ಉಡುಪಿ: ರಾಜ್ಯದ ವಿವಿಧ ಭಾಗಗಳಲ್ಲಿ ನೀರಿನಲ್ಲಿ ಮುಳುಗಿದವರ ರಕ್ಷಣೆ ಕಾರ್ಯಾಚರಣೆ ಅಥವಾ ಶವ ಮೇಲೆತ್ತುವ ಕಾರ್ಯದ ಮೂಲಕ ಈಶ್ವರ್​ ಮಲ್ಪೆ ಅವರು ನೋವಿನಲ್ಲಿರುವ ಕುಟುಂಬದವರ ಕಣ್ಣೀರು ಒರೆಸುವ ಕೆಲಸ ಮಾಡುತ್ತಿದ್ದಾರೆ. ಕಷ್ಟದಲ್ಲಿರುವವರ ನೋವಿಗೆ ದನಿಯಾಗುವ ಅವರು ಅನುಭವಿಸುವ ಕಷ್ಟ ನಿವಾರಿಸುವುದು ಮಾನವೀಯತೆಯಾಗಿದೆ. ಅಂತಹ ಸೇವೆಯನ್ನು ದೇವರೂ ಸಹ ಮೆಚ್ಚುತ್ತಾನೆ ಎಂದು ಸಂತ ಅನ್ನಮ್ಮ ಚರ್ಚ್​ನ ಧರ್ಮಗುರು ವಂ. ಡೆನಿಸ್​ ಡೆಸಾ ಅಭಿಪ್ರಾಯಪಟ್ಟರು.

ಮಲ್ಪೆಯ ತೊಟ್ಟಂ ಚರ್ಚ್​ನ ಆವರಣದಲ್ಲಿ ಮಂಗಳೂರಿನ ಮೈಕಲ್​ ಡಿಸೋಜಾ ಚಾರಿಟೇಬಲ್​ ಟ್ರಸ್ಟ್​ ವತಿಯಿಂದ ಮುಳುಗು ತಜ್ಞ ಈಶ್ವರ್​ ಮಲ್ಪೆ ಅವರಿಗೆ ಭಾನುವಾರ (ಮಾ.8) ನೀಡಿದ ಸುಮಾರು 7 ಲಕ್ಷ ರೂ. ವೆಚ್ಚದ ನೀರಿನಡಿ ಮುಳುಗಿ ಜೀವರಕ್ಷಣೆ ಕಾರ್ಯಕ್ಕೆ ಬಳಸುವ ಸಂವಹನ ಸಾಧನ ಹಸ್ತಾಂತರಿಸಿ ಮಾತನಾಡಿದರು.

ಈಶ್ವರ್​ ಮಲ್ಪೆ ಮಾತನಾಡಿ, ನೀರಿಗೆ ಬಿದ್ದು ಮೃತಪಟ್ಟವರ ದೇಹ ತೆಗೆಯಲು ಕೆಲವೊಮ್ಮೆ 30ರಿಂದ 40 ಅಡಿ ಆಳಕ್ಕೆ ಹೋಹಬೇಕಾಗುತ್ತದೆ. ಈ ಸಂದರ್ಭದಲ್ಲಿ ನನಗೆ  ಸಹಕರಿಸಲು ಮೇಲೆ ನಿಂತವರ ಜತೆ ಸಂಪರ್ಕ ಮಾಡಲು ಹಗ್ಗದ ವ್ಯವಸ್ಥೆ ಮಾಡಿಕೊಳ್ಳುತ್ತಿದ್ದೆವು. ಆದರೆ, ಇದು ಸೂಕ್ತ ವ್ಯವಸ್ಥೆ ಅಲ್ಲ. ಎಷ್ಟೋ ಬಾರಿ ನನ್ನ ಜೀವಕ್ಕೂ ಅಪಾಯವಾಗಿದ್ದು, ಜನರ ಪ್ರಾರ್ಥನೆ ಮತ್ತು ಹಾರೈಕೆಯಿಂದ ಸುರಕ್ಷಿತವಾಗಿ ಮೇಲೆ ಬರಲು ಸಾಧ್ಯವಾಗಿದೆ. ಮೈಕಲ್​ ಡಿಸೋಜಾ ಅವರ ಕೊಡುಗೆ, ಹೃದಯ ವೈಶಾಲ್ಯತೆಗೆ ಧನ್ಯವಾದ ಸಲ್ಲಿಸುತ್ತೇನೆ ಎಂದರು.

ಉಜ್ವಾಡ್​ ಪತ್ರಿಕೆಯ ಸಂಪಾದಕ ವಂ.ಆಲ್ವಿನ್​ ಸಿಕ್ವೇರಾ, ಸ್ಥಳೀಯ ಕಾನ್ವೆಂಟ್​ನ ಸುಪೀರಿಯರ್​ ಸಿಸ್ಟರ್​ ಸುಶ್ಮಾ, ಚಾರಿಟೇಬಲ್​ ಟ್ರಸ್ಟ್​ನ ಸದಸ್ಯರಾದ ಸ್ವೀವನ್​ ಪಿಂಟೊ, ಚರ್ಚ್​ ಪಾಲನಾ ಸಮಿತಿಯ ಕಾರ್ಯದರ್ಶಿ ಲವೀನಾ ಫೆರ್ನಾಂಡಿಸ್​, 20 ಆಯೋಗಗಳ ಸಂಚಾಲಕಿ ಶಾಂತಿ ಫೆರ್ನಾಂಡಿಸ್​, ಚರ್ಚ್​ನ ಸ್ತ್ರೀ ಸಂಘಟನೆಯ ಅಧ್ಯೆ ಪ್ರಿಯಾ ರೊಡ್ರಿಗಸ್​, ಈಶ್ವರ್​ ಮಲ್ಪೆ ತಂಡದ ಸದಸ್ಯರು ಉಪಸ್ಥಿತರಿದ್ದರು.

"