ಸುಗ್ಗಿ ಕೃಷಿ ಕಾರ್ಯಕ್ಕೆ ನೀರಾ‘ವರಿ’

ಸೌಕೂರು ಏತನೀರಾವರಿ ಯೋಜನೆ ಘಟಕ

Published on:

13 Dec 2025, 2:41 pm

ರಾಘವೇಂದ್ರ ಪೈ ಕುಂದಾಪುರ

ಮಳೆಗಾಲ ಮುಗಿದ ಬಳಿಕ ಹಿಂಗಾರಿನ ಎರಡನೇ ಬೆಳೆ (ಸುಗ್ಗಿ ಕೃಷಿ) ಮಾಡಲು ಉತ್ಸುಕರಾಗಿದ್ದ ಬೇಸಾಯಗಾರರು ಈಗ ಆತಂಕಪಡುವ ಸ್ಥಿತಿ ನಿರ್ಮಾಣವಾಗಿದೆ. ರೈತರಿಗೆ ವರವಾಗಬೇಕಿದ್ದ ಸೌಕೂರು ಏತನೀರಾವರಿ ಯೋಜನೆ ಊಟಕ್ಕಿಲ್ಲದ ಉಪ್ಪಿನಕಾಯಿಯಂತಾಗಿದೆ. ಮೆಸ್ಕಾಂಗೆ 2 ಕೋಟಿ ರೂಪಾಯಿಗೂ ಅಧಿಕ ಬಿಲ್ ಬಾಕಿಯಿರಿಸಿರುವ ಕಾರಣಕ್ಕೆ ವಿದ್ಯುತ್ ಸಂಪರ್ಕ ಕಡಿತಗೊಳಿಸಿದೆ. ಇಲಾಖೆಗಳ ನಡುವಿನ ಸಮನ್ವತೆ ಕೊರತೆಯಿಂದ ರೈತಾಪಿ ವರ್ಗದ ಜನರು ತೊಂದರೆ ಅನುಭವಿಸುವಂತಾಗಿದೆ.

ಜಲಮೂಲ ಬರಿದಾಗುವ ಆತಂಕ

ಹಲವಾರು ವರ್ಷಗಳಿಂದ ಕೃಷಿ ಕಾರ್ಯ ಮಾಡಲು ಪರಿತಪಿಸುತ್ತಿದ್ದವರಿಗೆ ಸೌಕೂರು ಏತನೀರಾವರಿ ಯೋಜನೆ ಒಂದು ವರ್ಷ ನೆರವಾಗಿತ್ತು. ತಾಂತ್ರಿಕ ವ್ಯವಸ್ಥೆಗಳ ಜತೆಗೆ ಕೆರೆ-ಕಟ್ಟೆಗಳು, ನೈಸರ್ಗಿಕ ಕಾಲುವೆ-ತೋಡುಗಳ ಮೂಲಕ ಹರಿಯುವ ನೀರು ರೈತರ ಬಾಳು ಹಸನು ಮಾಡುವ ನಿರೀಕ್ಷೆಯಲ್ಲಿದ್ದವರಿಗೆ ಈ ಬಾರಿ ಬರಸಿಡಿಲು ಬಡಿದಂತಾಗಿದೆ. ಸುಗ್ಗಿ ಕೃಷಿ ಕಾರ್ಯಕ್ಕೆ ಪ್ರಸಕ್ತ ಸಮಯವೆಂದು ಗದ್ದೆಗಿಳಿದವರಿಗೆ ನೀರು ಮರೀಚಿಕೆಯಾಗಿದೆ. ಕೆಲವಷ್ಟು ಕಡೆ ನೀರು ಕಟ್ಟಿದ್ದರಿಂದ ಗದ್ದೆಗಳಲ್ಲಿ ನೀರಿದ್ದರೂ ತಿಂಗಳಾಂತ್ಯಕ್ಕೆ ಜಲಮೂಲ ಶೂನ್ಯವಾಗುವ ಆತಂಕ ಎದುರಾಗಿದೆ.

ಬಹಳಷ್ಟು ಕಡೆ ಕೃಷಿಗೆ ತಯಾರಿ ಮಾಡಿ ಭೂಮಿಗೆ ಹಾಕಿದ ಗೊಬ್ಬರ ಹಾಗೆಯೇ ಇದ್ದು ನೀರು ಮಾತ್ರ ಬಂದಿಲ್ಲ. ಅಗತ್ಯವಿರುವಾಗ ನೀರನ್ನು ಪೂರೈಸದಿದ್ದ ಮೇಲೆ ಕೋಟ್ಯಂತರ ರೂಪಾಯಿ ಯೋಜನೆ ಯಾಕೆ ಬೇಕಿತ್ತು ಎನ್ನುವ ಪ್ರಶ್ನೆ ರೈತರದ್ದಾಗಿದೆ.

ಮಹತ್ವಾಕಾಂಕ್ಷಿ ಯೋಜನೆ ಹಳ್ಳ ಹಿಡಿಯದಿರಲಿ!

ಕೃಷಿ, ತೋಟಗಾರಿಕೆ ಚಟುವಟಿಕೆಗಾಗಿ ಸೌಕೂರು ಏತ ನೀರಾವರಿ ಯೋಜನೆಯು ರೈತಾಪಿ ವರ್ಗದ ಹೋರಾಟದ ಫಲವಾಗಿತ್ತು. 2019-20ರ ರಾಜ್ಯ ಬಜೆಟ್‌ನಲ್ಲಿ 73.71 ಕೋಟಿ ರೂ. ಅನುದಾನ ಮಂಜೂರಾಗಿತ್ತು. ಟೆಂಡರ್ ಆಗಿ ಕಾಮಗಾರಿ ಪೂರ್ಣಗೊಂಡು 2022ರಲ್ಲಿ ಉದ್ಘಾಟನೆಗೊಂಡಿತ್ತು. ಗುಲ್ವಾಡಿ, ಕರ್ಕುಂಜೆ, ಹಟ್ಟಿಯಂಗಡಿ, ತಲ್ಲೂರು, ದೇವಲ್ಕುಂದ ಗ್ರಾಪಂ ವ್ಯಾಪ್ತಿಯ 1,350 ಹೆಕ್ಟೇರ್ ಪ್ರದೇಶಕ್ಕೆ ಈ ನೀರು ಕೃಷಿ-ತೋಟಕ್ಕೆ ಉಪಯೋಗವಾಗುವುದಲ್ಲದೆ ಬಹಳಷ್ಟು ಕಡೆ ಬಾವಿಯ ಅಂತರ್ಜಲ ಮಟ್ಟ ಏರಿಕೆಗೂ ಯೋಜನೆಯಿಂದ ಅನುಕೂಲವಾಗಿತ್ತು. ಗುಲ್ವಾಡಿಯಿಂದ ನೀರು ಸರಬರಾಜಿಗೆ ಒಂದು ಓವರ್‌ಹೆಡ್ ಟ್ಯಾಂಕ್, ಐದು ಗ್ರಾಪಂ ಸೇರಿದ 8 ಗ್ರಾಮಗಳ 36 ಕಡೆಗಳಲ್ಲಿ ಚೆಕ್ ಡ್ಯಾಂಗಳು, 5 ಟ್ಯಾಂಕ್ ವೇಸ್ಟ್‌ವೇರ್ ನಿರ್ಮಿಸಿ ನೀರು ವಿತರಣೆ ಕೇಂದ್ರಗಳನ್ನು ಮಾಡಲಾಗಿತ್ತು. ಅತ್ಯುನ್ನತ ಸಾಮರ್ಥ್ಯವುಳ್ಳ ಪಂಪ್‌ಗಳನ್ನು ಬಳಸಲಾಗಿತ್ತು. 2 ಕೋಟಿ ರೂ.ಗೂ ಅಧಿಕ ಬಿಲ್‌ನ್ನು ಮೆಸ್ಕಾಂಗೆ ಪಾವತಿ ಮಾಡದ ಕಾರಣಕ್ಕೆ ರೈತರಿಗೆ ಉಪಯೋಗವಾಗುವ ಯೋಜನೆಯೊಂದು ಹಳ್ಳ ಹಿಡಿಯುವ ಲಕ್ಷಣ ಎದ್ದು ಕಾಣುತ್ತಿದೆ.

ಸೌಕೂರು ಏತನೀರಾವರಿ ಯೋಜನೆಯ ನೀರು ನಂಬಿ 5 ಗ್ರಾಪಂ ವ್ಯಾಪ್ತಿಯ 8 ಗ್ರಾಮದ ಕೃಷಿಕರು ಬೇಸಾಯ ಮಾಡುತ್ತಿದ್ದು ಸುಗ್ಗಿ ಬೇಸಾಯಕ್ಕೆ ರೈತರಿಗೆ ನವೆಂಬರ್ ತಿಂಗಳಿನಲ್ಲಿ ನೀರು ಹರಿಸಬೇಕಿತ್ತು. ವಿದ್ಯುತ್ ಬಿಲ್ ಪಾವತಿಸದ ಕಾರಣ ನೀರು ಬಿಡಲು ಸಾಧ್ಯವಾಗಿಲ್ಲ ಎಂದು ಅಧಿಕಾರಿಗಳು ಸಬೂಬು ಹೇಳುತ್ತಿದ್ದಾರೆ. ಸಂಬಂದಪಟ್ಟವರು ಈ ಸಮಸ್ಯೆಗೆ ಶಾಶ್ವತ ಪರಿಹಾರ ನೀಡಬೇಕು.

ಈ ನೀರಾವರಿ ಯೋಜನೆ ನಂಬಿ ಕೃಷಿ ಮಾಡಲು ತಯಾರಿ ಮಾಡಿಕೊಂಡಿದ್ದೆವು. ಇಲಾಖಾಧಿಕಾರಿಗಳು ಯಾವುದೇ ಮುನ್ಸೂಚನೆ, ಮಾಹಿತಿ ನೀಡದೆ ಏಕಾಏಕಿ ನೀರು ಬಿಡುವುದು ನಿಲ್ಲಿಸಿದ್ದಾರೆ. ಸುಗ್ಗಿ ಕೃಷಿ ಮಾಡುವ ಹುಮ್ಮಸ್ಸಿನಿಂದ ಗದ್ದೆಗಳಿಗೆ ಗೊಬ್ಬರ ಹಾಕಿ, ಬಿತ್ತನೆ ಮಾಡಲು ಹೊರಟಿದ್ದೆವು. ಈಗ ನೀರಿಲ್ಲದೆ ತೊಂದರೆ ಅನುಭವಿಸುವಂತಾಗಿದೆ.

ಕಳೆದ ಒಂದೂವರೆ ವರ್ಷದಿಂದ ಮೆಸ್ಕಾಂಗೆ ವಿದ್ಯುತ್ ಬಿಲ್ ಪಾವತಿಯಾಗದ ಕಾರಣ ಮಳೆಗಾದಲ್ಲಿ ಕಡಿತಗೊಳಿಸಿದ ವಿದ್ಯುತ್ ಸಂಪರ್ಕ ವಾಪಸ್ ನೀಡಿಲ್ಲ. ಕಳೆದ ವರ್ಷವೂ ವಿದ್ಯುತ್ ಕಡಿತ ಮಾಡಿದ್ದರು. ಒಂದಷ್ಟು ಮೊತ್ತ ಪಾವತಿಸಿದ ಬಳಿಕ ಸಂಪರ್ಕ ನೀಡಿದ್ದರು. ಇದು ಸುಗ್ಗಿ ಕೃಷಿಗಾಗಿ ಉಳುಮೆ, ಬೀಜ ಬಿತ್ತನೆ ಸಮಯವಾಗಿದ್ದು ರೈತರಿಗೆ ನೀರು ಬೇಕೆಂದು ಸಂಬಂದಪಟ್ಟವರಿಗೆ ಮನವಿ ಮಾಡಿದ್ದೇವೆ. ಮೆಸ್ಕಾಂ ಈ ಸಮಯದಲ್ಲಿ ಸ್ಪಂದಿಸಿದರೆ ರೈತರಿಗೆ ಅನುಕೂಲವಾಗಲಿದೆ.

ಕೃಷಿ