಗೆ ಪರ್ಯಾಯ ಶೀರೂರು ವೇದವರ್ಧನ ಶ್ರೀಗಳು ಸಂಭಾವನೆಯೊಂದಿಗೆ ಅನುಗ್ರಹ ಮಂತ್ರಾಕ್ಷತೆ ನೀಡಿದರು. 

ಕೆನರಾ ಬ್ಯಾಂಕ್​ನ ಜನರಲ್​ ಮೆನೇಜರ್​ ಎಚ್​.ಕೆ. ಗಂಗಾಧರ್​, ಸಹಾಯಕ ಜನರಲ್​ ಮೆನೇಜರ್​ ಮಹಾಮಾಯ ಪ್ರಸಾದ್​, ಉದ್ಯಮಿ ಸಾಧು ಸಾಲಿಯಾನ್​, ಉಜ್ವಲ ಡೆವೆಲಪರ್ಸ್​ನ ಆಡಳಿತ ನಿರ್ದೇಶಕ ಪುರುಷೋತ್ತಮ್​ ಶೆಟ್ಟಿ, ಗಾಂಧಿ ಆಸ್ಪತ್ರೆಯ ಆಡಳಿತ ನಿರ್ದೇಶಕ ಹರಿಶ್ಚಂದ್ರ ಎಂ., ಮುನಿಯಾಲು ಉದಯಕುಮಾರ್​ ಶೆಟ್ಟಿ, ಜೈಪ್ರಕಾಶ್​ ಕೆದ್ಲಾಯ, ಹೈಟೆಕ್​ ಆಸ್ಪತ್ರೆಯ ಆಡಳಿತ ನಿರ್ದೇಶಕ ಡಾ. ಟಿ.ಎಸ್​. ರಾವ್​, ಬಿಜೆಪಿ ಮಂಗಳೂರು ವಿಭಾಗ ಪ್ರಭಾರಿ ಉದಯಕುಮಾರ್​ ಶೆಟ್ಟಿ, ರೋಬೋ ಸಾಫ್ಟ್​ನ ಕೃಷ್ಣ ರಾವ್​, ಅಖಿಲ ಭಾರತ ಮಾಧ್ವ ಮಹಾಮಂಡಳಿಯ ಅಧ್ಯಕ್ಷ ಎಚ್​.ವಿ. ಗೌತಮ್​, ಶೀರೂರು ಮಠದ ದಿವಾನ ಡಾ.ಉದಯಕುಮಾರ್​ ಸರಳತ್ತಾಯ, ಸ್ವಾಗತ ಸಮಿತಿಯ ಪ್ರಧಾನ ಕಾರ್ಯದರ್ಶಿ ರತ್ನಾಕರ್​ ಹೆಗ್ಡೆ ಮಟ್ಟಾರು ಉಪಸ್ಥಿತರಿದ್ದರು.

ಶೀರೂರು ಮಠದ ಶಿಷ್ಯರು ವೇದಘೋಷ ಪಠಿಸಿದರು. ಉತ್ತರಾದಿ ಮಠದ ಪ್ರಕಾಶ್​ ಆಚಾರ್ಯ ಮಧ್ವಾಚಾರ್ಯರ ಕುರಿತು ಪ್ರಾಸ್ತಾವಿಕವಾಗಿ ಮಾತನಾಡಿದರು. ಶೀರೂರು ಪರ್ಯಾಯ ಹೊರಕಾಣಿಕೆ ಸಮಿತಿಯ ಸಂಚಾಲಕ ಸುಪ್ರಸಾದ್​ ಶೆಟ್ಟಿ ಬೈಕಾಡಿ ಕಾರ್ಯಕ್ರಮ ನಿರೂಪಿಸಿದರು.

"