ಉಡುಪಿ

ಸೀತಾನದಿ ಉಪ್ಪು ನೀರಿಗೆ ಬ್ರೇಕ್!

ಕೋಡಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕನ್ಯಾಣದ ಕೃಷಿಕರು ಸ್ವತಃ ಹಣ ಕ್ರೋಡೀಕರಿಸಿ ತಾತ್ಕಾಲಿಕ ಹೊಳೆ ದಂಡೆ ನಿರ್ಮಿಸಲು ಮುಂದಾಗಿರುವುದು.
ಕೋಡಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕನ್ಯಾಣದ ಕೃಷಿಕರು ಸ್ವತಃ ಹಣ ಕ್ರೋಡೀಕರಿಸಿ ತಾತ್ಕಾಲಿಕ ಹೊಳೆ ದಂಡೆ ನಿರ್ಮಿಸಲು ಮುಂದಾಗಿರುವುದು.
Published on: 

ಪ್ರಮುಖ ಮುಖ್ಯಾಂಶಗಳು

  • ಕೋಡಿ ಗ್ರಾಮ ಪಂಚಾಯಿತಿ
  • ಸೀತಾ ನದಿ
  • ಉಪ್ಪು ನೀರು
  • ಕೃತಕ ನೆರೆ
ರವೀಂದ್ರ ಕೋಟ
ಕೋಡಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕನ್ಯಾಣ ಭಾಗದ ನೂರಾರು ಎಕರೆ ಕೃಷಿ ಭೂಮಿ ಸೀತಾ ನದಿಯ ಉಪ್ಪು ನೀರು ಆವರಿಸಿರುವುದರಿಂದ ಹಾನಿಗೊಳಗಾಗಿದೆ. ಇದರಿಂದಾಗಿ ಕೃಷಿ ಕಾಯಕದಿಂದ ಇಲ್ಲಿನ ಕೃಷಿಕರು ವಿಮುಖರಾಗುತ್ತಿದ್ದು, ಈ ಬಗ್ಗೆ ಜನಪ್ರತಿನಿಧಿಗಳಿಗೆ, ಜಿಲ್ಲಾಡಳಿತಕ್ಕೆ ಮನವಿ ನೀಡಿದರೂ ತುರ್ತು ಸ್ಪಂದನೆ ಲಭ್ಯವಾಗಿಲ್ಲ. ಇದನ್ನು ಖಂಡಿಸಿರುವ ರೈತ ಸಮುದಾಯ ಎದೆಗುಂದದೆ ಸ್ವಂತ ಖರ್ಚಿನಲ್ಲಿ ಹೊಳೆ ದಂಡೆ ನಿರ್ಮಿಸಲು ಮುಂದಾಗಿ ಮಾದರಿಯಾಗಿದ್ದಾರೆ.
ಕೃಷಿ ಕಾಯಕದಿಂದ ವಿಮುಖ: ಕೋಡಿ ಕನ್ಯಾಣ ಬಹುಭಾಗವನ್ನು ಸೀತಾನದಿ ಆವರಿಸಿದೆ. ಆ ಎಲ್ಲ ಭಾಗಗಳಲ್ಲಿ ಕೃಷಿ ಭೂಮಿಯೂ ಅಧಿಕವಿದೆ. ಆದರೆ ನದಿ ತಟ ಸುಭದ್ರವಾಗಿರದೆ ಪ್ರತಿ ವರ್ಷ ಕೃಷಿಭೂಮಿಗೆ ಉಪ್ಪು ನೀರು ನುಗ್ಗುತ್ತಿದೆ. ಇದರಿಂದ ಕಂಗೆಟ್ಟ ರೈತರು ಕೃಷಿ ಕಾಯಕದಿಂದ ವಿಮುಖರಾಗಿದ್ದು, ಹಸನಾಗಿದ್ದ ಕೃಷಿ ಭೂಮಿ ಹಡೀಲು ಬೀಳುವ ಸ್ಥಿತಿಯಲ್ಲಿವೆ.
ದೊರಕದ ಸ್ಪಂದನೆ: ಎಷ್ಟೇ ಬಾರಿ ಎಚ್ಚರಿಸಿದರೂ ಇಲಾಖೆ ಮತ್ತು ಜನಪ್ರತಿನಿಧಿಗಳು ಭರವಸೆ ನೀಡಿ ಕೃಷಿಕರನ್ನು ದಿಕ್ಕು ತಪ್ಪಿಸುತ್ತಿದ್ದಾರೆ ಎಂಬ ಆರೋಪಗಳು ಕೇಳಿಬಂದಿವೆ. ಹೆಚ್ಚಿನ ವ್ಯಾಪ್ತಿಯಲ್ಲಿ ಹೊಸ ರಸ್ತೆಗಳು ನಿರ್ವಾಣಗೊಂಡರೂ ಕೃಷಿಕರ ಬಹು ಬೇಡಿಕೆಯ ದಂಡೆ ನಿರ್ಮಿಸುವ ಕಾರ್ಯ ಮರೀಚಿಕೆಯಾಗಿದೆ. ಈ ನಿರ್ಲಕ್ಷೃ ಖಂಡಿಸಿ ಇತ್ತೀಚೆಗಷ್ಟೇ ಗ್ರಾಮಸ್ಥರು ಪ್ರತಿಭಟನೆ ನಡೆಸಿ, ಶಾಶ್ವತ ದಂಡೆ ನಿರ್ಮಿಸಲು ಆಗ್ರಹಿಸಿದ್ದರು. ಆದರೆ ಸೂಕ್ತ ಸ್ಪಂದನೆ ದೊರಕಿಲ್ಲ. ಇದರಿಂದ ಬೇಸತ್ತ ಕೃಷಿಕರು ಸ್ವಂತ ಹಣದಲ್ಲಿ ಹೊಳೆ ದಂಡೆ ನಿರ್ಮಿಸಲು ಮುಂದಾಗಿದ್ದಾರೆ.

ಹೂಳು ತುಂಬಿ ಕೃತಕ ನೆರೆ!

 ಕೋಡಿ ಕನ್ಯಾಣ ಭಾಗದಲ್ಲಿ ಹೊಳೆ ಸಂಪೂರ್ಣ ಹೂಳು ತುಂಬಿಕೊಂಡಿದೆ. ಹೊಳೆಯ ಮಧ್ಯ ಹಾಗೂ ತಟದಲ್ಲಿ ಕಾಂಡ್ಲ ಗಿಡಗಳು ಹೆಮ್ಮರವಾಗಿ ಬೆಳೆದು ನಿಂತಿದ್ದು, ಅದರ ಎಲೆ ಹಾಗೂ ಇತರ ತ್ಯಾಜ್ಯಗಳು ಹೊಳೆಯಲ್ಲಿ ನೀರಿನ ಸರಾಗ ಹರಿವಿಗೆ ಅಡ್ಡಿಯಾಗಿದೆ. ನದಿಯ ಹೂಳು ತೆಗೆಯದೆ ಹೊಳೆ ನೀರು ಕೃಷಿ, ಜನವಸತಿ ಪ್ರದೇಶದತ್ತ ನುಗ್ಗುತ್ತಿದೆ. ಇನ್ನೊಂದೆಡೆ ಕೃಷಿಕ ಕೃಷಿ ಕಾಯಕ ನಡೆಸಲಾಗದೆ ಕಂಗೆಟ್ಟಿದ್ದಾನೆ. ಹೀಗಾದರೆ ಕೃಷಿಕರ ಪಾಡು ಕೇಳುವರಾರು...? ಎಂಬ ಪ್ರಶ್ನೆ ಉದ್ಭವಿಸಿದೆ.


ಹಿಟಾಚಿ ಬಳಸಿ ತಾತ್ಕಾಲಿಕ ದಂಡೆ

ಈ ಬಾರಿ ಕೃಷಿ ಕಾಯಕ ನಡೆಸಬೇಕು ಎಂಬ ಉದ್ದೇಶದಿಂದಲೇ ಕೃಷಿಕರು ತಾವೇ ಸ್ವತಃ ಹಣ ಕ್ರೋಡೀಕರಿಸಿ, ತಾತ್ಕಾಲಿಕ ಹೊಳೆ ದಂಡೆ ನಿರ್ಮಿಸಲು ಮುಂದಾಗಿದ್ದಾರೆ. ಆಡಳಿತ, ಜನಪ್ರತಿನಿಧಿಗಳು ಮಾಡಬೇಕಾದ ಕೆಲಸವನ್ನು ರೈತರೇ ಮಾಡಲು ಮುಂದಾಗಿದ್ದು, ಆಡಳಿತ, ಜನಪ್ರತಿನಿಧಿಗಳನ್ನು ನಗೆಪಾಟಲಿಗೀಡು ಮಾಡಿದೆ.

ಕೃಷಿಕ ದೇಶದ ಬೆನ್ನೆಲುಬು ಎನ್ನುವುದು ಬರೇ ಸ್ಲೋಗನ್ ಆಗಿ ಉಳಿದಿದೆ. ಕೃಷಿಕನ ಬೆನ್ನು ತಟ್ಟಿ ಪ್ರೋತ್ಸಾಹಿಸಬೇಕಾದ ಸರ್ಕಾರ ಹಾಗೂ ಇಲಾಖೆಗಳು ಕೃಷಿಕರನ್ನು ನಿರ್ಲಕ್ಷೃದಿಂದ ನೋಡುವ ಸ್ಥಿತಿ ಇದೆ. ಪೂರ್ವಜರ ಕಾಲದಿಂದಲೂ ಕೃಷಿಯನ್ನೇ ಅವಲಂಬಿತವಾದ ಇಲ್ಲಿನ ಜನರು ಪ್ರಸ್ತುತ ಅಸಹಾಯಕ ಸ್ಥಿತಿಗೆ ತಲುಪುವಂತಾಗಿದೆ. ಇದಕ್ಕೆ ಸರ್ಕಾರದ ಇಚ್ಛಾಶಕ್ತಿ ಕೊರತೆಯೇ ಕಾರಣ. ಶೀಘ್ರ ಶಾಶ್ವತ ಹೊಳೆ ದಂಡೆ ನಿರ್ಮಿಸಿ. ಇಲ್ಲವಾದಲ್ಲಿ ಮುಂದಿನ ದಿನಗಳಲ್ಲಿ ದೊಡ್ಡಮಟ್ಟದ ಹೋರಾಟಕ್ಕೆ ಸಜ್ಜಾಗಲಿದ್ದೇವೆ.

— ಲಕ್ಷ್ಮೀ ಮರಕಾಲ್ತಿ ಕೋಡಿ ಕನ್ಯಾಣ ಸಂತ್ರಸ್ತ ಕೃಷಿಕೆ

ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net