ಹೆದ್ದಾರಿ ಅರೆಬರೆ ಕಾಮಗಾರಿ

ಬೈಂದೂರು- ಕೊಲ್ಲೂರು ರಾಷ್ಟ್ರೀಯ ಹೆದ್ದಾರಿ ಅರೆಬರೆ ಕಾಮಗಾರಿಯಿಂದ ಸಂಪೂರ್ಣ ಕೆಸರುಮಯವಾಗಿ ಅವ್ಯವಸ್ಥೆ ಆಗರವಾಗಿದೆ. ಕಳೆದೆರಡು ದಿನಗಳಿಂದ ಸುರಿಯುತ್ತಿರುವ ಮಳೆಗೆ ಬಹುತೇಕ ಕಿರು ಸೇತುವೆಗಳು ಕೊಚ್ಚಿ ಹೋಗುವ ಆತಂಕ ಸೃಷ್ಟಿಯಾಗಿದೆ. ಬದಲಿ ಮಾರ್ಗ ಸಂಪೂರ್ಣ ಕೆಸರುಮಯವಾಗಿದ್ದು, ಮಳೆಗಾಲದಲ್ಲಿ ಅವಾಂತರ ತಪ್ಪಿದಲ್ಲ.

*ವಾಹನ ಚಾಲನೆ ಸವಾಲು: ಕೊಲ್ಲೂರಿನಿಂದ ಬೈಂದೂರಿನವರೆಗೆ ಏಕಕಾಲದಲ್ಲಿ ಹಲವು ಸೇತುವೆಗಳನ್ನು ಮತ್ತು ತೊರೆ, ಹಳ್ಳಗಳನ್ನು ಅಗೆದಿರುವುದರಿಂದ ನಿತ್ಯ ಪ್ರಯಾಣಿಕರಿಗೆ ಸಂಚರಿಸುವುದು ಹರಸಾಹಸವಾಗಿದೆ. ಮಳೆಗಾಲ ಆರಂಭವಾದರೂ ಸರಿಯಾದ ವ್ಯವಸ್ಥೆಯಾಗಿಲ್ಲ. ಸೇತುವೆಗಳ ಕಾಮಗಾರಿಯಿಂದ ರಸ್ತೆ ಕೆಸರು ಮತ್ತು ಹೊಂಡಮಯವಾಗಿದ್ದು, ದ್ವಿಚಕ್ರ ಸವಾರರಿಗೆ ಸೇತುವೆ ದಾಟಿ ಮುಂದೆ ಹೋಗುವುದೇ ಸವಾಲಾಗಿದೆ. ಕಾಮಗಾರಿ ನಡೆಯುವ ಸ್ಥಳದಿಂದ ಒಂದು ಕಿಲೋ ಮೀಟರ್ ದೂರಕ್ಕೂ ರಸ್ತೆ ಕೆಸರಿನಿಂದ ಕೂಡಿದೆ. ದ್ವಿಚಕ್ರ ವಾಹನ ಪ್ರಯಾಣ ದುಸ್ತರವಾಗಿದೆ.

ಕರಾವಳಿಯ ಎಲ್ಲ ಭಾಗಗಳಿಗಿಂತ ಅಧಿಕ ಮಳೆ ಬೀಳುವ ಈ ಪ್ರದೇಶದಲ್ಲಿ ರಸ್ತೆ ಕಾಮಗಾರಿ ಬಗ್ಗೆ ಸ್ಥಳೀಯ ಜನಪ್ರತಿನಿಧಿಗಳು, ತಾಲೂಕು ಆಡಳಿತ ಮತ್ತು ಜಿಲ್ಲಾಡಳಿತ ಅಗತ್ಯ ಮುತುವರ್ಜಿ ವಹಿಸಿ, ಯಾವುದೇ ಪ್ರಾಣಹಾನಿ, ಕೃಷಿ ಹಾನಿಯಾಗದಂತೆ ಮುಂಜಾಗ್ರತಾ ಕ್ರಮ ಕೈಗೊಂಡು ಕಾಮಗಾರಿ ನಡೆಸಬೇಕು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.

ಆಮೆಗತಿಯ ಕಾಮಗಾರಿಯಿಂದ ಈ ಬಾರಿ ಮಳೆಗಾಲ ನಮಗೆ ದುರ್ದೆಸೆಯ ಕಾಲ ಆಗದಿದ್ದರೆ ಸಾಕು. ಸೇತುವೆ ಪಕ್ಕದಲ್ಲಿ ತತ್ಕಾಲಕ್ಕೆ ನಿರ್ಮಾಣ ಮಾಡಿರುವ ಮಣ್ಣಿನ ರಸ್ತೆಯಲ್ಲಿ ಸಂಚರಿಸುವುದೇ ಪ್ರಯಾಸಕರ. ದ್ವಿಚಕ್ರ ವಾಹನ ಸವಾರರಿಗೆ ಮತ್ತು ಪಾದಚಾರಿಗಳಿಗೆ ಜಾರಿ ಬೀಳುವ ಭಯವಾದರೆ, ಉಳಿದ ವಾಹನಗಳು ಸಂಚರಿಸುವಾಗ ಪಕ್ಕದವರ ವಾಹನಗಳಿಗೆ ಕೆಸರಿನ ಅಭಿಷೇಕವಾಗಲಿದೆ. ನಿಗದಿತ ಅವಧಿಯೊಳಗೆ ಮುಗಿಸಲಾಗದ ಕಾಮಗಾರಿಯಿಂದ ಎಲ್ಲರೂ ತೊಂದರೆ ಅನುಭವಿಸುವಂತಾಗಿದೆ. ಸಂಬಂಧಿಸಿದ ಅಧಿಕಾರಿಗಳು, ಜನಪ್ರತಿನಿಧಿಗಳು ಇತ್ತ ಕಡೆ ಗಮನಕೊಟ್ಟರೆ ಒಳ್ಳೆಯದು. ವೈ.ಮಂಗೇಶ ಶ್ಯಾನುಭಾಗ್ ವಕೀಲರು, ಬೈಂದೂರು

— ವೈ.ಮಂಗೇಶ ಶ್ಯಾನುಭಾಗ್ ವಕೀಲರು, ಬೈಂದೂರು