ತಾಲೂಕು ಕೇಂದ್ರಕ್ಕೆ ತಟ್ಟಿದ ಗ್ಯಾಸ್ ಬಿಸಿ

ಕಟ್ಟಿಗೆ ಒಲೆಯಲ್ಲಿ ಅಡುಗೆ ತಯಾರಿಸುತ್ತಿರುವುದು.

Published on:

22 Mar 2026, 1:27 pm

ಬಂಡೀಮಠ ಶಿವರಾಮ ಆಚಾರ್ಯ

ಜಾಗತಿಕ ಸಮಸ್ಯೆಯಾಗಿ ಪರಿಣಮಿಸಿದ ಗ್ಯಾಸ್ ಸರಬರಾಜು, ಪ್ರಸ್ತುತ ಗ್ರಾಮೀಣ ಭಾಗದ ಚಿಕ್ಕ ಕ್ಯಾಂಟೀನ್‌ನಿಂದ ಹಿಡಿದು ಬೃಹತ್ ಹೋಟೆಲ್ ತನಕ ಅದನ್ನೇ ನಂಬಿ ಬದುಕುವ ಅನೇಕರ ಬದುಕನ್ನು ತತ್ತರಗೊಳಿಸಿದೆ.

ತಾಲೂಕು ಕೇಂದ್ರವಾದ ಬ್ರಹ್ಮಾವರ ಪರಿಸರದಲ್ಲಿ ಅನೇಕ ವರ್ಷದಿಂದ ಬದುಕು ಕಟ್ಟಿಕೊಂಡು ಗಂಜಿ ಊಟ, ಮೀನು ಊಟ, ಸಂಜೆ ಹೊತ್ತಿಗೆ ಚಿಕ್ಕ ಪೆಟ್ಟಿಗೆ ಅಂಗಡಿಯಲ್ಲಿ ಆಹಾರ ತಯಾರಿಸಿ, ಹಲವರ ಹೊಟ್ಟೆ ತುಂಬಿಸಿ ಬದುಕು ಕಟ್ಟಿಕೊಂಡವರ ಬದುಕಿನ ಬಾಗಿಲು ಮುಚ್ಚಿದೆ.

ಉದ್ಯೋಗಿಗಳಿಗೆ ಸಮಸ್ಯೆ

ಗ್ಯಾಸ್ ಸರಬರಾಜು ಇಲ್ಲದೆ ಕಳೆದ 10 ದಿನದಿಂದ ಮುಚ್ಚಿರುವ ಹೋಟೆಲ್‌ನಿಂದ ಹಲವು ಉದ್ಯೋಗಿಗಳಿಗೆ ಒಂದು ಸಮಸ್ಯೆಯಾದರೆ ಪರ ಊರಿನಿಂದ ಉದ್ಯೋಗಕ್ಕೆ ಬಂದು ಒಂಟಿ ಜೀವನ ನಡೆಸಿ ಹೋಟೆಲ್ ಆಹಾರ ನಂಬಿಕೊಂಡವರಿಗೆ ತೀರ ಸಮಸ್ಯೆ ತಂದಿದೆ. ಮಧ್ಯಮ ವರ್ಗದ ಹೋಟೆಲ್ ಮಾಲೀಕರು, ಒಲೆ ಹಾಕಲು ಅನುಕೂಲ ಇರುವವರು ಕಟ್ಟಿಗೆಯಿಂದ ಆಹಾರ ಬೇಯಿಸಿ ಅತೀ ಅಗತ್ಯದ ಆಹಾರ ಮಾತ್ರ ತಯಾರಿಸಿ ಗ್ರಾಹಕರಿಗೆ ಸೇವೆ ನೀಡುತ್ತಿದ್ದು, ಎಷ್ಟು ದಿನ ಇದು ಮುಂದುವರಿಯುತ್ತದೆ ಎಂಬುದು ಪ್ರಶ್ನೆಯಾಗಿದೆ. ಗ್ಲೋಬಲ್ ಸಮಸ್ಯೆ ಲೋಕಲ್‌ಗೆ ಬಂದು ಜನ ಜೀವನಕ್ಕೆ ಕುತ್ತು ತಂದಿದೆ.

ಒಲೆಗಳ ಸಾಧಕ ಭಾದಕ

ನಗರ ಭಾಗದಲ್ಲಿ ತೀರ ಇಕ್ಕಟ್ಟು ಇರುವ ಜಾಗದಲ್ಲಿ ಒಲೆ ಹಾಕುವುದು ಕಷ್ಟ, ಅಡುಗೆ ಪಾತ್ರೆಗಳಿಗೆ ಮಸಿ ಹಚ್ಚುವುದು, ಪಾತ್ರೆ ತೊಳೆಯಲು ಹೆಚ್ಚು ನೀರಿನ ಬಳಕೆ ಬೇಕು. ಒಲೆಯ ಅಡುಗೆಯಿಂದ ಹೊಗೆ ಬರುವುದರಿಂದ ಹತ್ತಿರದವರ ಮನೆ ಗೋಡೆಗಳು ಕಪ್ಪಾದರೆ ಸಮಸ್ಯೆ ಹೆಚ್ಚು. ಹಲವು ವರ್ಷದಿಂದ ಗ್ಯಾಸ್ ಒಲೆಗೆ ನೆಚ್ಚಿಕೊಂಡು ಬಂದ ಕಾರ್ಮಿಕರಿಗೆ ಕಟ್ಟಿಗೆ ಒಲೆಯ ಅಡುಗೆಯೊಂದಿಗೆ ಪರದಾಡುವಂತಾಗಿದೆ.

ಹತ್ತು ದಿನದಿಂದ ಹೋಟೆಲ್ ಹೊರಗಡೆ ಒಲೆ ಹಾಕಿ ಕೆಲವೊಂದು ಆಹಾರ ತಯಾರಿಸಿ ಗ್ರಾಹಕರಿಗೆ ನೀಡಲಾಗುತ್ತಿದೆ. 35 ವರ್ಷದಿಂದ ಹೋಟೆಲ್ ಉದ್ಯಮ ನಂಬಿಕೊಂಡು ಬಂದ ಹಲವು ಮಂದಿಗೆ, ಉದ್ಯೋಗದಿಂದ ಪ್ರತಿ ದಿನ ಹೋಟೆಲ್ ನಂಬಿ ಬರುವ ಗ್ರಾಹಕರಿಗಾಗಿ ಸಾಧ್ಯವಾದಷ್ಟು ದಿನ ಮುಂದುವರಿಸುತ್ತೇವೆ.

ಬ್ರಹ್ಮಾವರ ನಗರ ಭಾಗದ ಹೋಟೆಲ್‌ನಲ್ಲಿ ಕೆಲಸ ಮಾಡುತ್ತಿದ್ದೇನೆ. ನನ್ನಂತೆ 20 ಮಂದಿ ಹತ್ತು ದಿನದಿಂದ ಕೆಲಸ ಇಲ್ಲದೆ ಇದ್ದೇವೆ. ನಮಗೆ ಹೋಟೆಲ್ ಕೆಲಸ ಬಿಟ್ಟು ಬೇರೆ ಕೆಲಸ ತಿಳಿದಿಲ್ಲ. ಗ್ಯಾಸ್ ಇಲ್ಲದೆ ಹೋಟೆಲ್ ಬಂದ್ ಆದ ಕಾರಣ ಜೀವನ ಕಷ್ಟವಾಗಿದೆ.

Center