ಉಡುಪಿ: ಕನ್ನಡ ಭಾಷೆಯಲ್ಲಿ ಗ್ರಂಥ ಸಂಪಾದನೆ, ಸಂಶೋಧನಾ ಕಾರ್ಯವನ್ನು ದಶಕಗಳ ಹಿಂದೆ ತಾತ್ವಿಕ ಶುದ್ಧತೆ, ಬದ್ಧತೆಯಿಂದ ಮಾಡಲಾಗುತ್ತಿತ್ತು. ಹೀಗಾಗಿ ದಾಸಸಾಹಿತ್ಯದ ಜನಪ್ರಿಯ ಪಠ್ಯ ಹಾಗೂ ಅಧ್ಯಯನಯುಕ್ತ ಸಂಶೋಧನಾ ಪಠ್ಯಗಳೆಂಬ ಎರಡು ರೂಪಗಳು ಲಭಿಸುತ್ತಿತ್ತು. ಆದರೀಗ ಈ ಕ್ಷೇತ್ರದಲ್ಲಿ ಆಸಕ್ತಿಯುಳ್ಳವರು ಕಡಿಮೆಯಾಗುತ್ತಿದ್ದು ಅವರಿಗೆ ಉದ್ಯೋಗಾವಕಾಶವೂ ಸರಿಯಾಗಿ ಲಭಿಸುತ್ತಿಲ್ಲ ಎಂದು ಹಿರಿಯ ಸಂಶೋಧಕ ಪ್ರೊ. ಟಿ.ವಿ. ವೆಂಕಟಾಚಲ ಶಾಸ್ತ್ರಿ ವಿಷಾದ ವ್ಯಕ್ತಪಡಿಸಿದರು.

ಉಡುಪಿಯ ರಾಷ್ಟ್ರಕವಿ ಗೋವಿಂದ ಪೈ ಸಂಶೋಧನಾ ಕೇಂದ್ರದ ವತಿಯಿಂದ ಕೊಡಮಾಡುವ ಸೇಡಿಯಾಪು ಕೃಷ್ಣ ಭಟ್ಟ ಸ್ಮರಣಾರ್ಥ ಪ್ರಶಸ್ತಿಯನ್ನು ಮಂಗಳವಾರ (ಜು.28) ಮೈಸೂರಿನಲ್ಲಿ ಡಾ. ಟಿ.ಎನ್​. ನಾಗರತ್ನಾ ಅವರ ಸ್ವಗೃಹದಲ್ಲಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಪ್ರದಾನಿಸಿ ಮಾತನಾಡಿದರು.

ಪ್ರಶಸ್ತಿ ಸ್ವೀಕರಿಸಿದ ಡಾ. ಟಿ.ಎನ್​. ನಾಗರತ್ನಾ ಮಾತನಾಡಿ, ಸೇಡಿಯಾಪು ಪ್ರಶಸ್ತಿಯು ನನ್ನ ಜೀವನದ ಸಂಭ್ರಮಗಳಲ್ಲೊಂದು. ಪ್ರಾತ:ಸ್ಮರಣೀಯರಾದ ಕೃಷ್ಣ ಭಟ್ಟರ ಹೆಸರಲ್ಲಿ ಪಡೆದ ಈ ಪ್ರಶಸ್ತಿ ನನ್ನ ಪುಟ್ಟ ಸಾಧನೆಗೆ ದೊಡ್ಡ ಗರಿ ಇಟ್ಟಂತಾಗಿದೆ. ದೂರದ ಉಡುಪಿಯಿಂದ ಮೈಸೂರಿಗೆ ಬಂದು ಪ್ರಶಸ್ತಿ ನೀಡಿರುವುದು ಮರೆಯಲಾಗದ ಕ್ಷಣ ಎಂದರು.

ಸೇಡಿಯಾಪು ಪ್ರಶಸ್ತಿ ಆಯ್ಕೆ ಸಮಿತಿಯ ಹಿರಿಯ ಸದಸ್ಯ ವಿದ್ವಾನ್​ ಡಾ. ಪಾದೇಕಲ್ಲು ವಿಷ್ಣು ಭಟ್ಟ ಅಭಿನಂದನಾ ಮಾತುಗಳನ್ನಾಡಿದರು. ಮುಳಿಯ ರಾಘವಯ್ಯ, ಪ್ರೊ. ಎಚ್​.ಎಂ. ನಾಗರಾಜ ರಾವ್​ ಇತರರು ಉಪಸ್ಥಿತರಿದ್ದರು.

ರಾಷ್ಟ್ರಕವಿ ಗೋವಿಂದ ಪೈ ಸಂಶೋಧನಾ ಕೇಂದ್ರದ ಆಡಳಿತಾಧಿಕಾರಿ ಡಾ. ಬಿ.ಜಗದೀಶ್​ ಶೆಟ್ಟಿ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ಆರ್​ಆರ್​ಸಿಯ ಸಹ ಸಂಶೋಧಕ ಡಾ. ಅರುಣ್​ ಎಸ್​.ಆರ್​. ಕಾಯಕ್ರಮ ನಿರ್ವಹಿಸಿದರು. ಆರ್​ಆರ್​ಸಿಯ ವಿನೇಶ್​ ಸಹಕರಿಸಿದರು.

"

ಸಂಶೋಧಿತ ಪಠ್ಯ ಹೊರತರುವುದು ಸುಲಭದ ಕಾರ್ಯವಲ್ಲ. ಕರ್ನಾಟಕದಲ್ಲಿ ಪ್ರೊ. ಜಿ. ವರದರಾಜ ರಾಯರು ದಾಸಸಾಹಿತ್ಯದ ಸಂಶೋಧನೆಯಲ್ಲಿ ಮುಂಚೂಣಿಯಲ್ಲಿದ್ದಾರೆ. ಅನಂತರದಲ್ಲಿ ಡಾ. ಟಿ.ಎನ್​. ನಾಗರತ್ನಾ ಅವರು ದಾಸಸಾಹಿತ್ಯದ ಅಧಿಕೃತ ಪಠ್ಯಗಳಿಗೆ ಬುನಾದಿ ಹಾಡಿದರು. ಕನ್ನಡ ಸಾರಸ್ವತ ಲೋಕಕ್ಕೆ ಹಲವಾರು ಮೌಲಿಕ ಕೃತಿ ನೀಡಿದ್ದಾರೆ. ಶ್ರೇಷ್ಠ ಸಂಶೋಧಕಿಗೆ ಸೇಡಿಯಾಪು ಪ್ರಶಸ್ತಿ ಲಭಿಸಿರುವುದು ಕನ್ನಡಿಗರಿಗೆ ಹೆಮ್ಮೆಯ ಸಂಗತಿ.

— ಪ್ರೊ. ಟಿ.ವಿ. ವೆಂಕಟಾಚಲ ಶಾಸ್ತ್ರಿ. ಹಿರಿಯ ಸಂಶೋಧಕ.