ಉಡುಪಿ: ಕರ್ನಾಟಕ ಗಮಕ ಕಲಾ ಪರಿಷತ್​ ಉಡುಪಿ ಜಿಲ್ಲಾ ಘಟಕ ಮತ್ತು ಅಭಿಜ್ಞಾನ ಕಲಾಧಾಮ ಸಹಯೋಗದಲ್ಲಿ ಉಡುಪಿಯ ಯಕ್ಷಗಾನ ಕಲಾರಂಗದ ಇನ್ಫೋಸಿಸ್​ ಸಭಾಂಗಣದಲ್ಲಿ ಇತ್ತೀಚೆಗೆ ಮಧುಮಾಸದ ಸಂಜೆ (ಸಾಹಿತ್ಯ, ಸಂಗೀತ, ಭಾವಪರ್ವ) ಕಾರ್ಯಕ್ರಮ ನಡೆಯಿತು.

ಯಕ್ಷಗಾನ ಕಲಾರಂಗದ ಉಪಾಧ್ಯಕ್ಷ ಎಂ.ನಾರಾಯಣ ಹೆಗಡೆ ಉದ್ಘಾಟಿಸಿದರು. ಕರ್ನಾಟಕ ಗಮಕ ಕಲಾ ಪರಿಷತ್​ ಉಡುಪಿ ಜಿಲ್ಲಾಧ್ಯಕ್ಷ ಸತೀಶ್​ ಕುಮಾರ್​ ಕೆಮ್ಮಣ್ಣು, ಅಭಿಜ್ಞಾನ ಕಲಾಧಾಮದ ತುಳಸೀದಾಸ್​ ಉಪಸ್ಥಿತರಿದ್ದರು. 

ವಿದ್ವಾನ್​ ನಟರಾಜ್​ ಎಚ್​.ಎನ್​. ಅವರು ಕೆ.ಎಸ್​. ನರಸಿಂಹಸ್ವಾಮಿ ರಚಿತ ಕವಿತೆ ಸಹಿತ 'ವಸಂತ ಗೀತೆ'ಗಳನ್ನು ಸುಶ್ರಾವ್ಯವಾಗಿ ಹಾಡಿದರು. ಶರತ್​ ಕುಮಾರ್​ ನಾಡ ಹಿಂದೂಸ್ಥಾನಿ ಸಂಗೀತದಲ್ಲಿ ರಾಗ್​ ಮಧುವಂತಿಯಿಂದ ಆರಂಭಿಸಿ ವಿವಿಧ ಭಜನೆ ಪ್ರಸ್ತುತಪಡಿಸಿದರು. ಹಾಮೋರ್ನಿಯಂನಲ್ಲಿ ಪ್ರಣಾದ್​ ರಾವ್​, ತಬಲಾದಲ್ಲಿ ಶಶಿಕಿರಣ್​ ಮಣಿಪಾಲ ಸಾಥ್​ ನೀಡಿದರು.

ಪಲ್ಲವಿ ಕೆದ್ಲಾಯ ಅವರು 'ಶ್ರೀರಾಮ ನಿರ್ಯಾಣ'ದ ಗಮಕ ವಾಚನ ಹಾಗೂ ಡಾ.ರಾಘವೇಂದ್ರ ರಾವ್​ ವ್ಯಾಖ್ಯಾನ ಮಾಡಿದರು. ಸಂಗೀತ ಕ್ಷೇತ್ರದ ಸಾಧಕರಾದ ತುಳಸೀದಾಸ್​, ಗಮಕ ಕಲಾವಿದೆ ಉಮಾ ಮಂಜುನಾಥ್​, ಹಿಂದೂಸ್ಥಾನಿ ಉದಯೋನ್ಮುಖ ಕಲಾವಿದ ಶರತ್​ ಕುಮಾರ್​ ನಾಡ ಅವರನ್ನು ಗೌರವಿಸಲಾಯಿತು. 

ಜಾಹ್ನವಿ ಪ್ರಾರ್ಥಿಸಿದರು. ಕರ್ನಾಟಕ ಗಮಕ ಕಲಾ ಪರಿಷತ್​ ಉಡುಪಿ ತಾಲೂಕು ಅಧ್ಯಕ್ಷ ಪ್ರೊ. ಎಂ.ಎಲ್​. ಸಾಮಗ ಸ್ವಾಗತಿಸಿದರು. ಸಂಸ್ಕೃತಿ ಪ್ರಭಾಕರ್​, ಸಂಹಿತಾ ಜಿ.ಪಿ. ಕಾರ್ಯಕ್ರಮ ನಿರೂಪಿಸಿದರು. ಕೃಷ್ಣಕುಮಾರ್​ ವಂದಿಸಿದರು.