ಉಡುಪಿ: ವ್ಯವಸ್ಥೆಯ ಕೊರತೆಯಿಂದಾಗಿ ಯಾರೂ ಸಹ ಕಣ್ಣಿನ ಚಿಕಿತ್ಸೆಯಿಂದ ವಂಚಿತರಾಗಬಾರದು. ದೃಷ್ಟಿ ಎನ್ನುವುದು ವಿಶೇಷಾಧಿಕಾರವಲ್ಲ. ಅದೊಂದು ಜೀವನದ ಅಗತ್ಯತೆ. ಅಂಧತ್ವದ ನಿವಾರಣೆಯಿಂದ ಕೋಟ್ಯಂತರ ಭಾರತೀಯರ ಶೈಕ್ಷಣಿಕ ಉನ್ನತಿ, ಉತ್ಪಾದಕತೆ ಹೆಚ್ಚಳ, ಗೌರವ, ಜೀವನಮಟ್ಟ ಹೆಚ್ಚಿಸಬಹುದಾಗಿದೆ. ಹೀಗಾಗಿ ಸರ್ಕಾರ ಮತ್ತು ಸರ್ಕಾರೇತರ ಸಂಸ್ಥೆಗಳು ದೇಶಾದ್ಯಂತ ನೇತ್ರ ಚಿಕಿತ್ಸೆಗೆ ವಿಶೇಷ ಸೌಲಭ್ಯ, ಅವಕಾಶ ನೀಡಬೇಕಿದ್ದು ರಾಷ್ಟ್ರೀಯ ಆಂದೋಲನವಾಗಬೇಕಿದೆ ಎಂದು ಪ್ರಸಾದ್​ ನೇತ್ರಾಲಯ ಸಮೂಹ ಕಣ್ಣಿನ ಆಸ್ಪತ್ರೆಗಳ ವೈದ್ಯಕೀಯ ನಿರ್ದೇಶಕ ಹಾಗೂ ನೇತ್ರಜ್ಯೋತಿ ಚಾರಿಟೇಬಲ್​ ಟ್ರಸ್ಟ್​ನ ಡಾ. ಕೃಷ್ಣಪ್ರಸಾದ್​ ಕೂಡ್ಲು ಆಶಯ ವ್ಯಕ್ತಪಡಿಸಿದರು.

ಪ್ರಧಾನಿ ನರೇಂದ್ರ ಮೋದಿ 76ನೇ ಜನ್ಮದಿನ ಹಾಗೂ ರಾಜಕೀಯ ಜೀವನದ 25 ವರ್ಷದ ನಿಮಿತ್ತ ಅವರ ಹುಟ್ಟೂರಾದ ಗುಜರಾತ್​ ರಾಜ್ಯದ ವಡ್​ ನಗರದಲ್ಲಿ ಪ್ರಸಾದ್​ ನೇತ್ರಾಲಯ ಹಾಗೂ ನೇತ್ರ ಜ್ಯೋತಿ ಚಾರಿಟೇಬಲ್​ ಟ್ರಸ್ಟ್​ ವತಿಯಿಂದ ಹಾಗೂ ಸವೋರ್ದಯ ಸೇವಾ ಟ್ರಸ್ಟ್​ ಆಹ್ಮದಾಬಾದ್​, ಒನ್​ ಸೈಟ್​ ಎಸ್ಸಿಲಾರ್​ ಲಕ್ಸೋಟಿಕಾ ಫೌಂಡೇಷನ್​ ಬೆಂಗಳೂರು ಸಹಕಾರದಲ್ಲಿ ಗುರುವಾರ (ಸೆ.18) ಆಯೋಜಿಸಿದ್ದ ನೇತ್ರ ಉಚಿತ ತಪಾಸಣೆ, ಉಚಿತ ಕನ್ನಡಕ ವಿತರಣೆ ಹಾಗೂ ಶಸ್ತ್ರಚಿಕಿತ್ಸಾ ಶಿಬಿರದಲ್ಲಿ ಮಾತನಾಡಿದರು.

ಪ್ರಧಾನಿ ಮೋದಿಯ ಸಹೋದರ ಪುತ್ರ, ಸವೋರ್ದಯ ಸೇವಾ ಟ್ರಸ್ಟ್​ನ ಜೀತುಭಾಯ್​ ಮೋದಿ ಮಾತನಾಡಿ, ಪ್ರಸಾದ್​ ನೇತ್ರಾಲಯವು 6 ವರ್ಷದಿಂದ ನರೇಂದ್ರ ಮೋದಿ ಅವರ ಜನ್ಮದಿನದಂದು ನಡೆಸುತ್ತಿರುವ ನೇತ್ರ ಆರೋಗ್ಯ ಶಿಬಿರವು ಮಾದರಿ ಜನಸೇವೆಯಾಗಿದೆ. ಯಾವುದೇ ಫಲಾಪೇಕ್ಷೆಯಿಲ್ಲದೆ ದೂರದ ಉಡುಪಿಯಿಂದ ಗುಜರಾತ್​ಗೆ ಬಂದು ಶಿಬಿರ ನಡೆಸುವುದು ಸಾಮಾನ್ಯ ಕೆಲಸವಲ್ಲ. ಅವರ ಈ ಶ್ರಮ ಅಭಿನಂದನಾರ್ಹ ಎಂದರು.

ವಡ್​ ತಾಪಂ ಅಧ್ಯಕ್ಷ ಜಶುಭಾಯ್​ ಚೌಧರಿ, ಎಪಿಎಂಸಿ ಅಧ್ಯಕ್ಷ ರಾಮ್​ಜಿ ಭಾಯ್​ ಚೌಧರಿ, ನೇತ್ರ ವಿಭಾಗ ಮುಖ್ಯಸ್ಥ ಡಾ. ದೀಪಕ್​ ಪಟೇಲ್​, ಜಿಎಂಇಆರ್​ಎಸ್​ ಮೆಡಿಕಲ್​ ಕಾಲೇಜ್​ನ ಸೂಪರಿಂಟೆಂಡೆಂಟ್​ ಡಾ. ಸುನೀಲ್​ ಓಝಾ, ಡಾ. ಮುಖೇಶ್​ ವೋರಾ, ಡಾ. ರಸ್ಮಿನ್​ ಕಲ್​ಸ್ವಾ, ಡಾ. ಇಮ್ರೀನ್​ ಬನ್ವಾ, ಜಿಲ್ಲಾ ಸಚಿವ ಕಮಲ್​ಭಾಯ್​ ಪಟೇಲ್​, ಸಮಾಜ ಸೇವಕ ಗೋವಿಂದ್​ಭಾಯ್​ ಪರಮಾರ್​, ಪಾರುಲ್​ ಬೆನ್​ ಓಝಾ ಪಾಲ್ಗೊಂಡಿದ್ದರು.

ಪ್ರಧಾನಿ ಮೋದಿ ಅವರ ಹಿರಿಯ ಸಹೋದರ ಸೋಮ್​ಭಾಯ್​ ಮೋದಿ ಶಿಬಿರ ಉದ್ಘಾಟಿಸಿ, ಫಲಾನುಭವಿಗಳಿಗೆ ಕನ್ನಡಕ ವಿತರಿಸಿದರು. ವಿಸ್​ನಗರದ ಜ್ಯೋತಿ ಹಾಸ್ಪಿಟಲ್​ ಸಹಕಾರದಲ್ಲಿ ನೇತ್ರ ದಾನ, ಅಂಗಾಂಗ ದಾನ ವಾಗ್ದಾನ ಮತ್ತು ರಕ್ತದಾನ ಕಾರ್ಯಕ್ರಮ ನಡೆಯಿತು. ಶಿಬಿರದಲ್ಲಿ 720 ಜನರ ನೇತ್ರ ತಪಾಸಣೆ ನಡೆಸಲಾಯಿತು. 534 ಜನರಿಗೆ ಉಚಿತ ಕನ್ನಡಕ ವಿತರಿಸಲಾಯಿತು. 92 ಜನರಿಗೆ ಉಚಿತವಾಗಿ ಶಸ್ತ್ರಚಿಕಿತ್ಸೆಗೆ ಗುರುತಿಸಲಾಯಿತು.

"