ಜು.25ಕ್ಕೆ ಗುಜ್ಜಾಡಿ ನೆನಪುಗಳು ಕೃತಿ ಬಿಡುಗಡೆ

ಉಡುಪಿ: ಹಿರಿಯ ಸ್ವಯಂಸೇವಕ ಹಾಗೂ ಸ್ವರ್ಣ ಜುವೆರ್ಲಸ್​ ಸಂಸ್ಥಾಪಕ ದಿ. ಗುಜ್ಜಾಡಿ ನರಸಿಂಹ ನಾಯಕ್​ ಜನ್ಮಶತಮಾನೋತ್ಸವ ಅಂಗವಾಗಿ "ಗುಜ್ಜಾಡಿ ನೆನಪುಗಳು' ಕೃತಿಯ ಬಿಡುಗಡೆ ಸಮಾರಂಭ ಜುಲೈ 25ರಂದು ಬೆಳಿಗ್ಗೆ 10.30ಕ್ಕೆ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಸಭಾಭವನದಲ್ಲಿ ನಡೆಯಲಿದೆ ಎಂದು ನಗರಸಭೆ ಮಾಜಿ ಅಧ್ಯಕ್ಷ ಗುಜ್ಜಾಡಿ ಪ್ರಭಾಕರ್​ ನಾಯಕ್​ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಕಾರ್ಯವಾಹ ದತ್ತಾತ್ರೇಯ ಹೊಸಬಾಳೆ ಕೃತಿ ಬಿಡುಗಡೆ ಮಾಡಲಿದ್ದಾರೆ. ಲೆಕ್ಕಪರಿಶೋಧಕ ಕೆ. ಉಲ್ಲಾಸ್​ ಕಾಮತ್​, ವಿಶ್ವ ಹಿಂದೂ ಪರಿಷತ್​ನ ಎಂ.ಎನ್​.ನಾಗರಾಜ್​ ಹಾಗೂ ಎಒಜೆ ಮುಖ್ಯ ಸಂಪಾದಕ ಸುಮೇಶ್​ ವಾಧೇರಾ ಮುಖ್ಯ ಅತಿಥಿಗಳಾಗಿ ಭಾಗವಹಿಸಲಿದ್ದಾರೆ ಎಂದು ಮಾಹಿತಿ ನೀಡಿದರು.

ಪತ್ರಕರ್ತ ಸತೀಶ್​ ಮಲ್ಯ ಅವರು ದಿವಂಗತ ನರಸಿಂಹ ನಾಯಕ್​ ಅವರೊಂದಿಗೆ ನಡೆಸಿದ ಸಂದರ್ಶನಗಳ ಆಧಾರದ ಮೇಲೆ ಈ ಕೃತಿಯನ್ನು ಆತ್ಮಕಥನ ರೂಪದಲ್ಲಿ ಸಂಪಾದಿಸಲಾಗಿದೆ. ಪುಸ್ತಕದಲ್ಲಿ ಅವರ ವೈಯಕ್ತಿಕ ಮತ್ತು ಕೌಟುಂಬಿಕ ಜೀವನ, ವ್ಯಾಪಾರ ಕ್ಷೇತ್ರದಲ್ಲಿನ ಸಾಧನೆ ಹಾಗೂ ಸಾಮಾಜಿಕ ಬದುಕನ್ನು ಮೂರು ಪ್ರತ್ಯೇಕ ವಿಭಾಗಗಳಲ್ಲಿ ವಿವರಿಸಲಾಗಿದೆ ಎಂದು ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಸ್ವರ್ಣ ಜುವೆರ್ಲಸ್​ ಪ್ರವರ್ತಕರಾದ ರಾಮ್​ದಾಸ್​ ನಾಯಕ್​, ರಘುವೀರ್​ ನಾಯಕ್​, ದೀಪಕ್​ ಹಾಗೂ ಅಭಯ್​ ಉಪಸ್ಥಿತರಿದ್ದರು.