ಯುಎಇಯಲ್ಲಿ ಸುಧಾರಿತ ಪಶು ವೈದ್ಯಕೀಯ ಆರೈಕೆ ಮತ್ತು ಶಿಕ್ಷಣಕ್ಕಾಗಿ ಸರ್ಕಾರಿ ಸಂಸ್ಥೆಗಳು ಅಥವಾ ವಿದೇಶಿ ಶಿಕ್ಷಣವನ್ನು ಅವಲಂಬಿಸಬೇಕಾಗಿತ್ತು. ಈಗ 85 ಸಾವಿರ ಚದರ ಅಡಿ ವಿಸ್ತೀರ್ಣದಲ್ಲಿ ನಿರ್ಮಾಣವಾಗುತ್ತಿರುವ ಹೊಸ ತುಂಬೆ ಆಸ್ಪತ್ರೆ ಮತ್ತು ಕಾಲೇಜು ಈ ಕೊರತೆಯನ್ನು ನೀಗಿಸಲಿದೆ. ಸಣ್ಣ ಸಾಕುಪ್ರಾಣಿಗಳಾದ ನಾಯಿ, ಬೆಕ್ಕುಗಳಿಂದ ಹಿಡಿದು ಯುಎಇಯ ಹೆಮ್ಮೆಯ ಸಂಕೇತಗಳಾದ ಕುದುರೆ, ಒಂಟೆ ಹಾಗೂ ಇತರ ಜಾನುವಾರುಗಳಿಗೆ ಒಂದೇ ಸೂರಿನಡಿ ಅತ್ಯಾಧುನಿಕ ಚಿಕಿತ್ಸೆ ನೀಡಲಾಗುತ್ತದೆ. ಈ ಸಂಕೀರ್ಣದಲ್ಲಿ ಅಂತಾರಾಷ್ಟ್ರೀಯ ಮಟ್ಟದ ಶಸ್ತ್ರಚಿಕಿತ್ಸಾ ಕೊಠಡಿಗಳು, ರೋಗನಿರ್ಣಯ ಚಿತ್ರಣ(ಡಯಾಗ್ನಾಸ್ಟಿಕ್ ಇಮೇಜಿಂಗ್), ತೀವ್ರ ನಿಗಾ ಘಟಕ ಮತ್ತು ಪ್ರಯೋಗಾಲಯಗಳು ಇರಲಿವೆ.
