ಪ್ರಯಾಣಿಕರ ತಂಗುದಾಣಕ್ಕೆ ಗ್ರಹಣ!

ಪ್ರಯಾಣಿಕರಿಗೆ ನೆರಳಾಗಬೇಕಿದ್ದ ಮತ್ತು ಉಪಯೋಗಕ್ಕೆ ಬೀಳಬೇಕಿದ್ದ ಪ್ರಯಾಣಿಕರ ತಂಗುದಾಣಗಳು ನಿರುಪಯುಕ್ತವಾಗಿ ನಿಷ್ಪ್ರಯೋಜಕವಾಗಿದೆ.

ತ್ರಾಸಿ ಗ್ರಾ.ಪಂ. ವ್ಯಾಪ್ತಿಯ ತ್ರಾಸಿ ಬೀಚ್ ಮತ್ತು ಅಣ್ಣಪ್ಪಯ್ಯ ಸಭಾಭವನದ ಬಳಿ ರಾಷ್ಟ್ರೀಯ ಹೆದ್ದಾರಿ 66ರ ಸಮೀಪ ಸಂಸದ ಬಿ.ವೈ.ರಾಘವೇಂದ್ರ ಅವರ ಸಂಸದರ ಸ್ಥಳೀಯ ಪ್ರದೇಶಾಭಿವೃದ್ಧಿ ನಿಧಿಯಿಂದ ಅಂದಾಜು ತಲಾ 3.5 ಲಕ್ಷ ರೂ. ವೆಚ್ಚದಲ್ಲಿ ಕಳೆದ ವರ್ಷ ನಿರ್ಮಾಣಗೊಂಡಿರುವ ಎರಡು ಪ್ರಯಾಣಿಕರ ತಂಗುದಾಣಗಳು ನಿರುಪಯುಕ್ತವಾಗಿದ್ದು, ಪ್ರಯಾಣಿಕರಿಗೆ ಯಾವುದೇ ಉಪಯೋಗಕ್ಕೆ ಇಲ್ಲದಂತಾಗಿದೆ.

ಇನ್ನೊಂದೆಡೆ ಅಣ್ಣಪ್ಪಯ್ಯ ಸಭಾಭವನದ ಬಳಿ ನಿರ್ಮಿಸಿರುವ ಪ್ರಯಾಣಿಕರ ತಂಗುದಾಣ ಇದಕ್ಕೆ ಹೊರತಾಗಿಲ್ಲ. ಲಕ್ಷಾಂತರ ರೂ. ಖರ್ಚು ಮಾಡಿ ನಿರ್ಮಿಸಿರುವ ಈ ತಂಗುದಾಣದ ಪ್ರಯೋಜನ ಪ್ರಯಾಣಿಕರಿಗೆ ದೊರೆಯುತ್ತಿಲ್ಲ. ಸರ್ವಿಸ್ ರಸ್ತೆಗೆ ಹೋಗುವ ಸ್ಥಳದಲ್ಲಿ ಬಸ್ ತಂಗುದಾಣ ನಿರ್ಮಿಸಿದ್ದರೆ, ಬಸ್‌ಗಳು ತಂಗುದಾಣಕ್ಕಿಂತ ಬಹಳ ಹಿಂದೆಯೇ ನಿಂತುಕೊಳ್ಳುತ್ತಿದೆ. ಆದ್ದರಿಂದ ಪ್ರಯಾಣಿಕರು ಬಸ್ ತಂಗುದಾಣವನ್ನು ಆಶ್ರಯಿಸಲು ಮುಂದಾಗುತ್ತಿಲ್ಲ.

ತ್ರಾಸಿ ಬೀಚ್ ಮತ್ತು ಅಣ್ಣಪ್ಪಯ್ಯ ಸಭಾಭವನದ ಬಳಿ ನಿರ್ಮಿಸಿರುವ ಎರಡು ಪ್ರಯಾಣಿಕರ ತಂಗುದಾಣಗಳು ನಾಯಿ ಮತ್ತಿತರ ಪ್ರಾಣಿಗಳ ಮತ್ತು ಮದ್ಯವ್ಯಸನಿಗಳ ವಾಸಸ್ಥಾನವಾಗಿದೆ. ಬಸ್ ಪ್ರಯಾಣಿಕರಿಗೆ ಅನುಕೂಲವಾಗುವ ಸ್ಥಳದಲ್ಲಿ ತಂಗುದಾಣ ನಿರ್ಮಿಸಬೇಕೇ ವಿನಹಃ ಎಲ್ಲೆಲ್ಲೋ ತಂಗುದಾಣ ನಿರ್ಮಿಸಿದರೆ ಏನು ಪ್ರಯೋಜನ. ಲಕ್ಷಾಂತರ ರೂ. ಅನುದಾನ ವ್ಯರ್ಥ ಪೋಲು ಮಾಡಿದಂತಾಗಿದೆ ಎಂದು ಪ್ರಯಾಣಿಕರು ಆಡಳಿತ ವ್ಯವಸ್ಥೆ ಮತ್ತು ಜನಪ್ರತಿನಿಧಿಗಳ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.