ಉಡುಪಿ: ಕೇಂದ್ರ ಸರ್ಕಾರ ಜಾರಗೊಳಿಸಿರುವ ಎಸ್​ಐಆರ್​ ಪ್ರಕ್ರಿಯೆಯಿಂದ ದೇಶದ ಕೋಟ್ಯಂತರ ಜನರು ಸಾಂವಿಧಾನಿಕ ಮತದಾನದ ಹಕ್ಕಿನಿಂದ ವಂಚಿತರಾಗಲಿದ್ದಾರೆ. ಹೀಗಾಗಿ ಕರ್ನಾಟಕದಲ್ಲಿ ಎಸ್​ಐಆರ್​ ಪ್ರಕ್ರಿಯೆ ಜಾರಿಗೊಳಿಸದಂತೆ ಸರ್ಕಾರಕ್ಕೆ ಮನವಿ ಮಾಡಲು ಹಾಗೂ ಜನರಲ್ಲಿ ಜಾಗೃತಿ ಮೂಡಿಸಲು ಪ್ರಗತಿಪರ ಸಂಟನೆಗಳು ಮತ್ತು ಜಾತ್ಯತಿತ ಪಕ್ಷಗಳ ಒಕ್ಕೂಟದಿಂದ 'ಎಸ್​ಐಆರ್​ ವಿರೋಧಿ ಕರ್ನಾಟಕ' ವೇದಿಕೆ ರಚನೆಯಾಗಿದೆ. ಜೂ.13ರಿಂದ 18ರ ವರೆಗೆ ರಾಜ್ಯದ ಐದು ಮಾರ್ಗಗಳಲ್ಲಿ ಜನಜಾಗೃತಿ ಅಭಿಯಾನ ನಡೆಯಲಿದ್ದು, ಜೂ.20ರಂದು ಬೆಂಗಳೂರಿನಲ್ಲಿ 'ಎಸ್​ಐಆರ್​ ವಿರೋಧಿ ಬೃಹತ್​ ಪ್ರತಿರೋಧ ಸಮಾವೇಶ' ಆಯೋಜಿಸಲಾಗಿದೆ ಎಂದು ಅಭಿಯಾನದ 5ನೇ ಮಾರ್ಗದ ಸಂಚಾಲಕ ಪ್ರೊ. ಬಿ.ಎ. ಶ್ರೀಧರ್​ ಮಾಹಿತಿ ನೀಡಿದರು.

ಉಡುಪಿಯ ಪತ್ರಿಕಾ ಭವನದಲ್ಲಿ ಶನಿವಾರ (ಜೂ.13) ಸುದ್ದಿಗೋಷ್ಠಿಯಲ್ಲಿ ಅಭಿಯಾನದ ಕರಪತ್ರ ಬಿಡುಗಡೆ ಮಾಡಿ ಮಾತನಾಡಿ ಬೀದರ್​, ವಿಜಯಪುರ, ಉತ್ತರ ಕನ್ನಡ, ತುಮಕೂರು ಹಾಗೂ ಉಡುಪಿ ಜಿಲ್ಲೆ ಈ ಐದು ಮಾರ್ಗಗಳ ಮೂಲಕ ಸಂಪೂರ್ಣ ರಾಜ್ಯದಲ್ಲಿ ಎಸ್​ಐಆರ್​ನಿಂದ ಆಗಲಿರುವ ತೊಡಕುಗಳ ಕುರಿತು ಜನಜಾಗೃತಿ ಮೂಡಿಸಲಿದ್ದೇವೆ ಎಂದರು.

ಎಸ್​ಐಆರ್​ ಪ್ರಕ್ರಿಯೆಯಿಂದ ಮತದಾನದ ಹಕ್ಕು ಕಳೆದುಕೊಂಡವರಿಗೆ ಈ ದೇಶದ ಪ್ರಜೆಗಳಾಗಿರಲು ಸಾಧ್ಯವಿಲ್ಲವೇ ಎಂಬ ಪ್ರಶ್ನೆ ಉದ್ಭವಿಸಿದೆ. ಚುನಾವಣಾ ಆಯೋಗ ಕೇಂದ್ರ ಸರ್ಕಾರದ ಮುಖವಾಣಿಯಂತೆ ಕಾರ್ಯನಿರ್ವಹಿಸುತ್ತಿದೆ. ಇದರಿಂದ ದೇಶದ ಪ್ರಜಾಪ್ರಭುತ್ವ ತೀವ್ರವಾಗಿ ಬದಲಾಗುವ ಆತಂಕವಿದೆ. ಇದು ರಕ್ತರಹಿತ ಜನಾಂಗೀಯ ಹತ್ಯೆಯಾಗಿದೆ. ಮತದಾರರ ಪಟ್ಟಿ ಪರಿಷ್ಕರಣೆ ಕಾರ್ಯ ಸರ್ಕಾರದ್ದೇ ಹೊರತು ಚುನಾವಣಾ ಆಯೋಗದ್ದಲ್ಲ. ಈ ವಿಚಾರವಾಗಿ ನ್ಯಾಯಾಲಯವೂ ಸಹ ಜನರ ಸಹಕಾರಕ್ಕೆ ಬರುವ ಸಾಧ್ಯತೆ ಇಲ್ಲ. ಹೀಗಾಗಿ ಎಸ್​ಐಆರ್​ ವಿರೋಧಕ್ಕೆ ಜನಜಾಗೃತಿಯೇ ಆಧಾರವಾಗಿದೆ ಎಂದರು. 

ಸಹಬಾಳ್ವೆಯ ಪ್ರಮುಖ ಪ್ರೊ. ಕೆ.ಣಿರಾಜ್​ ಮಾತನಾಡಿ, ಎಸ್​ಐಆರ್​ ಪ್ರಕ್ರಿಯೆಯು ಅಸಂವಿಧಾನಿಕ ಕಾರ್ಯವಾಗಿದೆ.ಪೌರತ್ವ ಸಾಬೀತುಪಡಿಸಲು 11 ಬಗೆಯ ದಾಖಲೆ ಕೇಳಲಾಗಿದೆ. ಇದರಿಂದ ದೇಶದಲ್ಲಿರುವ ಶೇ.70ರಷ್ಟು ಇರುವ ದಲಿತರು, ಕೂಲಿ ಕಾರ್ಮಿಕರು, ಬುಡಕಟ್ಟು ಹಾಗೂ ಇನ್ನಿತರ ಜನಾಂಗದವರಿಗೆ ಮತದಾನದ ಹಕ್ಕು ತಪ್ಪಿಹೋಗುವ ಸಾಧ್ಯತೆ ಇದೆ. ರಾಜ್ಯದಲ್ಲಿ ಕೂಡಲೇ ಎಸ್​ಐಆರ್​ ಪ್ರಕ್ರಿಯೆ ನಿಲ್ಲಿಸಬೇಕು. ಇಲ್ಲದಿದ್ದಲ್ಲಿ ಇದು ಸಂವಿಧಾನದಲ್ಲಿ ಮಾರಕವಾಗಲಿರುವ ವಿಕೋಪವಾಗಲಿದೆ. ದೇಶದ ಶೇ.10 ಜನ ಈಗಾಗಲೇ ಎಸ್​ಐಆರ್​ ವಿಕೋಪದಿಂದ ಸಂತ್ರಸ್ತರಾಗಿದ್ದಾರೆ ಎಂದರು.

ಸುದ್ದಿಗೋಷ್ಠಿಯಲ್ಲಿ ಪ್ರಶಾಂತ್​ ಜತ್ತನ್ನ, ಶ್ಯಾಮರಾಜ್​ ಬಿರ್ತಿ, ಸುಂದರ್​ ಮಾಸ್ಟರ್​, ಶಶಿಧರ್​ ಗೊಲ್ಲ, ಇದ್ರೀಸ್​ ಹೂಡೆ ಇದ್ದರು.