ಉಡುಪಿ: ಉಡುಪಿ ಅಂದರೆ ಡಿವೈನ್​ ಪವರ್​ ಹೌಸ್​. ಉಡುಪಿಗೆ ಬರಲು ನನಗೆ ದೇವರು ನೀಡಿದ ಡಿವೈನ್​ ಕಾಲ್​ (ದೈವಿಕ ಕರೆ). ಪುತ್ತಿಗೆ ಸುಗುಣೇಂದ ಶ್ರೀಗಳು ವೈಯಕ್ತಿಕವಾಗಿ ನನ್ನನ್ನು ಆಮಂತ್ರಿಸಿದ್ದಾರೆ. ನಾನು ಅವರಿಗೆ ಆಭಾರಿಯಾಗಿದ್ದೇನೆ ಎಂದು ತೆಲುಗು ಖ್ಯಾತ ನಟ, ಆಂಧ್ರ ಪ್ರದೇಶದ ಡಿಸಿಎಂ ಪವನ್​ ಕಲ್ಯಾಣ್​ ತಿಳಿಸಿದರು.

ಉಡುಪಿ ಶ್ರೀಕೃಷ್ಣ ಮಠದಲ್ಲಿ ಪರ್ಯಾಯ ಪುತ್ತಿಗೆ ಮಠದಿಂದ ಆಯೋಜಿಸಿದ್ದ ಬೃಹತ್​ ಗೀತೋತ್ಸವದ ಸಮಾರೋಪ ಸಮಾರಂಭದಲ್ಲಿ ಪಾಲ್ಗೊಳ್ಳಲು ಭಾನುವಾರ (ಡಿ.7) ಉಡುಪಿಗೆ ಆಗಮಿಸಿದ್ದ ವೇಳೆ ಮಾಧ್ಯಮದವರೊಂದಿಗೆ ಮಾತನಾಡಿ, ಒಂದು ಕೋಟಿಗೂ ಅಧಿಕ ಜನರಿಂದ ಪುತ್ತಿಗೆ ಸುಗುಣೇಂದ್ರ ಶ್ರೀಗಳು ಭಗವದ್ಗೀತೆ ಬರೆಸಿರುವುದು ಅದ್ಭುತ, ಕ್ರಾಂತಿಕಾರಕ ಕಾರ್ಯ. ಅಲ್ಲದೆ, ಇತ್ತೀಚೆಗೆ ಪ್ರಧಾನಿ ನರೇಂದ್ರ ಮೋದಿ ಉಪಸ್ಥಿತಿಯಲ್ಲಿ ಏಕಕಾಲದಲ್ಲಿ ಒಂದು ಲಕ್ಷ ಜನ ಗೀತಾ ಪಾರಾಯಣ ಮಾಡಿರುವುದೂ ಸಹ ವಿಶೇಷವಾಗಿದೆ ಎಂದರು.

ಪ್ರತಿಯೊಂದು ಊರಿಗೂ ತನ್ನದೇ ಆದ ವಿಶಿಷ್ಟ ಸಂಸ್ಕ್ಕತಿ ಇರುತ್ತದೆ. ಅದೇರೀತಿ ಕಾಂತಾರಾ ಸಿನಿಮಾವು ತುಳುನಾಡಿನ ಕಥೆ ಹೇಳುತ್ತದೆ. ಆಂಧ್ರದ ತೆಲಂಗಾಣ ಭಾಗದಲ್ಲಿಯೂ ಅಂತಹ ಸಾಂಸ್ಕ್ಕತಿಕ ವೈಶಿಷ್ಟ್ಯ ಹೊಂದಿರುವ ಕಥೆಗಳಿವೆ. ಇದೀಗ ಬಿಡುಗಡೆಯಾದ ಕಾಂತಾರಾ ಚಾಪ್ಟರ್-1 ಸಿನಿಮಾ ನಾನು ನೋಡಿಲ್ಲ. ಹಿಂದೆ ಬಿಡುಗಡೆಯಾದ ಕಾಂತಾರ ನೋಡಿ ಖುಷಿ ಪಟ್ಟಿದ್ದೇನೆ. ಸಾಂಸ್ಕ್ಕತಿಕ ಹಿನ್ನೆಲೆಯ ಕಥೆ ಹೇಳುವ ಇಂತಹ ಸಿನಿಮಾಗಳು ಹೆಚ್ಚು ಹೆಚ್ಚು ಬರಬೇಕು ಎಂದರು.