ನಿದ್ದೆಗೆ ಜಾರಿದ ನಗರ 'ಕುಟುಂಬ' ಕಲ್ಯಾಣ ಕೇಂದ್ರ

ಉಡುಪಿ ನಗರದ ಕುಕ್ಕಿಕಟ್ಟೆ ಡಯಾನಾ ಚಿತ್ರಮಂದಿರದ ಮುಂಭಾಗದಲ್ಲಿರುವ 'ನಗರ ಕುಟುಂಬ ಕಲ್ಯಾಣ ಕೇಂದ್ರ'ದ ಬಾಗಿಲು ಮುಚ್ಚಿರುವುದು.

Published on:

16 Feb 2026, 2:55 pm

* ವೈದ್ಯ-ಸಿಬ್ಬಂದಿಗೆ ಲಭಿಸಿಲ್ಲ 6 ತಿಂಗಳಿಂದ ವೇತನ

* ಬಡರೋಗಿಗಳಿಗೆ ಸಿಗದ ಆರೋಗ್ಯ ಸೇವೆ

ಉಡುಪಿ: ನಗರದ ಕುಕ್ಕಿಕಟ್ಟೆ ಡಯಾನಾ ಚಿತ್ರಮಂದಿರದ ಮುಂಭಾಗದಲ್ಲಿ 20 ವರ್ಷದಿಂದ ಬಡ ರೋಗಿಗಳಿಗೆ ಆರೋಗ್ಯ ಸೇವೆ ನೀಡುತ್ತಿದ್ದ 'ನಗರ ಕುಟುಂಬ ಕಲ್ಯಾಣ ಕೇಂದ್ರ' ನಿದ್ದೆಗೆ ಜಾರಿದೆ. ಕಳೆದ ಐದಾರು ತಿಂಗಳಿಂದ ಆರೋಗ್ಯ ಸೇವೆ ಸ್ಥಗಿತಗೊಂಡಿದ್ದು, ಬಾಗಿಲಿಗೆ ಬೀಗ ಜಡಿಯಲಾಗಿದೆ.

ಶಿಶುಗಳಿಗೆ ಲಸಿಕೆ, ಚುಚ್ಚುಮದ್ದು ಹಾಗೂ ಗರ್ಭಿಣಿಯರ ತಪಾಸಣೆ, ಅಗತ್ಯ ಚಿಕಿತ್ಸೆಗಳು ಕ್ಲಪ್ತ ಸಮಯದಲ್ಲಿ ಇಲ್ಲಿ ದೊರಕುತ್ತಿತ್ತು. ಆದರೆ, ಕಲ್ಯಾಣ ಕೇಂದ್ರ ಮುಚ್ಚಿದ್ದರಿಂದ ಪರಿಸರದ ಸುತ್ತಮುತ್ತಲಿನ ನಾಗರಿಕರಿಗೆ ಚಿಕಿತ್ಸೆ ಪಡೆಯಲು ತೊಡಕಾಗುತ್ತಿದೆ.

ರೋಗಿಗಳಿಗೆ ನುಂಗಲಾರದ ತುತ್ತು

ಜ್ವರಭಾದೆ, ಶೀತ, ಕೆಮ್ಮು ಇನ್ನಿತರ ಸಣ್ಣಪುಟ್ಟ ಕಾಯಿಲೆಯಿಂದ ಬಳಲುತ್ತಿದ್ದ ರೋಗಿಗಳಿಗೆ ಸೂಕ್ತ ಚಿಕಿತ್ಸೆ ಪಡೆಯಲು ಈ ಕೇಂದ್ರವು ಪ್ರಯೋಜನಕಾರಿಯಾಗಿತ್ತು. ಇದೀಗ ಆರೋಗ್ಯ ಕೇಂದ್ರಕ್ಕೆ ಬಾಗಿಲು ಹಾಕಿದ್ದರಿಂದ ರೋಗಿಗಳು ನಗರದ ಖಾಸಗಿ ಆಸ್ಪತ್ರೆಗಳಿಗೆ ತೆರಳಿ ಹಣತೆತ್ತು ಚಿಕಿತ್ಸೆ ಪಡೆಯಬೇಕಾದ ಪರಿಸ್ಥಿತಿ ಬಂದಿದೆ. ಚಿಕ್ಕ ಮಕ್ಕಳಿಗೆ ಲಸಿಕೆ ಹಾಕಿಸಲು ಬಂದರೆ ಇಲ್ಲಿ ಲಸಿಕೆಯೂ ಇಲ್ಲ. ಇದು ಇಲ್ಲಿಗೆ ಬರುವ ಬಡ ಕುಟುಂಬಗಳಿಗೆ ನುಂಗಲಾರದ ತುತ್ತಾಗಿದೆ.

ಆಸ್ಪತ್ರೆ ಪುನರಾರಂಭಿಸಲು ಆಗ್ರಹ

ಬಡರೋಗಿಗಳಿಗೆ ಪ್ರಯೋಜನವಾಗಲೆಂದು ಸರ್ಕಾರ ಉಚಿತ ಚಿಕಿತ್ಸಾ ಸೇವೆ ಒದಗಿಸಲು ನಗರ ಭಾಗದಲ್ಲೂ 'ನಗರ ಕುಟುಂಬ ಕಲ್ಯಾಣ ಕೇಂದ್ರ' ತೆರೆದಿದೆ. ಆದರೆ, ಉಡುಪಿಯಲ್ಲಿ ನಾಗರಿಕ ಸಮಾಜಕ್ಕೆ ಇಲ್ಲಿನ ಕೇಂದ್ರದ ಲಾಭ ಲಭಿಸುತ್ತಿಲ್ಲ. ಇದರ ಪ್ರಯೋಜನ ಸಿಗುವಂತೆ ಮಾಡುವುದು ಆಡಳಿತ ವ್ಯವಸ್ಥೆಯ ಕರ್ತವ್ಯವಾಗಿದೆ. ಜಿಲ್ಲಾಡಳಿತ, ಜಿಲ್ಲಾ ಆರೋಗ್ಯ ಇಲಾಖೆ ಅಧಿಕಾರಿಗಳು ಸ್ಥಗಿತಗೊಂಡಿರುವ ಈ ಕೇಂದ್ರವನ್ನು ಪುನಾರಂಭಿಸಬೇಕು ಎಂದು ಉಡುಪಿ ಜಿಲ್ಲಾ ನಾಗರಿಕ ಸಮಿತಿಯ ಕಾರ್ಯಕರ್ತ ತಾರಾನಾಥ್ ಮೇಸ್ತ ಶಿರೂರು ಆಗ್ರಹಿಸಿದ್ದಾರೆ.

ಆರೋಗ್ಯ ಕ್ಷೇತ್ರದಲ್ಲಿ ಉಡುಪಿ ಮುಂಚೂಣಿಯಲ್ಲಿರುವ ಜಿಲ್ಲೆ. ಆದರೆ, ಉಡುಪಿ ನಗರ ಭಾಗದಲ್ಲೇ ಇರುವ ಈ ಕುಟುಂಬ ಕಲ್ಯಾಣ ಕೇಂದ್ರ ಕೆಲ ತಿಂಗಳಿಂದ ಬಂದ್ ಆಗಿದೆ. ಯಾವ ಕಾರಣದಿಂದ ಸ್ಥಗಿತ ಮಾಡಿದ್ದಾರೆ ಎಂಬ ಕಾರಣ ತಿಳಿದಿಲ್ಲ. ಇದರಿಂದ ಬಡ ರೋಗಿಗಳಿಗೆ ತೊಂದರೆ ಆಗುತ್ತಿದೆ. ಸಂಬಂಧಿತ ಇಲಾಖೆ ಅಧಿಕಾರಿಗಳು ಸ್ಥಗಿತಗೊಂಡಿರುವ ಈ ಕೇಂದ್ರ ಆರಂಭಿಸಿ ಇಲ್ಲಿ ಮತ್ತೆ ಆರೋಗ್ಯ ಸೇವೆ ಲಭಿಸುವಂತೆ ಕ್ರಮಕೈಗೊಳ್ಳಬೇಕು.

ಉಡುಪಿಯಲ್ಲಿರುವ ಈ ಆರೋಗ್ಯ ಘಟವು ಕೇಂದ್ರ ಸರ್ಕಾರದ ಅಧೀನಕ್ಕೊಳಪಟ್ಟಿದ್ದು ಅದನ್ನು ಜಿಲ್ಲಾ ಆರೋಗ್ಯ ಇಲಾಖೆ ವ್ಯಾಪ್ತಿಗೆ ಸೇರ್ಪಡಿಸಲಾಗುವುದು. ಅಲ್ಲಿ ಓರ್ವ ವೈದ್ಯರು ಹಾಗೂ 4 ಸಿಬ್ಬಂದಿ ಇದ್ದು, ಆರು ತಿಂಗಳಿಂದ ಅವರಿಗೆ ವೇತನ ಬಂದಿಲ್ಲ. ಜಿಲ್ಲಾ ಆರೋಗ್ಯಾಧಿಕಾರಿಯಾಗಿ ಅಲ್ಲಿರುವ ಸಮಸ್ಯೆ ತಿಳಿದು, ಕುಟುಂಬ ಕಲ್ಯಾಣ ಕೇಂದ್ರ ಪುನರಾರಂಭಕ್ಕೆ ತ್ವರಿತ ಕ್ರಮ ಕೈಗೊಳ್ಳಲು ರಾಜ್ಯ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗುವುದು.

Health