ಬೆಳ್ಳಚ್ಚಾರಲ್ಲಿ ಅಂಡರ್‌ಪಾಸ್ ನಿರ್ಮಾಣವಾಗಲಿ

ಚತುಷ್ಪಥವಾಗಿ ವಿಸ್ತರಣೆಗೊಳ್ಳುತ್ತಿರುವ ರಾಷ್ಟ್ರೀಯ ಹೆದ್ದಾರಿ 169ರ ಮಿಜಾರು ಹಳೇ ಚೆಕ್‌ಪೋಸ್ಟ್‌ಗೆ ಹತ್ತಿರದ ಬೆಳ್ಳಚ್ಚಾರಿನಲ್ಲಿ ಅಂಡರ್‌ಪಾಸ್ ನಿರ್ಮಿಸಬೇಕು, ಅಲ್ಲಿಯವರೆಗೆ ಹೆದ್ದಾರಿ ದಾಟಲು ಸಾರ್ವಜನಿಕರಿಗೆ ಸೂಕ್ತ ಹಾಗೂ ಸುರಕ್ಷಿತ ವ್ಯವಸ್ಥೆ ಕಲ್ಪಿಸಬೇಕು ಎಂದು ಆಗ್ರಹಿಸಿ ಮಂಗಳವಾರ ಸಾರ್ವಜನಿಕರು ಬೆಳ್ಳಚ್ಚಾರಿನಲ್ಲಿ ಬೃಹತ್ ಪ್ರತಿಭಟನೆ ನಡೆಸಿದರು.

ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದ ಮುಖಂಡ ಜಗದೀಶ ಅಧಿಕಾರಿ ಮಾತನಾಡಿ, ದಿನನಿತ್ಯ ಸಾವಿರಾರು ನಾಗರಿಕರು, ಶಾಲಾ ಮಕ್ಕಳು ಸಂಚರಿಸುವ ಇಲ್ಲಿ ರಸ್ತೆ ದಾಟಲು ಅಂಡರ್‌ಪಾಸ್ ನಿರ್ಮಿಸಬೇಕು. ಹೆದ್ದಾರಿ ಅವಾಂತರದಿಂದ ಸ್ಥಳೀಯರು ಒಂದೂವರೆ ಕಿ.ಮೀ. ಹೆಚ್ಚುವರಿ ಅಂತರ ಕ್ರಮಿಸಬೇಕಿದೆ. ಇಲ್ಲಿ ಅಪಘಾತಗಳೂ ಹೆಚ್ಚುತ್ತಿವೆ ಎಂದು ಆರೋಪಿಸಿದರು.

ಪ್ರತಿಭಟನಾ ಸ್ಥಳಕ್ಕೆ ಆಗಮಿಸಿದ ಮಂಗಳೂರು ಉತ್ತರ ಶಾಸಕ ಡಾ.ಭರತ್ ಶೆಟ್ಟಿ ಪ್ರತಿಭನಕಾರರೊಂದಿಗೆ ಮಾತುಕತೆ ನಡೆಸಿದ ಬಳಿಕ ಮಾಧ್ಯಮದೊಂದಿಗೆ ಮಾತನಾಡಿ, ಬೆಳ್ಳಚ್ಚಾರಿನಲ್ಲಿ ಹೆದ್ದಾರಿ ದಾಟಲು ಸೂಕ್ತ ವ್ಯವಸ್ಥೆ ಕಲ್ಪಿಸುವಂತೆ ಹೆದ್ದಾರಿ ವಿಭಾಗದ ಅಧಿಕಾರಿಗಳಿಗೆ ಸೂಚಿಸಿದ್ದೇನೆ. ಅಂಡರ್‌ಪಾಸ್ ನಿರ್ಮಾಣದ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಹೆದ್ದಾರಿಗೆ ಹೈಮಾಸ್ಟ್ ದೀಪ ಅಳವಡಿಕೆ, ಹೆದ್ದಾರಿ ದಾಟಲು ಅನುಕೂಲವಾಗುವಂತೆ ಬ್ಯಾರಿಕೇಡ್ ಅಳವಡಿಸುವಂತೆ ಸಂಬಂಧಪಟ್ಟ ಇಲಾಖಾ ಅಧಿಕಾರಿಗಳೊಂದಿಗೆ ಮಾತುಕತೆ ನಡೆಸಲಿದ್ದೇನೆ ಎಂದರು.

ಜಿಪಂ ಮಾಜಿ ಸದಸ್ಯ ಜನಾರ್ದನ ಗೌಡ, ಸ್ಥಳೀಯ ಮುಖಂಡರಾದ ತಾರನಾಥ ಸಾಲ್ಯಾನ್, ತಾರನಾಥ ಸಪಲಿಗ, ಚಂದ್ರಹಾಸ ಉರ್ಕಿ, ಪ್ರಸಾದ್ ಎಡಪದವು, ವಸಂತ ಕಿಂಡೇಲು, ಸುಧಾಕರ ಪೂಂಜ, ಪ್ರದೀಪ್ ಶೆಟ್ಟಿ, ಅಶೋಕ್ ಶೆಟ್ಟಿ, ರಿಯಾಝ್, ಅಸ್ಪಾಕ್, ಚಂದ್ರಶೇಖರ, ತಾಹೀರ್, ಮೊಯ್ದಿನ್ ಬಾವ, ರಾಮಣ್ಣ ಶೆಟ್ಟಿ, ಉಮೇಶ್ ವಣಾಲ್, ಹಿಮಕರ ಕಂಡೆಮಾರ್, ಹೇಮಚಂದ್ರ ಶೆಟ್ಟಿ, ಸ್ಥಳೀಯ ಸಂಘ-ಸಂಸ್ಥೆಗಳ ಪ್ರತಿನಿಧಿಗಳು, ರಿಕ್ಷಾ ಚಾಲಕರು-ಮಾಲೀಕರು, ಮಹಿಳೆಯರು, ಕೂಲಿ ಕಾರ್ಮಿಕರು ಸಹಿತ ನೂರಾರು ಮಂದಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.

ಇಲ್ಲಿ ಈಗಾಗಲೇ ಹಲವು ಅಪಘಾತಗಳು ಸಂಭವಿಸಿವೆ. ಭಾನುವಾರ ರಾತ್ರಿ ತಿಪ್ಲಬೆಟ್ಟುವಿನ ಮೇಸ್ತ್ರಿ ರವಿ ಎಂಬುವರು ರಸ್ತೆ ದಾಟುವಾಗ ಟೆಂಪೋದಡಿಗೆ ಬಿದ್ದು(ಹಿಟ್ ಆ್ಯಂಡ್ ರನ್ ಪ್ರಕರಣ) ಸಾವನ್ನಪ್ಪಿದ್ದಾರೆ. ಈ ಪ್ರದೇಶವೀಗ ಅಪಘಾತ ವಲಯವಾಗಿ ಮಾರ್ಪಟ್ಟಿದೆ. ಇಲ್ಲಿ ದ್ವಿಚಕ್ರ-ತ್ರಿಚಕ್ರ ವಾಹನಗಳು ಹಾಗೂ ಸಾರ್ವಜನಿಕರಿಗೆ ನಡೆದಾಡಲು ಅನುಕೂಲವಾಗುವಂತಹ ಅಂಡರ್‌ಪಾಸ್ ನಿರ್ಮಿಸಬೇಕು. ಈ ಬಗ್ಗೆ ಹಿಂದೆಯೇ ಎನ್‌ಎಚ್ ಮಂಗಳೂರು ವಿಭಾಗ, ಸಂಸದ, ಶಾಸಕರಿಗೆ ಮನವಿ ಮಾಡಿಕೊಂಡಿದ್ದೆವು. ಇದುವರೆಗೆ ಸ್ಪಂದನೆ ಸಿಕ್ಕಿಲ್ಲ.

— ಶಿವಪ್ರಸಾದ್ ಶೆಟ್ಟಿ ಬಾನೊಟ್ಟು ಸ್ಥಳೀಯ ಮುಖಂಡ