ಉಡುಪಿ: ಉಪ್ಪೂರು ಗ್ರಾಮದ ಚಕ್ಕುಲಿಕಟ್ಟೆ ಎಂಬಲ್ಲಿ ನಿರ್ಮಿಸಲು ಉದ್ದೇಶಿಸಿರುವ ಬೀದಿನಾಯಿಗಳ ಶೆಲ್ಟರ್​ಗೆ ವಿರೋಧಿಸಿ ಹಾಗೂ ಯೋಜನೆಯನ್ನು ಜನವಸತಿ ಇಲ್ಲದ ಪ್ರದೇಶಕ್ಕೆ ಸ್ಥಳಾಂತರಿಸುವಂತೆ ಆಗ್ರಹಿಸಿ ಉಪ್ಪೂರು ಗ್ರಾಮದಲ್ಲಿ ಉದ್ದೇಶಿತ ಬೀದಿ ನಾಯಿಗ ಶೆಲ್ಟರ್​ ವಿರೋಧಿ ನಾಗರಿಕ ಸಮಿತಿ ವತಿಯಿಂದ ಶುಕ್ರವಾರ (ಫೆ.6) ಬೃಹತ್​ ಪ್ರತಿಭಟನೆ ನಡೆಸಲಾಯಿತು.

ಯೋಜನೆಯ ವ್ಯಾಪ್ತಿಗೊಳಪಡುವ ಉಪ್ಪೂರು, ಹಾವಂಜೆ ಹಾಗೂ ಆರೂರು ಗ್ರಾಮದ ನೂರಾರು ಜನರು ಉಡುಪಿ ಜಿಲ್ಲಾಧಿಕಾರಿ ಕಚೇರಿಯ ಬಳಿ ಸಾಮೂಹಿಕ ಧರಣಿ ನಡೆಸಿ, ಯೋಜನೆ ಕೈಬಿಡುವಂತೆ ಒತ್ತಾಯಿಸಿದರು.

ಗ್ರಾಮದ ಅಜಿತ್​ ಶೆಟ್ಟಿ ಪ್ರಾಸ್ತಾವಿಕವಾಗಿ ಮಾತನಾಡಿ, ಬೀದಿ ನಾಯಿಗಳ ರಕ್ಷಣೆಗಾಗಿ ಪ್ರತಿ ಜಿಲ್ಲೆಯಲ್ಲಿಯೂ ನಾಯಿ ಶೆಲ್ಟರ್​ ತೆರೆದು ರಕ್ಷಿಸುವಂತೆ ಇತ್ತೀಚೆಗೆ ಸುಪ್ರೀಂ ಕೋರ್ಟ್​ ಆದೇಶಿಸಿದೆ. ನ್ಯಾಯಾಲಯದ ಕಳಕಳಿಗೆ ನಮ್ಮ ಸಹಮತವೂ ಇದೆ. ಆದರೆ, ಉಡುಪಿ ಜಿಲ್ಲಾಡಳಿತ ಜನ ವಸತಿ ಇರುವ ಪ್ರದೇಶದಲ್ಲಿ ನಾಯಿ ಶೆಲ್ಟರ್​ ತೆರೆಯಲು ಮುಂದಾಗಿದೆ. ಅದರಿಂದಾಗುವ ತೊಂದರೆ,  ಮುಂದಾಗುವ ಸಮಸ್ಯೆ ತಡೆಯಲು ಮೂರು ಗ್ರಾಪಂ ವ್ಯಾಪ್ತಿಯ ಎಲ್ಲ ಅಧ್ಯಕ್ಷರು, ಉಪಾಧ್ಯಕ್ಷರು, ಸರ್ವ ಸದಸ್ಯರು ಹಾಗೂ ಊರಿನ ಜನರೆಲ್ಲ ಸೇರಿ ಚಕ್ಕುಲಿಕಟ್ಟೆಯಲ್ಲಿ ನಿರ್ಮಿಸಲಿರುವ ನಾಯಿ ಶೆಲ್ಟರ್​ ಯೋಜನೆ ವಿರೋಧಿಸುತ್ತಿದ್ದೇವೆ. ಜನವಸತಿ ಇಲ್ಲದ ಕಡೆ ಸ್ಥಳಾಂತರಿಸಿ ಎಂದು ಆಗ್ರಹಿಸುತ್ತಿದ್ದೇವೆ ಎಂದರು.

ರಾಘವೇಂದ್ರ ಉಪ್ಪೂರು ಮಾತನಾಡಿ, ಉಪ್ಪೂರು ಗ್ರಾಮದ ಸರ್ವೇ ನಂಬರ್​ 293ರಲ್ಲಿ 90 ಎಕರೆ ಸರ್ಕಾರಿ ಜಾಗವೇ ಇದೆ. ಅದರಲ್ಲಿ 9.9 ಎಕರೆ ಜಾಗದಲ್ಲಿ ಬಹು ದೊಡ್ಡ ಪ್ರಮಾಣದಲ್ಲಿ ಬೀದಿ ನಾಯಿಗಳಿಗಾಗಿ ಶೆಲ್ಟರ್​ ನಿರ್ಮಾಣಕ್ಕೆ ಸರ್ವೇ ಮಾಡಲಾಗಿದೆ. ಉಡುಪಿ ನಗರದಲ್ಲಿರುವ 18 ಸಾವಿರದಷ್ಟು ಬೀದಿನಾಯಿಗಳನ್ನು ಇಲ್ಲಿ ಪೋಷಿಸಲಾಗುತ್ತದೆ. ಬೀದಿ ನಾಯಿಗಳ ರಕ್ಷಣೆಗಾಗಿ ಇಲ್ಲಿ ತಾಣ ನಿರ್ಮಿಸಿದರೆ ಉಳಿದ 80 ಎಕರೆ ಜಾಗದಲ್ಲಿ ಯಾವುದೇ ಅಭಿವೃದ್ಧಿ ಕಾರ್ಯ ಮಾಡಲು ಸಾಧ್ಯವಾಗುವುದಿಲ್ಲ. ಕೂಡಲೇ ಶೆಲ್ಟರ್​ ನಿರ್ಮಾಣ ಯೋಜನೆ ಕೈಬಿಡಬೇಕು ಎಂದರು.

ನಳಿನಿ ಪ್ರದೀಪ್​ ಮಾತನಾಡಿ, ಮನೆಯ ಅಕ್ಕ-ಪಕ್ಕದ ನಾಯಿ ಕೂಗಿದರೆ ನಮಗೆ ಸಹಿಸಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಇನ್ನು ನಾಯಿ ಶೆಲ್ಟರ್​ ನಿರ್ಮಿಸಿ, ಅಲ್ಲಿರುವ 18- 20 ಸಾವಿರ ನಾಯಿಗಳು ಬೊಗಳಲು ಶುರು ಮಾಡಿದರೆ ಸುತ್ತಮುತ್ತಲಿರುವ ಜನರ ಜೀವನ, ಪರಿಸ್ಥಿತಿ ಹೇಗಾಗಬಹುದು? ಈಗಾಗಲೇ ಊರಿಗೆ ಆಗಾಗ ಚಿರತೆಯೂ ಬರುತ್ತಿದ್ದು, ಜನರು ಭಯಭೀತರಾಗಿದ್ದಾರೆ. ನಾಯಿ ಶೆಲ್ಟರ್​ ನಿರ್ಮಿಸಿದರೆ ಅಲ್ಲಿರುವ ನಾಯಿಗಳನ್ನು ತಿನ್ನಲು ಗ್ರಾಮದತ್ತ ಚಿರತೆಗಳ ಹಿಂಡೇ ದಾಳಿ ಇಡಬಹುದು. ಅಷ್ಟೊಂದು ಸಂಖ್ಯೆಯಲ್ಲಿ ನಾಯಿಗಳು ಮಲ-ಮೂತ್ರ ವಿಸರ್ಜಿಸುವುದರಿಂದ ಸುತ್ತಲಿನ ಪರಿಸರ ಹದಗೆಟ್ಟು ಜನರಿಗೂ ಭೀಕರ ಕಾಯಿಲೆ ಕಾಡಬಹುದು. ಪಕ್ಕದಲ್ಲಿಯೇ ಅಂಗನವಾಡಿ ಇದೆ. ಸಮೀಪದಲ್ಲಿ ಕೆಎಂಎಫ್​ ಹಾಲು ಸಂಗ್ರಹಿಸುವ ಘಟಕವೂ ಇದೆ. ಇಂಥ ಸ್ಥಳದಲ್ಲಿ ನಾಯಿ ಶೆಲ್ಟರ್​ ನಿರ್ಮಿಸಿದರೆ ಗ್ರಾಮದ ಪ್ರತಿನಿತ್ಯದ ಚಟುವಟಿಕೆ, ಜನಜೀವನದ ಮೇಲೆ ದುಷ್ಪರಿಣಾಮ ಬೀರಲಿದೆ ಎಂದರು.

ಆರೂರು ಗ್ರಾಪಂ ಅಧ್ಯಕ್ಷ ಗುರುರಾಜ್​ ರಾವ್​, ಉಪಾಧ್ಯಕ್ಷೆ ವನಿತಾ ಪೂಜಾರಿ, ಹಾವಂಜೆ ಗ್ರಾಪಂ ಉಪಾಧ್ಯಕ್ಷೆ ಆಶಾ ಶೆಟ್ಟಿ, ಉಪಾಧ್ಯಕ್ಷ ಗುರುರಾಜ್​ ಪೂಜಾರಿ, ಉಪ್ಪೂರು ಗ್ರಾಪಂ ಅಧ್ಯಕ್ಷೆ ಗಾಯತ್ರಿ ಸೇರಿಗಾರ್​, ಉಪಾಧ್ಯಕ್ಷ ಸತೀಶ್​ ಪೂಜಾರಿ, ಮೂರು ಗ್ರಾಪಂಗಳ ಸದಸ್ಯರು ಹಾಗೂ ಗ್ರಾಮಸ್ಥರು ಉಪಸ್ಥಿತರಿದ್ದರು.

"