ಟ್ಯಾಪ್ಮಿ ಸಂಸ್ಥೆಯ ನಿರ್ದೇಶಕರಾಗಿ ಡಾ. ದೇಬಸಿಸ್​ ಪ್ರಧಾನ್​ ನೇಮಕ

ಉಡುಪಿ: ಪ್ರಸಿದ್ಧ ಇನ್​ಸ್ಟಿಟ್ಯೂಟ್​ ಆಫ್​ ಎಮಿನೆನ್ಸ್​ ಡೀಮ್ಡ್​ ವಿಶ್ವವಿದ್ಯಾಲಯವಾದ ಮಾಹೆ  ಸಂಸ್ಥೆಯ ಅಂಗ ಸಂಸ್ಥೆಯಾಗಿರುವ ಟಿ.ಎ. ಪೈ ಮೆನೇಜ್ಮೆಂಟ್​ ಇನ್​ಸ್ಟಿಟ್ಯೂಟ್​ (ಟ್ಯಾಪ್ಮಿ)ನ ನೂತನ ನಿರ್ದೇಶಕರಾಗಿ ಡಾ. ದೇಬಸಿಸ್​ ಪ್ರಧಾನ್​ ನೇಮಕಗೊಂಡಿದ್ದಾರೆ. 

ನೂತನ ನಿರ್ದೇಶಕ ಡಾ. ಪ್ರಧಾನ್​ ಅವರು ಶೈಕ್ಷಣಿಕ ಕ್ಷೇತ್ರದಲ್ಲಿ ಅದ್ಭುತ ಹಿನ್ನೆಲೆ ಹೊಂದಿದ್ದು, ಜಮ್​ಶೆಡ್​ಪುರದ ಪ್ರತಿಷ್ಠಿತ ಎಕ್ಸ್​ಎಲ್​ಆರ್​ಐ ಸಂಸ್ಥೆಯಲ್ಲಿ 20ಕ್ಕೂ ಹೆಚ್ಚು ವರ್ಷ ಮಾರ್ಕೆಟಿಂಗ್​ ವಿಭಾಗದ ಪೂರ್ಣಾವಧಿ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸಿದ್ದಾರೆ. ಅಲ್ಲದೆ, ಅಲ್ಲಿನ ಅಸೋಸಿಯೇಟ್​ ಡೀನ್​ (ಎಕ್ಸಿಕ್ಯೂಟಿವ್​ ಎಜುಕೇಶನ್​) ಹಾಗೂ ಮಾರ್ಕೆಟಿಂಗ್​ ವಿಭಾಗದ ಮುಖ್ಯಸ್ಥರಾಗಿಯೂ ವಿವಿಧ ಜವಾಬ್ದಾರಿಯುತ ಹುದ್ದೆ ನಿಭಾಯಿಸಿದ ಅನುಭವ ಹೊಂದಿದ್ದಾರೆ.

ಶೈಕ್ಷಣಿಕ ಉತ್ಕಷ್ಟತೆ, ಜಾಗತಿಕ ಮಟ್ಟದಲ್ಲಿ ಸಂಸ್ಥೆಯ ಘನತೆ ಹೆಚ್ಚಿಸುವುದು, ಮುಂಚೂಣಿ ಸಂಶೋಧನೆ ಹಾಗೂ ಪ್ರಸ್ತುತ ಉದ್ಯಮ ರಂಗಕ್ಕೆ ಪೂರಕವಾಗಿ ಮೆನೇಜ್ಮೆಂಟ್​ ಶಿಕ್ಷಣ ಒದಗಿಸುವ ಸಂಸ್ಥೆಯ ನಿರಂತರ ಬದ್ಧತೆಗೆ ಪೂರಕವಾಗಿ ಈ ನೇಮಕಾತಿ ಮಾಡಲಾಗಿದೆ ಎಂದು ಸಂಸ್ಥೆ ಪ್ರಕಟಣೆಯಲ್ಲಿ ತಿಳಿಸಿದೆ.

ಶೈಕ್ಷಣಿಕ ಕ್ಷೇತ್ರಕ್ಕೆ ನೀಡಿರುವ ಕೊಡುಗೆಗಳಲ್ಲದೆ, ಡಾ. ಪ್ರಧಾನ್​ ಅವರು ಪ್ರಸ್ತುತ ಸೇಜ್​ ಪಬ್ಲಿಕೇಷನ್ಸ್​ ಪ್ರಕಟಿಸುವ ಮೆನೇಜ್ಮೆಂಟ್​ ಕ್ಷೇತ್ರದ ಪ್ರಮುಖ ನಿಯತಕಾಲಿಕೆಯಾದ ಮೆನೇಜ್ಮೆಂಟ್​ ಆ್ಯಂಡ್​ ಲೇಬರ್​ ಸ್ಟಡಿಸ್​ ಜರ್ನಲ್​ನ ಪ್ರಧಾನ ಸಂಪಾದಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಇದರೊಂದಿಗೆ ಸ್ಪ್ರಿಂಗರ್​ ನೇಚರ್​ ಪ್ರಕಟಿಸುವ ಹ್ಯುಮಾನಿಟೀಸ್​ ಆ್ಯಂಡ್​ ಸೋಶಿಯಲ್​ ಸೈನ್ಸಸ್​ ಕಮ್ಯುನಿಕೇಷನ್ಸ್​ ಜರ್ನಲ್​ನ ಪ್ರಾದೇಶಿಕ ಸಂಪಾದಕರಾಗಿಯೂ ಸೇವೆ ಸಲ್ಲಿಸುತ್ತಿದ್ದಾರೆ.

ಗ್ರಾಹಕರ ಯೋಗಕ್ಷೇಮ ಮತ್ತು ತಂತ್ರಜ್ಞಾನ, ಗ್ರಾಹಕರು-ಬ್ರ್ಯಾಂಡ್‌ ಗಳು ಮತ್ತು ಯಂತ್ರಗಳ ನಡುವಿನ ಪರಸ್ಪರ ಸಂವಹನ, ಇನ್‌ ಫ್ಲುಯೆನ್ಸರ್ ಮಾರ್ಕೆಟಿಂಗ್, ಬ್ರ್ಯಾಂಡ್ ಆಕ್ಟಿವಿಸಂ ಹಾಗೂ ಗ್ರಾಹಕರೊಂದಿಗಿನ ಒಡನಾಟ ಇವರ ಪ್ರಮುಖ ಸಂಶೋಧನಾ ಕ್ಷೇತ್ರಗಳಾಗಿವೆ. ಪ್ರಸ್ತುತ ಹಲವು ಪಿಎಚ್‌ಡಿ ಸಂಶೋಧನಾ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ನೀಡುತ್ತಿದ್ದಾರೆ.