ಬೈಂದೂರಿನಲ್ಲಿ ಚಿನ್ನದ ಬಳೆ ಸುಲಿಗೆ ಮಾಡಿದ ಅಂತಾರಾಜ್ಯ ಕಳ್ಳರ ಬಂಧನ

ಉಡುಪಿ: ಬೈಂದೂರು ಬಸ್​ ನಿಲ್ದಾಣದಲ್ಲಿ ಮಹಿಳೆಯ ಗಮನ ಬೇರೆಡೆ ಸೆಳೆದು ಕೈಯಲ್ಲಿದ್ದ ಚಿನ್ನದ ಬಳೆ ಕತ್ತರಿಸಿ ಸುಲಿಗೆ ಮಾಡಿದ್ದ ಮುಂಬೈ ಮೂಲದ ಮೂವರು ಅಂತರರಾಜ್ಯ ಕಳ್ಳರನ್ನು ಪೊಲೀಸರು ಬಂಧಿಸಿದ್ದಾರೆ.

ಮಹಾರಾಷ್ಟ್ರದ ಥಾಣೆ ಜಿಲ್ಲೆಯ ಅಂಬೆರ್ನಾಥ್​ ನಿವಾಸಿಗಳಾದ ಅವಿನಾಶ್​ ಸುನಿಲ್​ ಗಾಯಕವಾಡ (27), ಸಂತೋಷಿ ವಿಶಾಲ್​ ಜಾದವ್​ (31) ಮತ್ತು ಅರ್ಚನಾ ಸುಶೀಲ್​ ಜಾದವ್​ (40) ಬಂಧಿತರು. ಆರೋಪಿಗಳಿಂದ 17.27 ಗ್ರಾಂ ತೂಕದ ಅಂದಾಜು 2.5 ಲಕ್ಷ ರೂ. ಮೌಲ್ಯದ ಚಿನ್ನದ ಬಳೆ, ಕೃತ್ಯಕ್ಕೆ ಬಳಸಿದ ಕಟ್ಟರ್​ ಮತ್ತು ಮೊಬೈಲ್​ ಫೋನ್​ ವಶಕ್ಕೆ ಪಡೆಯಲಾಗಿದೆ.

ಏಪ್ರಿಲ್​ 27ರಂದು ಮಧ್ಯಾಹ್ನ 2.45ರ ಸುಮಾರಿಗೆ ಸಹನಾ ಪೈ ಎಂಬುವವರು ಧಾರವಾಡಕ್ಕೆ ತೆರಳಲು ಬೈಂದೂರು ತಾಲೂಕು ಕಚೇರಿ ಮುಂಭಾಗದ ಬಸ್​ ನಿಲ್ದಾಣದಲ್ಲಿ ನಿಂತಿದ್ದರು. ಈ ವೇಳೆ ಇಬ್ಬರು ಮಹಿಳೆಯರು ಅವರ ಬಳಿ ಬಂದು ಮಾತನಾಡಿ ಗಮನ ಬೇರೆಡೆ ಸೆಳೆದಿದ್ದಾರೆ. ಇದೇ ಸಮಯವನ್ನು ಸಾಧಿಸಿದ ತಂಡದ ಇನ್ನೊಬ್ಬ ಸದಸ್ಯ, ಸಹನಾ ಅವರ ಹಿಂದಿನಿಂದ ಬಂದು ಕೈಯಲ್ಲಿದ್ದ ಚಿನ್ನದ ಬಳೆಯನ್ನು ಕಟ್ಟರ್​ನಿಂದ ಕತ್ತರಿಸಿ ತೆಗೆದು ಪರಾರಿಯಾಗಿದ್ದರು. ಈ ಕುರಿತು ಬೈಂದೂರು ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.