ಕಾಡಾನೆ ದಾಳಿಗೆ ಕೃಷಿಕರು ಕಂಗಾಲು

 ಮುಖಾರಿಮೂಲೆ ಭಾಗಕ್ಕೆ ಶನಿವಾರ ರಾತ್ರಿ ಕಾಡಾನೆಗಳು ದಾಳಿ ನಡೆಸಿದ್ದು, ಅಬ್ದುಲ್ ರಝಾಕ್, ಯೂಸುಫ್, ಹಸೈನಾರ್, ಬೀರಾಮೊಯ್ದೀನ್ ಅವರ ತೋಟಗಳಲ್ಲಿದ್ದ ಬಾಳೆಕೃಷಿ, ಅಡಕೆ, ಹಲಸು ಮರಗಳನ್ನು ನಾಶಪಡಿಸಿವೆ. ತೋಟಗಳಲ್ಲಿ ಅಳವಡಿಸಿದ್ದ ನೀರಿನ ಪೈಪ್‌ಗಳು ಕೂಡ ಕಾಡಾನೆಯ ತುಳಿತದಿಂದ ಒಡೆದಿವೆ. ಶುಕ್ರವಾರ ರಾತ್ರಿ ಕೂಡ ಈ ಭಾಗದ ತೋಟಗಳಿಗೆ ಕಾಡಾನೆಗಳು ದಾಳಿ ಮಾಡಿದ್ದವು. 

 ಕಳೆದ ವರ್ಷವೂ ಮುಖಾರಿಮೂಲೆ ಪ್ರದೇಶದ ಕೃಷಿಕರ ತೋಟಗಳಿಗೆ ಕಾಡಾನೆಗಳು ದಾಳಿ ನಡೆಸಿದ್ದವು. ಈ ಕುರಿತು ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಗ್ರಾಮಸ್ಥರು ಮಾಹಿತಿ ನೀಡಿದ್ದು, ಹಾನಿಯಾಗಿರುವ ಕುರಿತು ಅರ್ಜಿ ಸಲ್ಲಿಸುವಂತೆ ಅಧಿಕಾರಿಗಳು ತಿಳಿಸಿದ್ದರು. ಬಳಿಕ ಕೃಷಿಕರು ಸಲ್ಲಿಸಿದ ಅರ್ಜಿಗೆ ಇಲಾಖೆ ಕಡೆಯಿಂದ ಸ್ಪಂದನೆ ದೊರೆತಿರಲಿಲ್ಲ. ಜತೆಗೆ ಕಾಡು ಹಂದಿ, ಮಂಗಗಳ ಉಪಟಳವೂ ಮಿತಿಮೀರಿ ಕೃಷಿಕರಿಗೆ ಭಾರಿ ತೊಂದರೆಯಾಗುತ್ತಿದೆ ಎಂದು ಅಮ್ಚಿನಡ್ಕ ಕೃಷಿಕರು ದೂರಿದ್ದಾರೆ.