ಚಿಲಿಂಬಿಯಲ್ಲಿ ಭೂಕುಸಿತ ಭೀತಿ

ಮೃದುವಾದ ಶಿಲೆ, ಸಡಿಲ ಮಣ್ಣಿನ ರಚನೆ ಹಾಗೂ ಮಳೆನೀರು ಹರಿದು ಹೋಗಲು ಸಮರ್ಪಕ ಚರಂಡಿ ವ್ಯವಸ್ಥೆ ಇಲ್ಲದಿರುವುದು ಪ್ರದೇಶವನ್ನು ಮತ್ತಷ್ಟು ಅಸ್ಥಿರಗೊಳಿಸಿದೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.

ಗುಡ್ಡವನ್ನು ಸುರಕ್ಷಿತ ಇಳಿಜಾರಿನ ಬದಲಿಗೆ ವರ್ಟಿಕಲ್ ರೀತಿಯಲ್ಲಿ ಕತ್ತರಿಸಿರುವುದರಿಂದ ಮಣ್ಣಿನ ಗೋಡೆ ದೃಢ ಆಧಾರವಿಲ್ಲದೆ ನಿಂತಿದ್ದು, ಕುಸಿತದ ಸಾಧ್ಯತೆ ಹೆಚ್ಚಿದೆ ಎನ್ನಲಾಗಿದೆ. ಮೇಲ್ಭಾಗದಲ್ಲಿ ಮೃದುವಾದ ಶಿಲೆ, ಸಡಿಲ ಕೆಂಪು ಮಣ್ಣು ಹಾಗೂ ಮುರಕಲ್ಲುಗಳ ಮಿಶ್ರಣ ಇರುವುದರಿಂದ ರಚನೆಗೆ ಸ್ಥಿರತೆ ಇಲ್ಲ ಎಂದು ಸ್ಥಳೀಯರು ದೂರಿದ್ದಾರೆ.

ಈ ರಸ್ತೆಯಲ್ಲಿ ಸಂಚರಿಸುವ ವಾಹನ ಸವಾರರು, ವಿಶೇಷವಾಗಿ ದ್ವಿಚಕ್ರ ವಾಹನ ಸವಾರರು, ಹೆಚ್ಚಿನ ಅಪಾಯ ಎದುರಿಸುತ್ತಿದ್ದಾರೆ. ಗುಡ್ಡ ಕುಸಿದರೆ ಸಾರ್ವಜನಿಕರ ಜೀವಕ್ಕೆ ಅಪಾಯ ಉಂಟಾಗುವ ಸಾಧ್ಯತೆ ಇದೆ ಎಂಬ ಆತಂಕವೂ ವ್ಯಕ್ತವಾಗಿದೆ.

ಜಿಲ್ಲಾಡಳಿತ, ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ತಕ್ಷಣ ಕಾರ್ಯಪ್ರವೃತ್ತರಾಗಿ ಮಳೆಗಾಲ ಮುಗಿಯುವವರೆಗೆ ಕಲ್ಲಿನ ಮುಖಕ್ಕೆ ಕಬ್ಬಿಣದ ನೆಟ್ ಅಳವಡಿಸುವುದು ಅಥವಾ ತಾತ್ಕಾಲಿಕ ತಡೆಗೋಡೆ ನಿರ್ಮಿಸಬೇಕು. ಅಲ್ಲಿಯವರೆಗೆ ವಾಹನ ಸವಾರರು ಗರಿಷ್ಠ ಎಚ್ಚರಿಕೆಯಿಂದ ಸಂಚರಿಸಬೇಕು ಎಂದು ಸ್ಥಳೀಯರು ತಿಳಿಸಿದ್ದಾರೆ.