ಜಾನಪದ ಹಾಡು ಭಾವನೆಗಳ ಮತ್ತೊಂದು ರೂಪ

ಜಾನಪದ ಕಲೆ, ಸಂಸ್ಕೃತಿ ಎಂಬುದು ಜನರಿಂದ ಮೌಖಿಕವಾಗಿ ಪಸರಿಸಿದ್ದಾಗಿದೆ. ಹಳ್ಳಿಗಾಡಿನ ಜನರ ಜೀವನ ಪದ್ಧತಿ, ಜೀವಿತಾವಧಿಯ ಅನುಭವ ಜಾನಪದ ಹಾಡುಗಳಲ್ಲಿ ಅಡಕವಾಗಿದೆ. ಜಾನಪದ ಹಾಡು ಭಾವನೆಗಳ ಮತ್ತೊಂದು ರೂಪವಾಗಿದ್ದು, ಅದರಲ್ಲಿ ಸಿಹಿ-ಕಹಿಯ ಹೂರಣಗಳಿವೆ ಎಂದು ಒಡಿಯೂರು ಸಂಸ್ಥಾನದ ಸಾಧ್ವಿ ಶ್ರೀ ಮಾತಾ ಅಮೃತಾನಂದಮಯಿ ಹೇಳಿದರು.

ಕರ್ನಾಟಕ ಜಾನಪದ ಪರಿಷತ್ ಉಳ್ಳಾಲ ತಾಲೂಕು ಘಟಕ ಪದಗ್ರಹಣ ಸಮಾರಂಭದಲ್ಲಿ ಮಾತನಾಡಿದರು. 18 ವರ್ಷ ಮೇಲ್ಪಟ್ಟ ಮಹಿಳೆಯರಿಗಾಗಿ ದ.ಕ. ಜಿಲ್ಲಾಮಟ್ಟದ ‘ಪದ ಪನ್ಕ-2026’ ಜಾನಪದ ಸಮೂಹ ಗಾಯನ ಸ್ಪರ್ಧೆ ಆಯೋಜಿಸಲಾಗಿತ್ತು.

ಕನೀರುತೋಟ ರಾಧಾ ಕೃಷ್ಣ ಭಜನಾ ತಂಡ-ಪ್ರಥಮ, ಯುಮುನಾ ಮರಳ ಕಲಾವೇದಿಕೆ-ದ್ವಿತೀಯ, ಗಾಯತ್ರಿ ಯೇನೆಪೋಯ ಮಹಿಳಾ ತಂಡ-ತೃತೀಯ ಬಹುಮಾನಕ್ಕೆ ಭಾಜನರಾದರು.

ಉಳ್ಳಾಲ ಶ್ರೀ ಚೀರುಂಭ ಭಗವತಿ ಕ್ಷೇತ್ರ ಆಡಳಿತ ಮೊಕ್ತೇಸರ ಸುರೇಶ್ ಭಟ್ನಗರ ಬಹುಮಾನ ವಿತರಿಸಿದರು. ಅಧ್ಯಕ್ಷ ಚಿದಾನಂದ ಗುರಿಕಾರ ಉಪಸ್ಥಿತರಿದ್ದರು.

ಬಿಜೆಪಿ ಜಿಲ್ಲಾಧ್ಯಕ್ಷ ಸತೀಶ್ ಕುಂಪಲ, ಸಹ್ಯಾದ್ರಿ ಕೋ-ಆಪರೇಟಿವ್ ಸೊಸೈಟಿ ಅಧ್ಯಕ್ಷ ಕೆ.ಟಿ.ಸುವರ್ಣ ಅಧ್ಯಕ್ಷತೆ ವಹಿಸಿದ್ದರು. ಪ್ರಗತಿಪರ ಕೃಷಿಕೆ ಮೀನಾಕ್ಷಿ ಸೀತಾರಾಮ ಶೆಟ್ಟಿ ಪಿಲಾರು ಮೇಗಿನಮನೆ, ಕೊಲ್ಯ ಶ್ರೀ ಮೂಕಾಂಬಿಕಾ ಕ್ಷೇತ್ರ ಅಧ್ಯಕ್ಷ ಚಂದ್ರಹಾಸ್ ಪಂಡಿತ್ ಹೌಸ್, ಉದ್ಯಮಿ ಪ್ರಕಾಶ್ ಅನ್ವಿತ್, ಜಾನಪದ ಪರಿಷತ್ ಜಿಲ್ಲಾಧ್ಯಕ್ಷ ಪಮ್ಮಿ ಕೊಡಿಯಾಲ್ ಬೈಲ್, ಕೊಲ್ಯ ಶಾರದಾ ಸೇವಾ ಟ್ರಸ್ಟ್ ಅಧ್ಯಕ್ಷ ಮೋಹನ್ ಶೆಟ್ಟಿ ಕುಂಪಲ, ಕರ್ನಾಟಕ ಜಾನಪದ ಪರಿಷತ್ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ರಾಜೇಶ್ ಸ್ಕೈಲಾರ್ಕ್, ತಾಲೂಕು ಘಟಕ ಪದಾಧಿಕಾರಿಗಳಾದ ಮೋಹನ್ ಶಿರ್ಲಾಲ್, ಜಯಪ್ರಕಾಶ್ ಜೋಗಿ, ಗೋಪಿನಾಥ್ ಬಗಂಬಿಲ, ಸಮೃದ್ಧ್ ಭಂಡಾರಿ, ನಮಿತ್ ಕುತ್ತಾರು, ಗಣೇಶ್ ಪಂಡಿತ್ ಮುಳಿಹಿತ್ಲು, ಮೋಹನ್ ಗಟ್ಟಿ ಕುತ್ತಾರು ಮೊದಲಾದವರು ಉಪಸ್ಥಿತರಿದ್ದರು.

ತಾಲೂಕು ಅಧ್ಯಕ್ಷ ಪ್ರವೀಣ್ ಎಸ್.ಕುಂಪಲ ಸ್ವಾಗತಿಸಿದರು. ಸಂಘಟನಾ ಕಾರ್ಯದರ್ಶಿ ಕಿರಣ್ ಕೊಲ್ಯ ವಂದಿಸಿದರು. ಪ್ರಧಾನ ಕಾರ್ಯದರ್ಶಿ ವಿಜೇತ್ ಶೆಟ್ಟಿ ಮಂಜನಾಡಿ, ಸಾಂಸ್ಕೃತಿಕ ಕಾರ್ಯದರ್ಶಿ ವಿಜಯಲಕ್ಷ್ಮೀ ಕಟೀಲು ನಿರೂಪಿಸಿದರು.