ಪಾಳುಬಿದ್ದ ಅಂಗಡಿ, ಶೌಚಗೃಹ

ಮರವಂತೆ ವರಾಹ ಸ್ವಾಮಿ ದೇವಸ್ಥಾನದ ಸಮೀಪ ಸೌಪರ್ಣಿಕಾ ನದಿ ತೀರದಲ್ಲಿ ರಾಷ್ಟ್ರೀಯ ಹೆದ್ದಾರಿ 66ರ ಅಂಚಿನಲ್ಲಿ ಪ್ರವಾಸೋದ್ಯಮ ಇಲಾಖೆ ವತಿಯಿಂದ ನಿರ್ಮಿಸಲಾಗಿದ್ದ ಸುಸಜ್ಜಿತ ಶೌಚಗೃಹ, ಅಂಗಡಿ ಕೋಣೆಗಳು ಉಪಯೋಗಿಕ್ಕಿಲ್ಲದೆ ಪಾಳುಬಿದ್ದಿದೆ.

ಕೋಸ್ಟಲ್ ಸರ್ಕ್ಯೂಟ್ ಯೋಜನೆಯಡಿ ಮರವಂತೆ ಮಹಾರಾಜ ಸ್ವಾಮಿ ಶ್ರೀ ವರಾಹ ದೇವಸ್ಥಾನದ ಸಮೀಪ ಬೀಚ್ ಎದುರುಗಡೆ ಪ್ರವಾಸಿಗರ ಹಾಗೂ ಸಾರ್ವಜನಿಕರ ಅನುಕೂಲಕ್ಕಾಗಿ ಸುಸಜ್ಜಿತ ಶೌಚಗೃಹ ಹಾಗೂ 10 ಅಂಗಡಿ ಕೋಣೆಗಳನ್ನು ನಿರ್ಮಿಸಲಾಗಿತ್ತು. ಶೌಚಗೃಹ ಹಾಗೂ ಅಂಗಡಿ ಕೋಣೆಗಳು ನಿರ್ಮಾಣಗೊಂಡು ದಶಕಗಳೇ ಕಳೆದಿದ್ದರೂ ಸಾರ್ವಜನಿಕರ ಉಪಯೋಗಕ್ಕೆ ಲಭ್ಯವಾಗಿಲ್ಲ.

ಶೌಚಗೃಹ ಪಕ್ಕದಲ್ಲಿ ನಿರ್ಮಿಸಲಾಗಿರುವ 10 ಅಂಗಡಿ ಕೋಣೆಗಳು ನಿರುಪಯುಕ್ತವಾಗಿದ್ದು, ಅಂಗಡಿಗಳಿಗೆ ಹಾಕಿದ ಬೀಗಗಳು ತುಕ್ಕು ಹಿಡಿದಿವೆ. ಬಾಗಿಲುಗಳು ಒಡೆದಿದ್ದು, ಅಂಗಡಿ ಒಳಗೆ ನಗತ್ಯ ವಸ್ತುಗಳು ರಾಶಿ ಬಿದ್ದಿವೆ. ಈ ಅಂಗಡಿ ಸಂಕೀರ್ಣಗಳು ಕೆಲವೇ ದಿನಗಳಲ್ಲಿ ಧರಾಶಾಯಿಯಾಗುವ ಸ್ಥಿತಿಯಲ್ಲಿವೆ. ಎದುರಿನ ಲೈಟಿಂಗ್ ಕಂಬಗಳು ತುಕ್ಕು ಹಿಡಿದಿದ್ದರೆ, ಕಲ್ಲಿನ ಬೆಂಚುಗಳು ಸುತ್ತಲೂ ಗಿಡಗಂಟಿಗಳು ಬೆಳೆದು ನಿಂತಿದ್ದು, ಬೆಂಚುಗಳು ಕುಳಿತುಕೊಳ್ಳಲು ಆಗದಷ್ಟು ಗಲೀಜಾವೆೆ. ಲಕ್ಷಾಂತರ ರೂ. ವೆಚ್ಚದಲ್ಲಿ ನಿರ್ಮಿಸಿದ ವ್ಯವಸ್ಥೆ ಸಾರ್ವಜನಿಕರಿಗೆ ಹಾಗೂ ಪ್ರವಾಸಿಗರ ಉಪಯೋಗಕ್ಕೆ ಬಾರದ ಸ್ಥಿತಿ ನಿರ್ಮಾಣಗೊಂಡಿದೆ.

ಸಾರ್ವಜನಿಕರ ಮತ್ತು ಪ್ರವಾಸಿಗರ ಅನುಕೂಲಕ್ಕೆ ಮರವಂತೆಯಲ್ಲಿ ನಿರ್ಮಿಸಿದ ಗೂಡಂಗಡಿ ಹಾಗೂ ಶೌಚಗೃಹ ಸಂಕೀರ್ಣ ದಶಕ ಸಂದರೂ ಉಪಯೋಗಕ್ಕೆ ಬೀಳದೆ ಇರುವುದು ಮತ್ತು ಸೊತ್ತುಗಳು ನಾಶವಾಗುತ್ತಿರುವುದಕ್ಕೆ ಸ್ಥಳೀಯರು ಅಸಮಾಧಾನ ವ್ಯಕ್ತಪಡಿಸಿದ್ದು, ಆದಷ್ಟು ಶೀಘ್ರ ವ್ಯವಸ್ಥೆ ಸರಿಪಡಿಸಿ ಜನರ ಉಪಯೋಗಕ್ಕೆ ದೊರೆಯುವಂತೆ ಮಾಡಬೇಕು ಎಂದು ಆಗ್ರಹಿಸಿದ್ದಾರೆ.