ಉಡುಪಿ: ಯಾವುದೇ ಸಂಘ&ಸಂಸ್ಥೆಗಳ ಅಭಿವೃದ್ಧಿ, ಉದ್ಧಾರ ಅಥವಾ ಸಾಮಾಜಿಕ ಸೇವೆಯ ಕಾರ್ಯಕ್ಕೆ ಒಗ್ಗಟ್ಟು ಅತ್ಯಗತ್ಯ. ಮಕ್ಕಳು ಹಾಗೂ ಯುವಜನರು ತುಳು ಭಾಷೆ, ಸಂಸ್ಕೃತಿ ಮೈಗೂಡಿಸಿಕೊಳ್ಳಬೇಕು. ತುಳು ಸಹಿತ ವಿವಿಧ ಭಾಷೆ ಕಲಿಕೆಯಿಂದ ಜ್ಞಾನ ಗಳಿಸಿಕೊಳ್ಳಬೇಕು. ಕಲಿಕೆಯ ಮನೋಭಾವವಿದ್ದರೆ ಎಲ್ಲ ಕೆಲಸವೂ ಸುಲಭ ಎಂದು ಲಯನ್ಸ್​ 316ಸಿ ಇದರ ಕ್ಯಾಬಿನೆಟ್​ ಪದಾಧಿಕಾರಿ ಜಯಲಕ್ಷ್ಮೀ ಅಮೀನ್​ ತಿಳಿಸಿದರು.

ಉಡುಪಿಯ ಬಡಗಬೆಟ್ಟು ಕ್ರೆಡಿಟ್​ ಕೋ&ಆಪರೇಟಿವ್​ ಸೊಸೈಟಿಯ ಜಗನ್ನಾಥ ಸಭಾಂಗಣದಲ್ಲಿ ಉಡುಪಿ ತುಳುಕೂಟ, ಜಿಲ್ಲಾ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ತುಳುನಾಡ ಧ್ವನಿ ಸಹಭಾಗಿತ್ವದಲ್ಲಿ ಶನಿವಾರ (ಜು.4) ಆಯೋಜಿಸಿದ್ದ 'ಮದರೆಂಗಿದ ರಂಗ್​' ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಕಾರ್ಯಕ್ರಮದ ಅತಿಥಿ ಶೋಭಾ ಅವರ ಕೈಗೆ ಮದರಂಗಿ ಹಾಕುವ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆ ನೀಡಲಾಯಿತು.

ಬಡಗಬೆಟ್ಟು ಕ್ರೆಡಿಟ್​ ಕೋ-ಆಪರೇಟಿವ್​ ಸೊಸೈಟಿಯ ಎಜಿಎಂ ಪ್ರವೀಣ್​ ಪೂಜಾರಿ ಮಾತನಾಡಿದರು. ಸುಕನ್ಯಾ ಶೇಖರ್​ ಸ್ವಾಗತಿಸಿದರು. ಗಂಗಾಧರ್​ ಕಿದಿಯೂರು ವಂದಿಸಿದರು. ಯಶೋದಾ ಕೇಶವ ಕಾರ್ಯಕ್ರಮ ನಿರೂಪಿಸಿದರು.

"

ಸೌಂದರ್ಯ ಪ್ರಜ್ಞೆ ಹಾಗೂ ಆರೋಗ್ಯಕ್ಕೆ ಪೂರಕವಾದ ಕಾರ್ಯಕ್ರಮವಿದು. ಮಾರುಕಟ್ಟೆಗಳಲ್ಲಿ ಲಭಿಸುವ ಮದರಂಗಿ ಪ್ಯಾಕ್​ (ಕೋನ್​) ರಾಸಾಯನಿಕಯುಕ್ತವಾಗಿವೆ. ಬಹುತೇಕ ಪ್ಯಾಕ್​ಗಳಲ್ಲಿ ಬಣ್ಣ ಮಿಶ್ರಿತ ಮಾಡಿರುತ್ತಾರೆ. ಆದರೆ, ಇದು ಮದರಂಗಿ ಸೊಪ್ಪು ಅರೆದು ಮಾಡಿದ್ದಾಗಿದೆ. ಮಹಿಳೆಯರು ಮದರಂಗಿ ಹಚ್ಚಿಕೊಳ್ಳುವುದು ನಮ್ಮ ಸಂಪ್ರದಾಯ, ಆಚರಣೆಯೂ ಆಗಿದೆ.

— ಭುವನ ಪ್ರಸಾದ್​ ಹೆಗ್ಡೆ. ಕಾರ್ಯಕ್ರಮದ ಸಂಘಟಕ.