ಜಿಲ್ಲೆಯಲ್ಲಿ ಹೊಸ ಬ್ಯಾರಿಕೇಡ್​ ಅಳವಡಿಕೆಗೆ ಚಾಲನೆ

ಉಡುಪಿ: ಜಿಲ್ಲಾದ್ಯಂತ ಆಯಾಯ ಪೊಲೀಸ್​ ಠಾಣಾ ವ್ಯಾಪ್ತಿಯಲ್ಲಿ ಹಳೆಯದಾದ ಪೊಲೀಸ್​ ಬ್ಯಾರಿಕೇಡ್​ಗಳ ಮರುನವೀಕರಣ ಕಾರ್ಯಕ್ಕೆ ಚಾಲನೆ ನೀಡಲಾಗಿದೆ.

ಈ ಸಂದರ್ಭದಲ್ಲಿ ಜಿಲ್ಲಾ ಪೊಲೀಸ್​ ಅಧೀಕ್ಷಕ ಹರಿ ರಾಮ್​ ಶಂಕರ್​ ಮಾತನಾಡಿ, ಪ್ರಸ್ತುತ ಉಡುಪಿ ಜಿಲ್ಲೆಯ ವಿವಿಧ ಪೊಲೀಸ್​ ಠಾಣಾ ವ್ಯಾಪ್ತಿಯಲ್ಲಿ 59 ಸಿಂಗಲ್​ ಪೊಲೀಸ್​ ಬ್ಯಾರಿಕೇಡ್​ಗಳು ಹಾಗೂ 61 ಡಬಲ್​ ಪೊಲೀಸ್​ ಬ್ಯಾರಿಕೇಡ್​ಗಳು ಸೇರಿ ಒಟ್ಟು 120 ಪೊಲೀಸ್​ ಬ್ಯಾರಿಕೇಡ್​ಗಳನ್ನು ಡಬಲ್​ ಬ್ಯಾರಿಕೇಡ್​ಗಳಾಗಿ ಮರು ನವೀಕರಣಗೊಳಿಸಲಾಗಿದ್ದು, ಮುಂದಿನ ಎರಡು ತಿಂಗಳ ಅವಧಿಯಲ್ಲಿ ಹಂತ ಹಂತವಾಗಿ ಕಲ್ಕೂರ ರೆಫ್ರಿಜರೇರ್ಟಸ್​ ವತಿಯಿಂದ ಏಕರೂಪದ ವಿನ್ಯಾಸ, ಗುಣಮಟ್ಟ ಮತ್ತು ಬಳಕೆಯ ಮಾನದಂಡಗಳಿಗೆ ಅನುಗುಣವಾಗಿ ಸಂಪೂರ್ಣವಾಗಿ ಮರುನವೀಕರಣಗೊಳಿಸಿ ಆಯಾಯಾ ಪೊಲೀಸ್​ ಠಾಣೆಗಳಿಗೆ ನೀಡಲಾಗುವುದು ಎಂದರು.

ಉಡುಪಿ ನಗರ ಪೊಲೀಸ್​ ಠಾಣಾ ವ್ಯಾಪ್ತಿಯ 8 ಪೊಲೀಸ್​ ಬ್ಯಾರಿಕೇಡ್​ಗಳನ್ನು ಸಂಪೂರ್ಣವಾಗಿ ಮರುನವೀಕರಣಗೊಳಿಸಿ, ನಿಗದಿತ ಗುಣಮಟ್ಟ ಮತ್ತು ಏಕರೂಪತೆಯೊಂದಿಗೆ ಮೇಲ್ದರ್ಜೆಗೇರಿಸಲಾಗಿದೆ ಎಂದರು. ಕಲ್ಕೂರ ರೆಫ್ರಿಜರೇರ್ಟಸ್​ ಮಾಲೀಕ ರಂಜನ್​ ಕಲ್ಕೂರ್​ ಉಪಸ್ಥಿತರಿದ್ದರು.