ಉಡುಪಿ: ಸಂಗೀತ ಮತ್ತು ನೃತ್ಯದಂತಹ ಕಲೆಗಳು ದೈಹಿಕ ಹಾಗೂ ಮಾನಸಿಕ ಆರೋಗ್ಯ ವೃದ್ಧಿಗೆ ಪೂರಕ. ಅಮ್ಮನ ಲಾಲಿ ಹಾಡಿನ ಮೂಲಕವೇ ಮಗು ಮೊದಲಿಗೆ ಸಂಗೀತವನ್ನು ಗ್ರಹಿಸಲು ಆರಂಭಿಸುತ್ತದೆ. ಅರಿವಿಲ್ಲದಂತೆಯೇ ನಮ್ಮನ್ನು ಹಿಡಿದಿಟ್ಟುಕೊಳ್ಳುವ ಅಪಾರ ಶಕ್ತಿ ಸಂಗೀತಕ್ಕಿದೆ. ಎಲ್ಲರೂ ಕಲಾವಿದರಾಗಲು ಸಾಧ್ಯವಿಲ್ಲದಿದ್ದರೂ ನಿತ್ಯ ಮನೆಯಲ್ಲಿ ಭಜನೆ ಮಾಡುವುದರಿಂದ ವ್ಯಕ್ತಿತ್ವ ಸದೃಢಗೊಂಡು ಮಾನವೀಯ ಮೌಲ್ಯ ವೃದ್ಧಿಸುತ್ತದೆ ಎಂದು ಮನೋವೈದ್ಯ ಡಾ. ವಿರೂಪಾಕ್ಷ ದೇವರಮನೆ ಅಭಿಪ್ರಾಯಪಟ್ಟರು.

ಮಣಿಪಾಲದ ಸರಳೇಬೆಟ್ಟಿನಲ್ಲಿರುವ ರತ್ನ ಸಂಜೀವ ಕಲಾ ಮಂಡಳದಲ್ಲಿ ಶಿವಪ್ರೇರಣಾ ಚಾರಿಟೇಬಲ್​ ಟ್ರಸ್ಟ್​ ವತಿಯಿಂದ ಆಯೋಜಿಸಿದ್ದ ವಿದ್ಯಾರ್ಥಿಗಳ ಕಲಾ ಪ್ರತಿಭೆ ಅನಾವರಣದ 'ಕಲಾ ಕುಂಭ-2026' ಹಾಗೂ 'ಗುರು ವಂದನಾ' ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ವಿದ್ವಾನ್​ ಯಶವಂತ್​ ಎಂ.ಜಿ. ಹಾಗೂ ವಿದುಷಿ ದೀಕ್ಷಾ ವಿ. ಮಾತನಾಡಿ, ಸಮಾಜದಲ್ಲಿ ವಿವಿಧ ಕಲೆಗಳಿಂದ ಸಕಾರಾತ್ಮಕ ಪರಿವರ್ತನೆ ಸಾಧ್ಯವಿದೆ. ಗುರುವಿನ ಅನುಗ್ರಹದಿಂದ ಸಕಲವೂ ಸಾಧ್ಯವಾಗಲಿದೆ. ಪ್ರತಿ ಮಗುವಿನಲ್ಲೂ ಯಾವುದಾದರೊಂದು ಪ್ರತಿಭೆ ಇದ್ದೇ ಇರುತ್ತದೆ. ಮಕ್ಕಳನ್ನು ಇತರ ಮಕ್ಕಳಿಗೆ ಹೋಲಿಸದೆ ಸೂಕ್ತ ಪ್ರೋತ್ಸಾಹ ನೀಡಿದರೆ ಅವರಿಗೂ ಸಾಧನೆ ಸುಲಭವಾಗುತ್ತದೆ ಎಂದರು. 

ಮಾಹೆಯ ಎಚ್​ಆರ್​ ಮೆನೇಜರ್​ ರತನ್​ ರೈ, ಟ್ರಸ್ಟ್​ನ ಕಾರ್ಯದರ್ಶಿ ಅಶ್ವಿನಿ ಮಹೇಶ್​ ಠಾಕೂರ್​, ರಮಾನಂದ್​ ಸಾಮಂತ್​ ಉಪಸ್ಥಿತರಿದ್ದರು. 

ವಿದುಷಿ ಉಷಾ ಹೆಬ್ಬಾರ್​ ಪ್ರಾರ್ಥಿಸಿದರು. ಶಿವಪ್ರೇರಣಾ ಚಾರಿಟೇಬಲ್​ ಟ್ರಸ್ಟ್​ನ ಅಧ್ಯಕ್ಷ ಮಹೇಶ್​ ಠಾಕೂರ್​ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ಮಹೇಶ್​ ನಾಯಕ್​ ಕಾರ್ಯಕ್ರಮ ನಿರೂಪಿಸಿದರು. ಸುಮತಿ ಎಂ, ಕಾಮತ್​ ವಂದಿಸಿದರು.