ಎನ್​.ಡಿ.ಪಿ.ಎಸ್​. ಕಾಯ್ದೆಯಡಿ ಡ್ರಗ್ಸ್​ ಪೆಡ್ಲರ್​ ಬಂಧನ

ಉಡುಪಿ: ಡ್ರಗ್ಸ್​ ಸಾಗಾಟ, ಮಾರಾಟ ಹಾಗೂ ಸೇವನೆಗೆ ಸಂಬಂಧಿಸಿದಂತೆ ಸರಣಿ ಪ್ರಕರಣ ಎದುರಿಸುತ್ತಿರುವ ಆರೋಪಿ ವಿರುದ್ಧ ಪೊಲೀಸರು ಪಿ.ಐ.ಟಿ. ಎನ್​.ಡಿ.ಪಿ.ಎಸ್​ ಕಾಯ್ದೆಯಡಿ ಕೇಸ್​ ದಾಖಲಿಸಿ ಬಂಧಿಸಿದ್ದಾರೆ.

ಉಡುಪಿ ನಗರ ಪೊಲೀಸ್​ ಠಾಣಾ ವ್ಯಾಪ್ತಿಯ ಕೊಳಂಬೆ ಮಿಷನ್​ ಕಂಪೌಂಡ್​ ನಿವಾಸಿ ಇಕ್ಬಾಲ್​ ಅಲಿಯಾಸ್​ ಇಕ್ಬಾಲ್​ ಶೇಖ್​ (34) ಬಂಧಿತ ಆರೋಪಿ.

ಬಂಧಿತ ಆರೋಪಿ ಇಕ್ಬಾಲ್​ ಶೇಖ್​ ವಿರುದ್ಧ ಉಡುಪಿ ಜಿಲ್ಲೆಯ ವಿವಿಧ ಠಾಣೆಗಳಲ್ಲಿ ಹಲವು ಮಾದಕ ದ್ರವ್ಯ ಪ್ರಕರಣಗಳು ದಾಖಲಾಗಿವೆ. ಮಣಿಪಾಲ ಪೊಲೀಸ್​ ಠಾಣೆಯಲ್ಲಿ ಮಾದಕ ದ್ರವ್ಯ ಸಾಗಾಟ ಮತ್ತು ಮಾರಾಟಕ್ಕೆ ಸಂಬಂಧಿಸಿದಂತೆ 3 ಪ್ರಕರಣ ಹಾಗೂ ಸೇವನೆಗೆ ಸಂಬಂಧಿಸಿ 1 ಪ್ರಕರಣ, ನಗರ ಪೊಲೀಸ್​ ಠಾಣೆಯಲ್ಲಿ ಸಾಗಾಟ ಮತ್ತು ಮಾರಾಟಕ್ಕೆ ಸಂಬಂಧಿಸಿ 2 ಪ್ರಕರಣ ಹಾಗೂ ಸೇವನೆಗೆ ಸಂಬಂಧಿಸಿ 1 ಪ್ರಕರಣ ದಾಖಲಾಗಿದೆ. ಆರೋಪಿಯ ವಿರುದ್ಧ ದಾಖಲಾಗಿರುವ 5 ಸಾಗಾಟ ಮತ್ತು ಮಾರಾಟ ಪ್ರಕರಣಗಳು ಪ್ರಸ್ತುತ ನ್ಯಾಯಾಲಯದ ವಿಚಾರಣೆಯಲ್ಲಿದೆ. 2 ಪ್ರಕರಣಗಳಲ್ಲಿ ಈಗಾಗಲೇ ಶಿಕ್ಷೆಯಾಗಿದೆ.

ಆರೋಪಿ ನಿರಂತರ ಅಕ್ರಮ ಚಟುವಟಿಕೆಗಳಲ್ಲಿ ಭಾಗಿಯಾಗಿರುವ ಹಿನ್ನೆಲೆಯಲ್ಲಿ ಜಿಲ್ಲಾ ಪೊಲೀಸ್​ ಅಧೀಕ್ಷಕರು ನೀಡಿದ ವರದಿ ಆಧರಿಸಿ, ಪಶ್ಚಿಮ ವಲಯದ ಪೊಲೀಸ್​ ಮಹಾನಿರೀಕ್ಷಕರು ಬಂಧನ ಆದೇಶ ಹೊರಡಿಸಿದ್ದರು. ಅದರಂತೆ ಆತನನ್ನು ಪಿ.ಐ.ಟಿ. ಎನ್​.ಡಿ.ಪಿ.ಎಸ್​. ಕಾಯ್ದೆಯಡಿ ಬಂದಿಸಲಾಗಿದ್ದು ಕಲಬುರ್ಗಿ ಕೇಂದ್ರ ಕಾರಾಗೃಹಕ್ಕೆ ರವಾನಿಸಲಾಗಿದೆ.