ತಾಲೂಕಿನಲ್ಲಿ ಬೇಸಾಯ ಚುರುಕು

ಮುಂಗಾರು ಕೊರತೆಯ ನಡುವೆಯೂ ಕಾಪು ತಾಲೂಕಿನಲ್ಲಿ ಭತ್ತ ಬೇಸಾಯ ಚುರುಕಿನಿಂದ ಸಾಗಿದ್ದು, ಶೇ.50ರಷ್ಟು ಬಿತ್ತನೆ ಪೂರ್ಣಗೊಂಡಿದೆ. ಕೃಷಿ ಇಲಾಖೆ ಪ್ರಸ್ತುತ ಹಂಗಾಮಿನಲ್ಲಿ ನಿಗದಿತ 2745 ಹೆಕ್ಟೇರ್ ಬೇಸಾಯದ ಗುರಿ ತಲುಪುವ ಆಶಾಭಾವನೆ ಹೊಂದಿದೆ.

ತಾಲೂಕಿನಲ್ಲಿ ಈ ಬಾರಿಯೂ ಎಂಒ4 ತಳಿ ಭತ್ತದ ಬೀಜಕ್ಕೆ ಹೆಚ್ಚಿನ ಬೇಡಿಕೆ ಕಂಡು ಬಂದಿದೆ. ಅದರ ಜತೆ ಅಲ್ಪಪ್ರಮಾಣದಲ್ಲಿ ಜ್ಯೋತಿ ತಳಿಯನ್ನೂ ಬೆಳೆಯಲಾಗುತ್ತಿದೆ. ಕೃಷಿ ಇಲಾಖೆಯಿಂದ 300 ಕ್ವಿಂಟಾಲ್ ಎಂ04 ಹಾಗೂ ಅಗತ್ಯವಿರುವಷ್ಟು ಜ್ಯೋತಿ ಬಿತ್ತನೆ ಬೀಜಕ್ಕೆ ಬೇಡಿಕೆ ಸಲ್ಲಿಸಲಾಗಿದ್ದು, ನಿರೀಕ್ಷಿತ ಪ್ರಮಾಣದಲ್ಲಿ ಬೀಜ ಪೂರೈಕೆಯೂ ಆಗಿದೆ. ರೈತರು ಅಗತ್ಯಕ್ಕೆ ತಕ್ಕಂತೆ ಬೀಜವನ್ನು ಖರೀದಿಸಿ ಬಿತ್ತನೆ ಕಾರ್ಯದಲ್ಲಿ ತೊಡಗಿದ್ದಾರೆ.

ತಾಲೂಕಿನ ಹೆಚ್ಚಿನ ರೈತರು ಯಾಂತ್ರೀಕೃತ ಬೇಸಾಯದಲ್ಲಿ ತೊಡಗಿಸಿಕೊಂಡಿದ್ದರೆ, ಕಾರ್ಮಿಕರು ಲಭ್ಯವಿರುವೆಡೆ ಸಾಂಪ್ರಾದಾಯಿಕ ನಾಟಿ ಕಾರ್ಯವೂ ಮುಂದುವರಿದಿದೆ. ಕಾರ್ಮಿಕರ ಕೊರತೆಯಿಂದ ಹೆಚ್ಚಿನ ಕೃಷಿಕರು ಭತ್ತ ಬಿತ್ತನೆ ನೆಚ್ಚಿಕೊಂಡರೆ, ಕೆಲವೆಡೆ ಚಾಪೆ ನೇಜಿ ಸಿದ್ಧಪಡಿಸಿ ಯಾಂತ್ರೀಕೃತ ನಾಟಿಯೂ ಸಾಗಿದೆ. ಇನ್ನು ಕೆಲ ರೈತರು ಸಸಿ ಮಡಿ ತಯಾರಿಸಿ ನೇಜಿ ನಾಟಿಗೆ ಮುಂದಾಗಿದ್ದಾರೆ.

ಕಳೆದ ಮುಂಗಾರು ಹಂಗಾಮಿಗೆ ಹೋಲಿಸಿದರೆ ಈ ಬಾರಿ ಬಿತ್ತನೆ ಬೀಜದ ಕೊರತೆ ಈವರೆಗೆ ಕಂಡು ಬಂದಿಲ್ಲ. ಬಯಲು ಪ್ರದೇಶಗಳಲ್ಲಿ ಬಿತ್ತನೆ ಚುರುಕಾಗಿದ್ದರೆ, ಮುಂಗಾರು ಮಳೆ ಕೊರತೆಯಿಂದ ಬೆಟ್ಟು ಗದ್ದೆಗಳಲ್ಲಿ ಬಿತ್ತನೆಗೆ ಹಿನ್ನೆಡೆಯಾಗುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ.

5 ವರ್ಷಗಳ ಹಿಂದೆ ತಾಲೂಕಿನಲ್ಲಿ ಮುಂಗಾರು ಹಂಗಾಮಿನಲ್ಲಿ 3147 ಹೆಕ್ಟೇರ್ ಭತ್ತ ಬೇಸಾಯವಾಗುತ್ತಿತ್ತು. ಪ್ರಸ್ತುತ ಅದು 2745 ಹೆಕ್ಟೇರ್‌ಗೆ ಇಳಿಕೆಯಾಗಿದ್ದು, ಕರೋನಾ ಸಂದರ್ಭದಲ್ಲಿ ಹಡಿಲು ಭೂಮಿ ಬೇಸಾಯ ಹೆಚ್ಚಳವಾಗಿದ್ದರೂ, ಇದೀಗ ಮತ್ತೆ ಹಡಿಲು ಭೂಮಿ ಹೆಚ್ಚಳ ಕಂಡು ಬರುತ್ತಿದೆ. ಯಂತ್ರೋಪಕರಣಗಳ ದುಬಾರಿ ಬಾಡಿಗೆ, ಕೂಲಿಕಾರರ ಕೊರತೆಯಿಂದ ರೈತರು ಭತ್ತದ ಕೃಷಿಯಿಂದ ವಿಮುಖರಾಗುತ್ತಿದ್ದಾರೆ. ಕೃಷಿ ಜಮೀನುಗಳು ಕೈಗಾರಿಕೆ ಮತ್ತು ಭೂ ಪರಿವರ್ತನೆಗೊಂಡು ನಿವೇಶನಗಳಾಗಿ ಮಾರ್ಪಾಡುಗೊಳ್ಳುತ್ತಿದೆ.

ಪ್ರಸ್ತುತ ಮುಂಗಾರು ಹಂಗಾಮಿನಲ್ಲಿ ಕಾಪು ತಾಲೂಕಿನಲ್ಲಿ 2745 ಹೆಕ್ಟೇರ್ ಭತ್ತ ಬೇಸಾಯದ ಗುರಿ ಹೊಂದಲಾಗಿದೆ. ಕಾಪು ರೈತ ಸಂಪರ್ಕ ಕೇಂದ್ರದಲ್ಲಿ ಎಂಒ4 ತಳಿ ಭತ್ತದ ಬೀಜ ಹಾಗೂ ಜ್ಯೋತಿ ಬೀಜ ಲಭ್ಯವಿದೆ. ಎಂಒ4 ತಳಿ 300 ಕ್ವಿಂಟಾಲ್ ಬೇಡಿಕೆ ಸಲ್ಲಿಸಿದ್ದು, ಸರಬರಾಜಾಗಿರುವ ಬೀಜದಲ್ಲಿ 265.25 ಕ್ವಿಂಟಾಲ್ ಮಾರಾಟವಾಗಿದೆ. ಜ್ಯೋತಿ ತಳಿ ಬೀಜ 10 ಕ್ವಿಂಟಾಲ್ ಪೂರೈಕೆಯಾಗಿದ್ದು, 4 ಕ್ವಿಂಟಾಲ್ ಮಾರಾಟವಾಗಿದೆ. ಸದ್ಯ 3 ಕ್ವಿಂಟಾಲ್ ಎಂ04 ಹಾಗೂ 6 ಕ್ವಿಂಟಾಲ್ ಜ್ಯೋತಿ ಬೀಜ ದಾಸ್ತಾನಿದೆ. ಬೀಜದ ಕೊರತೆಯಿಲ್ಲ.

— ಪುಷ್ಪಲತಾ ಕೃಷಿ ಅಧಿಕಾರಿ, ಕಾಪು