ಉಡುಪಿ: ಮಣಿಪಾಲದ ಹೋಟೆಲೊಂದರಲ್ಲಿ ಸ್ನೇಹಿತನೊಂದಿಗೆ ರಾತ್ರಿ ಊಟ ಮಾಡಿ ಬಳಿಕ ರಸ್ತೆ ದಾಟುತ್ತಿದ್ದ ವೇಳೆ ಯುವಕನೋರ್ವನಿಗೆ ಮಾರಣಾಂತಿಕವಾಗಿ ಹಲ್ಲೆ ನಡೆಸಿ ಪರಾರಿಯಾಗಿದ್ದ ಪ್ರಕರಣಕ್ಕೆ ಸಂಬಂಧಿಸಿ ನಾಲ್ವರು ಯುವಕರನ್ನು ಮಣಿಪಾಲ ಠಾಣೆ ಪೊಲೀಸರು ಮಂಗಳವಾರ (ಆ.4) ಬಂಧಿಸಿದ್ದಾರೆ.

ಶಿವಮೊಗ್ಗ ಜಿಲ್ಲೆಯ ಸೀಗೆಹಟ್ಟಿ ಕಲ್ಲಪನಕೆರೆಯ ಅಕ್ಷಯ್​ ಎಸ್​. ಆಮುರ್ಗಂ (21), ಶಿವಮೊಗ್ಗ ಪೇಟೆಯ ಹಾಲ್​ಕೊಳ ನಿವಾಸಿ ಪುನೀತ್​ ಎಸ್​. (21), ಶಿವಮೊಗ್ಗ ಪುರ್ಲೆಯ ಮಂಜುನಾಥ ಬಡಾವಣೆ ನಿವಾಸಿ ಶಮಂತ್​ ಕೆ.ಆರ್​. (21), ಶಿವಮೊಗ್ಗ ವಿನೋಬಾನಗರದ ಯಶವಂತ್​ ಬಿ.ಜೆ. (21) ಬಂಧಿತರು. 

ಬಂಧನಕ್ಕೊಳಗಾಗಿರುವ ಯುವಕರೆಲ್ಲರೂ ನಿಟ್ಟೆಯ ಇಂಜಿನೀಯರಿಂಗ್​ ಕಾಲೇಜಿನ ವಿದ್ಯಾರ್ಥಿಗಳೆಂದು ತನಿಖೆಯ ವೇಳೆ ತಿಳಿದುಬಂದಿದೆ. ಆರೋಪಿಗಳನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದು, ನ್ಯಾಯಾಂಗ ಬಂಧನ ವಿಧಿಸಲಾಗಿದೆ. ಮಣಿಪಾಲ ಠಾಣೆಯ ಪಿಎಸ್​ಐ ತಿಮ್ಮೇಶ್​ ಬಿ.ಎನ್​. ತನಿಖೆ ಮುಂದುವರಿಸಿದ್ದಾರೆ.

ಆ.2ರಂದು ರಾತ್ರಿ 11:50ಕ್ಕೆ ಉದ್ಯಾವರದ ಯಶ್​ರಾಜ್​ (22) ಎಂಬವರು ತನ್ನ ತಮ್ಮ ಪವನಕುಮಾರ್​ ಹಾಗೂ ಸ್ನೇಹಿತ ಶ್ರೇಯಸ್​ ಅವರೊಂದಿಗೆ ಮಣಿಪಾಲದಲ್ಲಿ ಊಟ ಮಾಡಿ ವಾಪಾಸ್​ ತೆರಳುತ್ತಿದ್ದರು. ಈ ವೇಳೆ ಹೆರ್ಗಾ ಗ್ರಾಮದ ಈಶ್ವರ ನಗರದಲ್ಲಿನ ಜನನಿ ಬಾರ್​ ಆ್ಯಂಡ್​  ರೆಸ್ಟೋರೆಂಟ್​ ಕಡೆಯಿಂದ ಪವನಕುಮಾರ್​ ರಸ್ತೆ ದಾಟುತ್ತಿದ್ದನು.

ಈ ವೇಳೆ ಸ್ವಿಫ್ಟ್ ಡಿಸೈರ್​ ಹಾಗೂ ಫೋರ್ಡ್​ ಕಾರಿನಲ್ಲಿ ಬಂದಿದ್ದ ಅಕ್ಷಯ್​, ಪುನೀತ್​, ಶಮಂತ್​ ಕೆ.ಆರ್​. ಹಾಗೂ ಯಶವಂತ್​ ಎಂಬವರು ಪವನಕುಮಾರ್​ನನ್ನು ತಡೆದು ನಿಲ್ಲಿಸಿ ತೀವ್ರವಾಗಿ ಹಲ್ಲೆ ನಡೆಸಿದ್ದರು. ಕಾಲಿನಿಂದ ತುಳಿದು, ಮೆಟಲ್​ ಪಂಚ್​ನಿಂದ ಆತನ ಮುಖಕ್ಕೆ ಗುದ್ದಿ,ಮೂಗಿಗೆ ತೀವ್ರ ಸ್ವರೂಪದಲ್ಲಿ ಗಾಯಗೊಳಿಸಿದ್ದರು.

ಹಲ್ಲೆ ತಡೆಯಲು ಯತ್ನಿಸಿದ ಸಹೋದರ ಹಾಗೂ ಆತನ ಸ್ನೇಹಿತ ಶ್ರೇಯಸ್​ ಅವರಿಗೂ ಕಾಲಿನಿಂದ ತುಳಿದು, ಬಟ್ಟೆಗಳನ್ನು ಹರಿದು, ಜೀವ ಬೆದರಿಕೆ ಹಾಕಿ ಕಾರಿನಲ್ಲಿ ಹೊರಟುಹೋಗಿದ್ದರು. ಘಟನೆ ಕುರಿತು ಯಶ್​ರಾಜ್​ ದೂರು ನೀಡಿದ್ದು, ಮಣಿಪಾಲ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.