ಪೊಲೀಸ್ ಎಂದು ನಂಬಿಸಿ 11 ಲಕ್ಷ ರೂ. ವಂಚನೆ

ವಿಲ್ಲಿಯಮ್ ಪಾವ್ಲ್ ಕೊರೆ ಎಂಬುವರಿಗೆ ಜುಲೈ 28ರಂದು ಮಧ್ಯಾಹ್ನ 2ರ ಸುಮಾರಿಗೆ ಅಪರಿಚಿತನೊಬ್ಬ ಮೊಬೈಲ್ ಕರೆ ಮಾಡಿದ್ದ. ಹಿಂದಿ ಭಾಷೆಯಲ್ಲಿ ಮಾತನಾಡಿ, ನಿಮ್ಮ ಹೆಸರಿನಲ್ಲಿ ಒಂದು ಸಿಮ್ ಕಾರ್ಡ್ ಇಶ್ಯೂ ಆಗಿದ್ದು, ಈ ನಂಬರ್ ಮೇಲೆ 20 ಕೇಸ್‌ಗಳು ದಾಖಲಾಗಿವೆ. ನೀವು ಜೆಸ್ಸಿ ಮೊಹಮ್ಮದ್ ಎಂಬುವರ ಮನಿ ಲಾಂಡ್ರಿಂಗ್ ಕೇಸ್‌ನಲ್ಲಿ ಭಾಗಿಯಾಗಿದ್ದೀರಿ ಎಂದು ಬೆದರಿಕೆ ಹಾಕಿದ್ದಾನೆ.

ತನ್ನನ್ನು ಮುಂಬೈನ ಕೊಲಬಾ ಪೊಲೀಸ್ ಠಾಣೆಯ ಸಬ್ ಇನ್‌ಸ್ಪೆಕ್ಟರ್ ಮ್ಯಾಥ್ಯೂ ಎಂದು ಪರಿಚಯಿಸಿಕೊಂಡ ವಂಚಕ, ಪ್ರಕರಣದಿಂದ ಪಾರಾಗಲು ತಕ್ಷಣ ಹಣ ವರ್ಗಾಯಿಸುವಂತೆ ಸೂಚಿಸಿದ್ದಾನೆ.

ಭಯಗೊಂಡ ವಿಲ್ಲಿಯಮ್ ಪಾವ್ಲ್ ಕೊರೆ ಯೂನಿಯನ್ ಬ್ಯಾಂಕ್‌ನ ತಮ್ಮ ಎರಡು ಖಾತೆಗಳಿಂದ ಹಂತ ಹಂತವಾಗಿ ಹಣ ವರ್ಗಾಯಿಸಿದ್ದಾರೆ. ಬುಧವಾರ 6 ಲಕ್ಷ ರೂ. ಹಾಗೂ ಗುರುವಾರ ಬೆಳಗ್ಗೆ 5 ಲಕ್ಷ ರೂ. ಹೀಗೆ ಒಟ್ಟು 11 ಲಕ್ಷ ರೂ.ಗಳನ್ನು ಖದೀಮರ ಖಾತೆಗೆ ವರ್ಗಾಯಿಸಿಕೊಂಡು ವಂಚಿಸಿದ್ದಾರೆ. ಈ ಬಗ್ಗೆ ಶಿರ್ವ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.