ಕೃಷ್ಣಮಠದಲ್ಲಿ ಪರಿಸರ ಸ್ನೇಹಿ ಬಯೋಗ್ಯಾಸ್​ ಘಟಕ

ಮಧ್ಯಪ್ರಾಚ್ಯ ಯುದ್ಧದಿಂದಾಗಿ ಉದ್ಯಮಿಗಳು ಅಡುಗೆ ಅನಿಲ ಕೊರತೆಯಿಂದ ಬಹಳಷ್ಟು ಸಮಸ್ಯೆ ಎದುರಿಸುತ್ತಿದ್ದಾರೆ. ಈ ಮಧ್ಯೆ ಅನ್ನಬ್ರಹ್ಮನ ಕ್ಷೇತ್ರ ಕೃಷ್ಣ ಮಠ ಭವಿಷ್ಯವನ್ನು ದೃಷ್ಟಿಯಲ್ಲಿಟ್ಟುಕೊಂಡು ಇಂಧನ ಕ್ಷೇತ್ರದಲ್ಲಿ ಸ್ವಾವಲಂಬನೆ ಸಾಧಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯನ್ನಿಟ್ಟಿದೆ.

ಮಠದ ಭೋಜನಶಾಲೆಯ ತ್ಯಾಜ್ಯ ಮತ್ತು ಗೋಶಾಲೆಯ ಸೆಗಣಿಯನ್ನು ಸಮರ್ಪಕವಾಗಿ ಬಳಸಿ ಇಂಧನ ತಯಾರಿಸುವ ನಿಟ್ಟಿನಲ್ಲಿ 60 ಲಕ್ಷ ರೂ. ವೆಚ್ಚದ ಬಯೋಗ್ಯಾಸ್​ (ಜೈವಿಕ ಅನಿಲ) ಘಟಕ ಕಾರ್ಯಾರಂಭಕ್ಕೆ ಸಜ್ಜಾಗಿದೆ. ಹಿಂದಿನ ಪುತ್ತಿಗೆ ಮಠದ ಪರ್ಯಾಯ ಕಾಲದಲ್ಲಿ ಈ ಯೋಜನೆ ಪ್ರಾರಂಭಿಸಲಾಗಿದ್ದು, ಪ್ರಸ್ತುತ ಪರ್ಯಾಯ ಶೀರೂರು ಮಠದ ವತಿಯಿಂದ ನವೀನ ಮಾದರಿ ತಂತ್ರಜ್ಞಾನದೊಂದಿಗೆ ಸುಸಜ್ಜಿತ ಟಕ ನಿರ್ಮಿಸಲಾಗುತ್ತಿದೆ.

ಮಠದ ಗೋಶಾಲೆ ಸಮೀಪ 50 ಕ್ಯೂಬಿಕ್​ ಮೀಟರ್​ ಸಾಮರ್ಥ್ಯ ಟಕವನ್ನು ಸ್ಥಾಪಿಸಲಾಗಿದ್ದು, ಚಿತ್ರದುರ್ಗ ಮೂಲದ ಖಾಸಗಿ ಸಂಸ್ಥೆ ಘಟಕವನ್ನು ಅಳವಡಿಸಿದೆ. ಇದರಿಂದ ನಿತ್ಯ ಉತ್ಪತ್ತಿಯಾಗುವ ಟನ್​ಗಟ್ಟಲೆ ಹಸಿ ತ್ಯಾಜ್ಯಕ್ಕೆ ಮುಕ್ತಿ ಸಿಗಲಿದೆ. ಮಠದ ಗೋಶಾಲೆಯಲ್ಲಿ 80ಕ್ಕೂ ಅಧಿಕ ಗೋವುಗಳಿದ್ದು, ನಿತ್ಯ ಸರಾಸರಿ 750 ಲೀಟರ್​ ಸೆಗಣಿ ದೊರೆಯುತ್ತಿದೆ. ದಿನಕ್ಕೆ ಸರಾಸರಿ 3 ರಿಂದ 5 ಸಾವಿರ ಮಂದಿ ಭೋಜನ ಪ್ರಸಾದ ಸ್ವೀಕರಿಸುತ್ತಿದ್ದು, ಅಡುಗೆ ಮನೆಯಿಂದ ಸುಮಾರು 750 ಕೆಜಿ ಹಸಿ ತ್ಯಾಜ್ಯ ಲಭ್ಯವಾಗುತ್ತಿದೆ. ಇವುಗಳ ಜೊತೆಗೆ ನಿತ್ಯ ಬಳಕೆಯಾಗುವ ಸುಮಾರು 2000 ಬಾಳೆ ಎಲೆ, ಊಟದ ತ್ಯಾಜ್ಯಗಳನ್ನು ಈ ಘಟಕಕ್ಕೆ ಬಳಸಿಕೊಳ್ಳಲಾಗುತ್ತದೆ. ಈ ಪ್ರಕ್ರಿಯೆಯಿಂದ ಪ್ರತಿದಿನ ಸರಾಸರಿ 30 ರಿಂದ 40 ಕೆಜಿ ಜೈವಿಕ ಅನಿಲ ಉತ್ಪಾದನೆಯಾಗಲಿದೆ.

ಈ ಘಟಕವು ಕೇವಲ ಅನಿಲ ನೀಡುವುದು ಮಾತ್ರವಲ್ಲದೆ, ಉಪ ಉತ್ಪನ್ನವಾಗಿ ಗುಣಮಟ್ಟದ ಗೊಬ್ಬರವನ್ನು ನೀಡುತ್ತದೆ. ಘಟಕದಿಂದ ಹೊರಬರುವ ಸಂಸ್ಕರಿತ ದ್ರವ ರೂಪದ ತ್ಯಾಜ್ಯ ಮತ್ತು ಗೊಬ್ಬರವನ್ನು ತೋಟಗಾರಿಕೆಗೆ ಬಳಸಬಹುದು.

ಸುಮಾರು 18 ವರ್ಷಗಳಷ್ಟು ಹಳೆಯದಾದ ಬಾಯ್ಲರ್​ ವ್ಯವಸ್ಥೆ ಬದಲಾಗಿ ಭೋಜನಶಾಲೆಯ ಪಾಕಶಾಲೆಯಲ್ಲಿ 8 ಲಕ್ಷ ರೂ. ವೆಚ್ಚದಲ್ಲಿ ಹೊಸ ಸ್ಟೀಮ್​ ಬಾಯ್ಲರ್​ ಅಳವಡಿಸಲಾಗುತ್ತಿದೆ. ಈ ಹೊಸ ಬಾಯ್ಲರ್​ಗೆ ಬಯೋಗ್ಯಾಸ್​ ಸಂಪರ್ಕ ಕಲ್ಪಿಸಲಾಗುತ್ತಿದ್ದು, ನಿತ್ಯ 30,000 ರಿಂದ 50,000 ಜನರಿಗೆ ಊಟ ಸಿದ್ಧಪಡಿಸಲು ಸಹಕಾರಿಯಾಗಲಿದೆ. ಮಠಕ್ಕೆ ನಿತ್ಯ ಹರಿದುಬರುವ ಸಾವಿರಾರು ಭಕ್ತರಿಗೆ ಅನ್ನದಾಸೋಹ ನಡೆಸಲು ಈ ನೂತನ ತಂತ್ರಜ್ಞಾನವು ಆರ್ಥಿಕವಾಗಿ ಮತ್ತು ಪರಿಸರ ದೃಷ್ಟಿಯಿಂದ ದೊಡ್ಡ ಶಕ್ತಿಯಾಗಿ ಪರಿಣಮಿಸಲಿದೆ.