ಎಸ್​ಐಆರ್​ ಕಾರ್ಯ ಸರ್ಕಾರದ್ದಲ್ಲ, ಆಯೋಗದ್ದು

ಉಡುಪಿ: ಮತದಾನದ ಹಕ್ಕಿನಿಂದ ರಾಜ್ಯದ ಯಾವ ಮತದಾರರೂ ಕೂಡ ವಂಚಿತರಾಗಬಾರದು ಎನ್ನುವ ನಿಟ್ಟಿನಲ್ಲಿ ನಮ್ಮ ಸರ್ಕಾರ ಜನಜಾಗೃತಿ ಮೂಡಿಸುತ್ತಿದೆ. ಎಸ್​ಐಆರ್​ ಮಾಡುವುದು ಸರ್ಕಾರದ ಕೆಲಸವಲ್ಲ. ಅದನ್ನು ಚುನಾವಣಾ ಆಯೋಗ ಮಾಡುತ್ತಿದೆ. ಏನೇ ತಪ್ಪುಗಳಿದ್ದರೂ ಅಥವಾ ಸರಿಯಾಗಿ ನಡೆಯದಿದ್ದರೆ  ಚುನಾವಣಾ ಆಯೋಗಕ್ಕೆ ದೂರು ನೀಡಬೇಕು ಎಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಯು.ಟಿ. ಖಾದರ್​ ತಿಳಿಸಿದರು.

ಉಡುಪಿಯಲ್ಲಿ ಜಿಲ್ಲಾಧಿಕಾರಿ ಕಚೇರಿಯ ಬಳಿ ಶನಿವಾರ (ಜು.4) ಸಂಜೆ ಮಾಧ್ಯಮದವರೊಂದಿಗೆ ಮಾತನಾಡಿ. ಸರ್ಕಾರ ಕೇವಲ ಮಾಹಿತಿ ನೀಡುವ ಕಾರ್ಯ ಮಾತ್ರ ಮಾಡುತ್ತಿದೆ.ಎಸ್​ಐಆರ್​ ಫಾರಂಗಳನ್ನು ಸಾಮೂಹಿಕವಾಗಿ ವಿತರಿಸುವುದು ಅಥವಾ ಬೇರೆ ರೀತಿಯಲ್ಲಿ ನಡೆಯುತ್ತಿದೆ ಎಂಬ ಆರೋಪ ಕೇಳಿ ಬರುತ್ತಿದೆ. ಹಾಗಿದ್ದಲ್ಲಿ ಆಯೋಗಕ್ಕೆ ದೂರು ನೀಡಬೇಕು. ಇಲ್ಲಿ ಸರ್ಕಾರದ ಪಾತ್ರ ಏನೂ ಇಲ್ಲ ಎಂದರು.

ಟೌನ್​ಶಿಪ್​ ಅಗತ್ಯವಿದೆ. ತಂತ್ರಜ್ಞಾನ ಬೆಳೆಯುತ್ತಿದ್ದಂತೆ ಅದಕ್ಕೆ ಹೊಂದಿಕೊಳ್ಳಲೇಬೇಕಿದೆ. ತಂತ್ರಜ್ಞಾನ ಅಥವಾ ಅಭಿವೃದ್ಧಿ ಬೇಡವೆಂದರೆ ಹೇಗೆ? ಇಷ್ಟ ಇರುವ ರೈತರು ಭೂಮಿ ನೀಡಲಿದ್ದಾರೆ. ಟೌನ್​ಶಿಪ್​ ರಚನೆ ಕಾರ್ಯ ಸರ್ಕಾರ ಮಾಡಲಿದೆ. ಹೊಸ ರೇಷನ್​ ಕಾರ್ಡ್​ ವಿತರಣೆಗೂ ಚಿಂತನೆ ನಡೆಯುತ್ತಿದ್ದು, ಸರ್ಕಾರದ ಹಂತದಲ್ಲಿ ಕೆಲವೊಂದು ಕ್ರಮ ಆಗುತ್ತಿದೆ ಎಂದರು.

ಸಚಿವ ಸಂಪುಟ ವಿಸ್ತರಣೆ ಸಂಬಂಧಿಸಿದಂತೆ ಪಕ್ಷದ ಹೈಕಮಾಂಡ್​ ನಿರ್ಧಾರ ತೆಗೆದುಕೊಳ್ಳಲಿದ್ದಾರೆ ಎಂದರು.