ಪ್ಲಾಸ್ಟಿಕ್​ ರಾಷ್ಟ್ರಧ್ವಜ ಮಾರಾಟ ನಿಯಂತ್ರಿಸಿ

ಉಡುಪಿ: ನಮ್ಮ ರಾಷ್ಟ್ರಧ್ವಜವು ದೇಶದ ಭಾವೈಕ್ಯದ ಸಂಕೇತವಾಗಿದೆ. ಆ.15 ಮತ್ತು ಜ.26ರಂದು ಹೆಮ್ಮೆಯಿಂದ ಧ್ವಜಾರೋಹಣ ಮಾಡುತ್ತೇವೆ. ಆದರೆ, ಈ ದಿನಗಳಂದು ಸಣ್ಣ ಸಣ್ಣ ಅಳತೆಯ ಪ್ಲಾಸ್ಟಿಕ್​ ರಾಷ್ಟ್ರಧ್ವಜಗಳು ಮಾರಾಟಗೊಳ್ಳುತ್ತವೆ. ಮಾರನೆಯ ದಿನ ಅವು ಕಸವಾಗಿ ಚರಂಡಿಗಳಲ್ಲಿ ಕಾಣಸಿಗುತ್ತವೆ. ಇದು ಧ್ವಜಕ್ಕೆ ಮಾಡುವ ಅಪಮಾನವಾಗಿದ್ದು, ಪರಿಸರ ನಾಶಕ್ಕೂ ಕಾರಣವಾಗಿದೆ. ಹೀಗಾಗಿ ಪ್ಲಾಸ್ಟಿಕ್​ನಿಂದ ರಾಷ್ಟ್ರಧ್ವಜದ ತಯಾರಿಕೆ ಹಾಗೂ ಮಾರಾಟ ನಿಯಂತ್ರಿಸಿ ಎಂದು ಹಿಂದೂ ಜನಜಾಗೃತಿ ಸಮಿತಿಯ ಜಿಲ್ಲಾ ಸಮನ್ವಯಕಾರ ಬಾಲಕೃಷ್ಣ ನಾಯಕ ಒತ್ತಾಯಿಸಿದರು.

ಸ್ವಾತಂತ್ರ್ಯೋತ್ಸವದ ಸಂದರ್ಭದಲ್ಲಿ ರಾಷ್ಟ್ರಧ್ವಜಕ್ಕಾಗುವ ಅಪಮಾನ ತಡೆಗಟ್ಟಲು ಉಡುಪಿ ಜಿಲ್ಲಾಧಿಕಾರಿ, ಜಿಲ್ಲಾ ಪೊಲೀಸ್​ ವರಿಷ್ಠ ಹಾಗೂ ಜಿಲ್ಲೆಯೆ ಎಲ್ಲ ತಾಲೂಕುಗಳ ತಹಸೀಲ್ದಾರರಿಗೆ ಹಿಂದೂ ಜನಜಾಗೃತಿ ಸಮಿತಿಯಿಂದ ಮನವಿ ಸಲ್ಲಿಸಿ ಮಾತನಾಡಿದರು.

ಪ್ಲಾಸ್ಟಿಕ್​ನಿಂದ ಬಾವುಟ ತಯಾರಿಸಿ ಅಪಮಾನ ಮಾಡುವುದನ್ನು ನಿಲ್ಲಿಸುವಂತೆ ಸುಪ್ರೀಂ ಕೋರ್ಟ್​ ಸಹ ಆದೇಶ ನೀಡಿದೆ. ಕೇಂದ್ರ, ರಾಜ್ಯ ಗೃಹ ಇಲಾಖೆಗಳು ಹಾಗೂ ಶಿಕ್ಷಣ ಇಲಾಖೆಗಳೂ ಸುತ್ತೋಲೆ ಹೊರಡಿಸಿದ್ದವು. ಆದರೂ ಪ್ಲಾಸ್ಟಿಕ್​ ಧ್ವಜಗಳ ಮಾರಾಟ ಸಂವಿಧಾನಬಾಹಿರವಾಗಿ ಇನ್ನೂ ನಡೆಯುತ್ತಿದೆ. ಅದಕ್ಕೆ ಕಡಿವಾಣ ಹಾಕಬೇಕು ಎಂದು ಒತ್ತಾಯಿಸಿದರು.

ವಿದ್ಯಾರ್ಥಿಗಳಿಂದ ದೇಶದ ಬಾವುಟಕ್ಕೆ ಅಪಮಾನ ಅಥವಾ ಅನಾದರದಂತ ಕೃತ್ಯ ನಡೆಯದಂತೆ ತಡೆಯಲು ಜಿಲ್ಲಾ ಮತ್ತು ಕ್ಷೇತ್ರ ಶಿಕ್ಷಣಾಧಿಕಾರಿಗಳಿಗೆ ಹಾಗೂ ಅನೇಕ ಶಾಲಾ-ಕಾಲೇಜುಗಳಿಗೆ ಮನವಿ ನೀಡಲಾಯಿತು.

ಸಮಿತಿಯ ಧರ್ಮಪ್ರೇಮಿ ಬಂಧುಗಾಳದ ಪ್ರಕಾಶ್​, ಹರಿಪ್ರಸಾದ್​, ರಾಮಣ್ಣ, ಶೇಷಪ್ಪ ಕೋಟ್ಯಾನ್​, ಡಾ. ಮಾರುತಿ ಶ್ಯಾನಭಾಗ್​, ದಿನೇಶ್​ ಪೂಜಾರಿ ಇತರರಿದ್ದರು.