ಉಡುಪಿ: ತಿಂಗಳಿಂದ ಬಿಸಿಲ ಝಳ ಹೆಚ್ಚುತ್ತಿದ್ದು ಇದರ ನಡುವೆ ವಿದ್ಯುತ್​ ಸಹ ಆಗಾಗ ಕೈಕೊಡುತ್ತಿದ್ದು, ಜನರು ಇನ್ನಷ್ಟು ಸಂಕಷ್ಟ ಅನುಭವಿಸುವಂತಾಗಿದೆ. ವಿದ್ಯುತ್​ ವ್ಯತ್ಯಯದ ಸೂಚನೆಯ ಹೊರತಾಗಿಯೂ ಸಹ ಮತ್ತೆ ಯಾವುದೇ ಪೂರ್ವ ಸೂಚನೆಯಿಲ್ಲದೆ ಮೆಸ್ಕಾಂನವರು ಯಾವುದೇ ವೇಳೆಯಲ್ಲಾದರೂ ವಿದ್ಯುತ್​ ಸ್ಥಗಿತ ಮಾಡುತ್ತಿದ್ದು, ಜನರಿಗೆ ಸಮಸ್ಯೆಯಾಗತೊಡಗಿದೆ. 

ಮಂಗಳವಾರ ನಿರ್ವಹಣಾ ಕಾರ್ಯದ ನಿಮಿತ್ತ ಬೆಳಗ್ಗೆ 9:30ರಿಂದ ಸಂಜೆ 5ರ ವರೆಗೆ ವಿದ್ಯುತ್​ ಸ್ಥಗಿತ ಮಾಡುವುದನ್ನು ಮೆಸ್ಕಾಂ ವಾಡಿಕೆ ಮಾಡಿಕೊಂಡಿದೆ. ಇದರ ಹೊರತಾಗಿಯೂ ಅನ್ಯ ದಿನಗಳಲ್ಲಿಯೂ ಸಹ ಪ್ರತಿದಿನ ಬೆಳಗ್ಗೆ 10 ಗಂಟೆಯ ವೇಳೆಯಲ್ಲಿ ಮುಂದಿನ ಗಂಟೆಗಳ ಕಾಲ ಹಾಗೂ ಸಂಜೆ ಮತ್ತು ರಾತ್ರಿ ವೇಳೆಯಲ್ಲೂ ಕರೆಂಟ್​ ತೆಗೆಯುತ್ತಿದ್ದು ಜನರಿಗೆ ನಿದ್ದೆ ಮಾಡಲೂ ತೊಡಕಾಗುತ್ತಿದೆ. ಸೆಕೆಯ ದಗೆಯಿಂದ ಹಾಗೂ ಸೊಳ್ಳೆಯಿಂದ ರಕ್ಷಿಸಿಕೊಳ್ಳಲು ಫ್ಯಾನ್​, ಎಸಿ, ಕೂಲರ್​ ಇನ್ನಿತರ ತಂಪು ಸಾಧನಗಳನ್ನು ಚಾಲ್ತಿಯಲ್ಲಿ ಇಟ್ಟುಕೊಳ್ಳಲು ಸಾಧ್ಯವಾಗುತ್ತಿಲ್ಲ ಎಂದು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಉಡುಪಿ ನಗರದ ಪ್ರಮುಖ ಸ್ಥಳವಾದ ಇಂದ್ರಾಳಿ, ಕುಂಜಿಬೆಟ್ಟು, ಈಶ್ವರ ನಗರ, ಮಣಿಪಾಲ ಇನ್ನಿತರ ಕಡೆಗಳಲ್ಲಿ ಯಾವುದೇ ಅವಧಿಯಲ್ಲಾದರೂ ವಿದ್ಯುತ್​ ಸ್ಥಗಿತ ಮಾಡಲಾಗುತ್ತಿದೆ. ಮಳೆ-ಗಾಳಿ ಇಲ್ಲದಿದ್ದರೂ ಸಹ ರಾತ್ರಿ 12 ಗಂಟೆಯ ಬಳಿಕ, ನಸುಕಿನ 4 ಗಂಟೆಯಿಂದ 6 ಗಂಟೆ ಹೀಗೆ ಮನ ಬಂದಂತೆ ಲೋಡ್​ ಶೆಡ್ಡಿಂಗ್​ ಮಾಡುತ್ತಿದ್ದಾರೆ. ಮಣಿಪಾಲ ಭಾಗದಲ್ಲಿರುವ ಬೃಹತ್​ ಕೈಗಾರಿಕಾ ವಲಯ ಹಾಗೂ ಉಡುಪಿ ನಗರದ ಭಾಗದಲ್ಲಿರುವ ಹೋಟೆಲ್​ ಇನ್ನಿತರ ವಾಣಿಜ್ಯಾತ್ಮಕ ಚಟುವಟಿಕೆಗಳ ಕಾರ್ಯಗಳಿಗೆ ತೊಡಕುಂಟಾಗುತ್ತಿದೆ.

ಮಳೆ, ಗಾಳಿ ಅಥವಾ ಇನ್ಯಾವುದೇ ಹವಾಮಾನ ವೈಪರೀತ್ಯ ಇಲ್ಲದಿದ್ದಾಗಲೂ ಸಹ ಅನಗತ್ಯವಾಗಿ ವಿದ್ಯುತ್​ ಸ್ಥಗಿತ ಮಾಡುವುದು ಎಷ್ಟು ಸರಿ? ಇನ್​ವರ್ಟರ್​ ವ್ಯವಸ್ಥೆ ಇಲ್ಲದವರು, ಮಧ್ಯಮ ವರ್ಗದವರು ರಾತ್ರಿ ವೇಳೆ ತೊಂದರೆ ಅನುಭವಿಸುವಂತಾಗಿದೆ. ಯಾವುದೇ ತೊಂದರೆ ಇಲ್ಲದಿದ್ದಾಗಲೂ ವಿದ್ಯುತ್​ ಕಡಿತ ಮಾಡದಂತೆ ನಗರ ವಾಸಿಗರು ಮೆಸ್ಕಾಂಗೆ ವಿನಂತಿಸಿದ್ದಾರೆ.

"

ನಿಟ್ಟೂರು ಸ್ಟೇಶನ್​ ವ್ಯಾಪ್ತಿಯಲ್ಲಿ ಟ್ರಾನ್ಸ್​ಫಾರ್ಮರ್​ ಕೆಟ್ಟಿದ್ದರಿಂದ ಉಡುಪಿ ಭಾಗದಲ್ಲಿ ವಿದ್ಯುತ್​ ವ್ಯತ್ಯಯಗೊಂಡಿತ್ತು. ಇದೀಗ ದುರಸ್ತಿ ಮಾಡಲಾಗಿದೆ. ಅಲ್ಲದೆ, ಎಲ್ಲೆಡೆ ಕಂಬ, ತಂತಿ ನಿರ್ವಹಣೆ ಮಾಡಲು ಸೂಕ್ತ ಗ್ಯಾಂಗ್​ಮನ್​ಗಳನ್ನು ಹಾಗೂ ವಾಹನಗಳನ್ನೂ ಪೂರೈಸಲಾಗಿದೆ. ಎಲ್ಲಿಯಾದರೂ ದಿಢೀರನೆ ಸಮಸ್ಯೆಯಾದರೆ ಅನಿವಾರ್ಯವಾಗಿ ವಿದ್ಯುತ್​ ಕಡಿತ ಮಾಡಬೇಕಾಗುತ್ತದೆ.

— ರಾಕೇಶ್​ ಬೇಕಲ್​. ಉಡುಪಿ ಜಿಲ್ಲಾ ಮೆಸ್ಕಾಂನ ಅಧೀಕ್ಷಕ ಇಂಜಿನಿಯರ್​.