ಸಂದೀಪ 'ಸ್ವರ' ಮಾಧುರ್ಯ...

ಉಡುಪಿ: ಶೀರೂರು ಮಠದ ವೇದವರ್ಧನ ತೀರ್ಥ ಶ್ರೀಪಾದರ ಪ್ರಥಮ ಪರ್ಯಾಯದ ನಿಮಿತ್ತ  ರಾಜಾಂಗಣದಲ್ಲಿ ನಿರಂತರ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಭಾನುವಾರ ರಾತ್ರಿ ಖ್ಯಾತ ಗಾಯಕ ಚೆನ್ನೈನ ಸಂದೀಪ್ ನಾರಾಯಣ್ ಅವರು 'ಕರ್ನಾಟಿಕ್ ವೋಕಲ್ ಕನ್ಸರ್ಟ್' ಸಂಗೀತ ಕಛೇರಿ ನಡೆಸಿದರು.

ಆರಂಭದಲ್ಲಿ 'ಸ್ಮರಣಯೊಂದೇ ಸಾಲದೆ ಗೋವಿಂದನ' ಎಂಬ ಭಕ್ತಿಗೀತೆಯ ಮೂಲಕ ಕೃಷ್ಣನ ಸನ್ನಿಧಿಯಲ್ಲಿ ಪ್ರೇಕ್ಷಕರ ಮನದಲ್ಲಿ ದೈವಭಕ್ತಿ ಜಾಗೃತಗೊಳಿಸಿದರು. ನಂತರ ದ್ವಿಜಾವಂತಿ ರಾಗದಲ್ಲಿ 'ಚೇತಶ್ರೀ ಬಾಲಕೃಷ್ಣಂ ಭಜೇ' ಎಂಬ ಗೀತೆಯ ಮೂಲಕ ಕೃಷ್ಣನ ಬಾಲಲೀಲೆಗಳನ್ನು ಪ್ರಸ್ತುತಪಡಿಸಿದರು. ಸಾವೇರಿ ರಾಗದಲ್ಲಿ ಕೃಷ್ಣನ ಕುರಿತ ತಮಿಳು ಕೃತಿ ಪ್ರಸ್ತುತಪಡಿಸಿದರು. ವಿವಿಧ ರೀತಿಯಲ್ಲಿ ಆರೋಹ-ಅವರೋಹದ ಮೂಲಕ ತಮ್ಮ ಸಂಗೀತ ಪಾಂಡಿತ್ಯ ಪ್ರದರ್ಶಿಸಿ, ಸಂಗೀತ ರಸಿಕರ ಮನ ಗೆದ್ದರು.

 ವಯೋಲಿನ್ ನಲ್ಲಿ ಡಾ. ನಿಶಾಂತ್ ಚಂದ್ರನ್, ಮೃದಂಗದಲ್ಲಿ ತುಮಕೂರು ಬಿ. ರವಿಶಂಕರ್, ಖಂಜಿರಾದಲ್ಲಿ ಗುರು ಪ್ರಸನ್ನ ಬೆಂಗಳೂರು ವಾದ್ಯ ಸಹಕಾರ ನೀಡಿದರು.

ವಿದ್ವಾನ್ ಪ್ರೊ. ಎಂ.ಎಲ್. ಸಾಮಗ ಎಲ್ಲ ಕಲಾವಿದರನ್ನು ಶ್ರೀಕೃಷ್ಣ ಮಠದ ಪರವಾಗಿ ಸ್ವಾಗತಿಸಿ, ಪ್ರೇಕ್ಷಕರಿಗೆ ಪರಿಚಯಿಸಿದರು.

ಸಭಾ ಕಾರ್ಯಕ್ರಮದ ಬಳಿಕ ಪರ್ಯಾಯ ಶೀರೂರು ಮಠದ ವೇದವರ್ಧನ ತೀರ್ಥ ಶ್ರೀಪಾದರು ಎಲ್ಲ ಕಲಾವಿದರಿಗೆ ಅನುಗ್ರಹ ಮಂತ್ರಾಕ್ಷತೆಯೊಂದಿಗೆ ಕೃಷ್ಣನ ಮೂರ್ತಿಯನ್ನು ನೀಡಿ ಗೌರವಿಸಿದರು. ಮಠದ ದಿವಾನ ಡಾ. ಉದಯಕುಮಾರ್ ಸರಳತ್ತಾಯ ಇದ್ದರು.