ಗಂಗೊಳ್ಳಿ ಬಂದರು ಅಭಿವೃದ್ಧಿಗೆ ಚಾಲನೆ

ಕಳೆದ 3-4 ವರ್ಷಗಳಿಂದ ಎದುರಾಗಿರುವ ಮತ್ಸ್ಯಕ್ಷಾಮ, ಬಂದರು ದುಸ್ಥಿತಿ, ಮೂಲಸೌಕರ್ಯ ಕೊರತೆ, ಪ್ರಾಕೃತಿಕ ವಿಕೋಪದಿಂದ ನಲುಗಿಹೋಗಿದ್ದ ಈ ಬಂದರಿನಲ್ಲಿ ಅಭಿವೃದ್ಧಿ ಕಾಮಗಾರಿ ನಡೆಯುತ್ತಿರುವುದು ಹೊಸ ವಿಶ್ವಾಸ ಮೂಡಿಸಿದೆ. ಪ್ರಧಾನಮಂತ್ರಿ ಮತ್ಸೃಸಂಪದ ಯೋಜನೆಯಡಿ ಹಳೇ ಜೆಟ್ಟಿಯ ಸಮೀಪ ಎರಡು ಮೀನುಗಾರಿಕಾ ಪ್ರಾಂಗಣ, ಎರಡು ವಿಶ್ರಾಂತಿ ಗೃಹ ಕಟ್ಟಡ ನಿರ್ಮಾಣಕ್ಕೆ ಚಾಲನೆ ದೊರಕಿದೆ. ಬಂದರಿನ ಸುತ್ತಲೂ ಆವರಣಗೋಡೆ ರಚನೆಯಾಗಲಿದೆ.

2018ರಲ್ಲಿ ಬಂದರಿನ ಜೆಟ್ಟಿ ಕುಸಿತ ನಂತರ 12 ಕೋಟಿ ರೂ. ವೆಚ್ಚದಲ್ಲಿ 379 ಮೀ. ಉದ್ದದ ಹೊಸ ಜೆಟ್ಟಿ ಮರು ನಿರ್ಮಾಣಕ್ಕೆ ಚಾಲನೆ ನೀಡಲಾಗಿತ್ತು. 2022ರಲ್ಲಿ ನಿರ್ಮಾಣ ಹಂತದಲ್ಲೇ 50 ಮೀ. ಜೆಟ್ಟಿ ಕುಸಿದು ಕಡಲ ಸೇರಿತ್ತು. ಸರ್ಕಾರ ತಜ್ಞರನ್ನು ನೇಮಿಸಿ ವರದಿ ಪಡೆದಿತ್ತು. ಮೀನುಗಾರಿಕಾ ಸಚಿವರು ವರದಿ ಸ್ವೀಕರಿಸಿ ಪುನಃ ನಿರ್ಮಾಣಕ್ಕೆ ಹಸಿರು ನಿಶಾನೆ ತೋರಿದ್ದರು. ಜೆಟ್ಟಿ ಕಾಮಗಾರಿ ನಿರ್ವಹಿಸುತ್ತಿರುವ ಗುತ್ತಿಗೆದಾರರು ಕೆಲಸ ಆರಂಭಿಸಲೆಂದು 2023ರ ಡಿಸೆಂಬರ್‌ನಲ್ಲಿ ತಯಾರಿ ನಡೆಸಿದ್ದರು. ಈ ನಡುವೆ ಮೀನುಗಾರಿಕೆ ಇಲಾಖೆಯ ಹಿರಿಯ ಅಧಿಕಾರಿಗಳು ಭೇಟಿ ನೀಡಿ ವಿನ್ಯಾಸ ಬದಲಾಯಿಸುವಂತೆ ತಿಳಿಸಿದ್ದಲ್ಲದೆ ಸಿಐಸಿಎಫ್ ವರದಿಯಂತೆ ಕಾರ್ಯನಿರ್ವಹಿಸಬೇಕೆಂದು ಸೂಚನೆ ನೀಡಿದ್ದರಿಂದ ಕಾಮಗಾರಿ ಆರಂಭಿಸಲು ಸಾಧ್ಯವಾಗಿರಲಿಲ್ಲ.