ಉಡುಪಿ

ಯುದ್ಧ ಅಲ್ಲಿ... ಬರೆ ಇಲ್ಲಿ..!

(ಸಾಂದರ್ಭಿಕ ಚಿತ್ರ).
(ಸಾಂದರ್ಭಿಕ ಚಿತ್ರ).
Published on: 

* ವಾಣಿಜ್ಯ ಸಿಲಿಂಡರ್​ ಬೆಲೆ ಮತ್ತೆ ಏರಿಕೆ

* ಹೋಟೆಲ್​ ಉದ್ಯಮ, ಗ್ರಾಹಕರಿಕೆ ಬಿಕ್ಕಳಿಕೆ

ಪ್ರಶಾಂತ ಭಾಗ್ವತ ಉಡುಪಿ
ಎತ್ತಿಗೆ ಜ್ವರ ಬಂದರೆ ಎಮ್ಮೆಗೆ ಬರೆ ಎಂಬ ನಾಣ್ಣುಡಿಯಂತೆ ಇರಾನ್​ ವಿರುದ್ಧ ಇಸ್ರೇಲ್​ ಹಾಗೂ ಅಮೆರಿಕ ನಡೆಸುತ್ತಿರುವ ಜಂಟಿ ಸಮರದ ಬಿಸಿ ಭಾರತಕ್ಕೆ ಮುಂದುವರಿದಿದೆ. ಮೂರು ತಿಂಗಳಿಂದ ಮಧ್ಯಪ್ರಾಚ್ಯದಲ್ಲಿ ಯುದ್ಧ ನಡೆಯುತ್ತಿದ್ದು, ದೇಶದಲ್ಲಿ ಅಡುಗೆ ಅನಿಲ, ಇಂಧನ ದರ ಏರಿಕೆಯ ಬರೆ ಬೀಳತೊಡಗಿದೆ.
ಮೂರು ತಿಂಗಳಿಂದ ಕರ್ನಾಟಕ ರಾಜ್ಯವೂ ಸೇರಿದಂತೆ ದೇಶದಲ್ಲಿ ವಾಣಿಜ್ಯ ಬಳಕೆಯ ಸಿಲಿಂಡರ್​ ಪೂರೈಕೆಯಲ್ಲಿ ಅಸ್ತವ್ಯಸ್ತವಾಗಿತ್ತು. ಇದೀಗ ಹೋಟೆಲ್​ಗಳಿಗೆ ಅಗತ್ಯತೆಗೆ ತಕ್ಕಷ್ಟು ವಾಣಿಜ್ಯ ಸಿಲಿಂಡರ್​ ಪೂರೈಸಲಾಗುತ್ತಿದೆ. ಪ್ರಸ್ತುತ 3,114 ರೂ. ಆಗಿದ್ದು, ದರ ಏರಿಕೆಯ ಬಿಸಿ ಮಾಲೀಕರ ಕೈ ಸುಡುತ್ತಿದೆ.
ಗ್ರಾಹಕರ ಪರದಾಟ
ಗ್ಯಾಸ್​ ಬೆಲೆ ಏರಿಕೆಯ ಬಿಸಿ ಹೋಟೆಲ್​ ಉದ್ಯಮಿಗಳಲ್ಲಿ ಚಿಂತೆ ಹೆಚ್ಚಿಸಿದೆ. ಸಣ್ಣ ಕ್ಯಾಂಟೀನ್​ ಹಾಗೂ ಚಿಕ್ಕ ಮಳಿಗೆಗಳಲ್ಲಿ ಹೋಟೆಲ್​ ನಡೆಸಿ ಜೀವನ ಸಾಗಿಸುತ್ತಿರುವವರಿಗೆ ಆಘಾತವಾಗಿದೆ. ಇಂತಹ ಬಗೆಯ ಹೋಟೆಲ್​ಗಳು ಶೇ.60ರಷ್ಟು ಬಂದ್​ ಆಗಿವೆ. ದೊಡ್ಡ ಪ್ರಮಾಣದ ಹೋಟೆಲ್​ಗಳಲ್ಲಿ ತಿಂಡಿ&ತಿನಿಸುಗಳ ದರವನ್ನೂ ಸಹ ಕನಿಷ್ಠ 20ರಿಂದ 50 ರೂ. ವರೆಗೆ ಏರಿಸಿದ್ದಾರೆ. ಇದು, ನಿತ್ಯವೂ ಬೆಳಗ್ಗೆ ತಿಂಡಿ, ಮಧ್ಯಾಹ್ನ ಹಾಗೂ ರಾತ್ರಿಯ ಊಟಕ್ಕೆ ಹೋಟೆಲ್​ಗಳನ್ನೇ ನಂಬಿರುವ ಮಧ್ಯಮ ವರ್ಗದ ಜನರಿಗೆ ಹಾಗೂ ಕಾರ್ಮಿಕರ ವರ್ಗಕ್ಕೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.

ರಾಜ್ಯಗಳಲ್ಲಿ ವಿವಿಧ ದರ

ಕಮರ್ಷಿಯಲ್​ ಸಿಲಿಂಡರ್​ ದರ ಅನ್ಯ ರಾಜ್ಯಗಳಲ್ಲಿ ವ್ಯತ್ಯಾಸವಿದೆ. ದೆಹಲಿಯಲ್ಲಿ 3,113.50 ರೂ., ಕೋಲ್ಕತ್ತಾದಲ್ಲಿ 3,255.50 ರೂ. ಇದೆ. ಬೆಂಗಳೂರಿನಲ್ಲಿ 3,198 ರೂ.ಗೆ ತಲುಪಿದೆ. 5 ಕೆಜಿ ತೂಕದ ಫ್ರೀ ಟ್ರೇಡ್​ ಎಲ್​ಪಿಜಿ ಸಿಲಿಂಡರ್​ ಬೆಲೆಯಲ್ಲೂ ಸಹ 11 ರೂ. ಹೆಚ್ಚಳವಾಗಿದ್ದು, ದೆಹಲಿಯಲ್ಲಿ ಇದರ ನೂತನ ದರ 821.50 ರೂ. ಆಗಿದೆ. ಕರ್ನಾಟಕದಲ್ಲಿ 860 ರೂ.ಗೆ ಏರಿದೆ.
3 ತಿಂಗಳಲ್ಲಿ 1,240ರೂ. ಹೆಚ್ಚಳ!
ಮಧ್ಯಪ್ರಾಚ್ಯದಲ್ಲಿ ಯುದ್ಧ ಆರಂಭವಾದ ಬಳಿಕ ಕರ್ನಾಟಕದಲ್ಲಿ ಕಮರ್ಷಿಯಲ್​ ಗ್ಯಾಸ್​ ದರದಲ್ಲಿ 3 ಬಾರಿ ಏರಿಕೆ ಕಂಡಿದೆ. ಮಾರ್ಚ್​ 1ರಂದು 19 ಕೆಜಿ ಸಿಲಿಂಡರ್​ನ ದರ 1,874 ರೂ. ಇತ್ತು. ಮಾ.7ರಂದು ದಿಢೀರನೆ 203 ರೂ. ಏರಿಕೆಯೊಂದಿಗೆ 2,077 ರೂ.ಗೆ ಏರಿಕೆಯಾಯಿತು. ಮೇ 1ರಂದು ಮತ್ತೆ 991 ರೂ. ಏರಿಕೆಯಾಗಿ 3,068ರೂ. ಆಗಿತ್ತು. ಇದೀಗ ಜೂ.1ರಂದು ಮತ್ತೆ 46 ರೂ. ಏರಿಕೆಯಾಗಿದ್ದು ಪ್ರಸ್ತುತ ಸಿಲಿಂಡರ್​ ದರ 3,114 ರೂ.ಗೆ ನಿಂತಿದೆ. ಕಳೆದ 3 ತಿಂಗಳಲ್ಲಿ ಕಮರ್ಷಿಯಲ್​ ಸಿಲಿಂಡರ್​ನ ದರ ಬರೋಬ್ಬರಿ 1,240ರೂ. ಏರಿಕೆ ಕಂಡಿದೆ.

ಮನೆಗಳಿಗೆ ಶೇ.80 ಪೂರೈಕೆ

ಗ್ರಹಬಳಕೆಯ ಸಿಲಿಂಡರ್​ (14 ಕೆಜಿ) ಪೂರೈಕೆಯಲ್ಲಿ ಸಮಸ್ಯೆ ಇಲ್ಲ. ದರವೂ ಏರಿಕೆ ಆಗಿಲ್ಲ. ಪ್ರಸ್ತುತ ದರ 915.50 ರೂ. ಇದೆ. ಆದರೆ, ಶೇ.80ರಷ್ಟು ಮಾತ್ರ ಪೂರೈಕೆ ಮಾಡಲಾಗುತ್ತಿದೆ. ಒಂದೇ ಸಿಲಿಂಡರ್​ (ಸಿಂಗಲ್​) ಇರುವವರು 25 ದಿನದ ಬಳಿಕ ಹಾಗೂ ಎರಡು ಸಿಲಿಂಡರ್​ (ಡಬಲ್​) ಇರುವವರು 30 ದಿನದ ಬಳಿಕವೇ ಬುಕ್ಕಿಂಗ್​ ಮಾಡಬೇಕಿದೆ. ಬೇಡಿಕೆಯ ನೋಂದಣಿಯಾಗಿ ಒಟಿಪಿ ಬಂದಿದ್ದರೂ ಸಹ 10&12 ದಿನದ ಬಳಿಕವೇ ಸಿಲಿಂಡರ್​ ಪೂರೈಕೆ ಮಾಡಲಾಗುತ್ತಿದೆ. 
"

ಕಮರ್ಷಿಯಲ್​ ಗ್ಯಾಸ್​ ದರ ಏರಿಕೆಯಿಂದ ಹೋಟೆಲ್​ಗಳಲ್ಲಿ ತಿಂಡಿ-ತಿನಿಸು, ಊಟಗಳ ಬೆಲೆ ಏರಿಕೆ ಅನಿವಾರ್ಯವಾಗಿದೆ. ಇತ್ತೀಚೆಗೆ ಪೆಟ್ರೋಲ್​, ಡೀಸೆಲ್​ ಬೆಲೆಯೂ ಏರಿದೆ. ಬೇಳೆ&ಕಾಳು, ತರಕಾರಿ ದರವೂ ಏರುತ್ತಲೇ ಇದೆ. ಹೀಗಾಗಿ ಗ್ರಾಹಕರಿಗೆ ಈ ಹಿಂದಿನ ದರದಲ್ಲಿ ಆಹಾರ ನೀಡಲು ಸಾಧ್ಯವೇ ಇಲ್ಲ. ಕಮರ್ಷಿಯಲ್​ ಗ್ಯಾಸ್​ ದರ ಇಳಿಕೆ ಆದಲ್ಲಿ ಮಾತ್ರ ಹೋಟೆಲ್​ ಉದ್ಯಮಕ್ಕೆ ಭವಿಷ್ಯವಿದೆ.

— ಡಾ. ತಲ್ಲೂರು ಶಿವರಾಂ ಶೆಟ್ಟಿ. ಹೋಟೆಲ್​ ಮಾಲೀಕರ ಸಂಘದ ಉಪಾಧ್ಯಕ್ಷ.
"

ಮೂರು ತಿಂಗಳಿಂದ ರೇಶನಿಂಗ್​ ವ್ಯವಸ್ಥೆಯಲ್ಲಿ ಹೋಟೆಲ್​ಗೆ ಕಮರ್ಷಿಯಲ್​ ಗ್ಯಾಸ್​ ಪೂರೈಕೆ ಮಾಡಲಾಗುತ್ತಿತ್ತು. ಇದೀಗ ಮಂಗಳೂರಿನ ಎಚ್​ಪಿಸಿಎಲ್​ ಪ್ಲಾಂಟ್​ನಿಂದ ಗ್ಯಾಸ್​ ವಿತರಕರಿಗೆ ಅಗತ್ಯತೆಯಷ್ಟು ಕಮರ್ಷಿಯಲ್​ ಗ್ಯಾಸ್​ ಪೂರೈಸಲಾಗುತ್ತಿದೆ. ಆದರೆ, ಯಾವುದೇ ಹೊಸ ಗ್ರಾಹಕರಿಗೆ ದೇಶಾದ್ಯಂತ ಕಳೆದ 3 ತಿಂಗಳಿಂದ ಅನಿಲ ಸಂಪರ್ಕ ಸೌಲಭ್ಯ ಲಭ್ಯವಿಲ್ಲ. ಒಂದು ಸಿಲಿಂಡರ್​ ಇರುವವರಿಗೆ 2 ಸಿಲಿಂಡರ್​ ಹೊಂದಲೂ ಸದ್ಯದ ಸ್ಥಿತಿಯಲ್ಲಿ ಅವಕಾಶವಿಲ್ಲ. ತುರ್ತು ಸಂದರ್ಭಕ್ಕೆ 5 ಕೆಜಿ ಸಿಲಿಂಡರ್​ ಪಡೆಯಬಹುದು.

— ವಿಷ್ಣು ಆಚಾರ್ಯ. ರಾಘವೇಂದ್ರ ಗ್ಯಾಸ್​ ಏಜೆನ್ಸಿ ಮಾಲೀಕ. (ಎಚ್​ಪಿ ಗ್ಯಾಸ್​ ಪಾಲುದಾರರು)
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net