ಹಂದಿಗಳ ಸಾವಿಗೆ ಎಚ್ಚೆತ್ತ ಇಲಾಖೆ

ಕುಂದಾಪುರ ತಾಲೂಕಿನ ಕಾಡಂಚಿನ ಪ್ರದೇಶಗಳಲ್ಲಿ ಮೇ ತಿಂಗಳಿಂದ ಅನುವಾನಸ್ಪದವಾಗಿ ಕಾಡು ಹಂದಿಗಳು ಮೃತಪಡುತ್ತಿರುವ ಬಗ್ಗೆ ಕೊನೆಗೂ ಅಧಿಕಾರಿಗಳು ಎಚ್ಚೆತ್ತುಕೊಂಡಿದ್ದಾರೆ.

ಕಾಡು ಹಂದಿಗಳ ಸಾಮೂಹಿಕ ಸಾವಿನ ಬಗ್ಗೆ ಮೇ ತಿಂಗಳಲ್ಲಿ ಸುದ್ದಿಯಾಗಿತ್ತು. ಆದರೆ ಇಲಾಖೆ ಅದನ್ನು ಗಂಭೀರವಾಗಿ ತಗೆದುಕೊಂಡಿರಲಿಲ್ಲ. ಕೃಷಿಕರು ಬೆಳೆ ರಕ್ಷಣೆಗೆ ಇಟ್ಟ ಉರುಳುಗಳಿಗೆ ಸಿಲುಕಿ ಸತ್ತಿರಬಹುದು ಅಥವಾ ವಿಷ ಪದಾರ್ಥ ತಿಂದು ಸತ್ತಿರಬಹುದು ಎಂದೇ ಭಾವಿಸಲಾಗಿತ್ತು. ಆದರೆ ಜೂನ್‌ನಲ್ಲಿ ಕಾಡು ಹಂದಿಗಳ ಸಾವಿನ ಸುದ್ದಿ ವ್ಯಾಪಕವಾಗಿ ಹರಡತೊಡಗಿದ ಬಳಿಕ ಇಲಾಖೆಗಳು ಜಾಗೃತವಾಗಿ ಜನರಿಗೆ ಎಚ್ಚರಿಕೆ ಸೂಚನೆಗಳನ್ನು ನೀಡುತ್ತಿದ್ದಾರೆ.

ಕಾಡು ಹಂದಿಗಳ ಸಾವಿನ ಬಗ್ಗೆ ಇನ್ನೂ ಖಚಿತ ಕಾರಣ ತಿಳಿದಿಲ್ಲ. ಕಾಡು ಹಂದಿಗಳು ಸತ್ತಿರುವುದು ಕಂಡು ಬಂದರೆ ತಕ್ಷಣ ತಿಳಿಸುವಂತೆ ಗ್ರಾಮಸ್ಥರಿಗೆ ಮನವಿ ಮಾಡಲಾಗಿದೆ. ಜತೆಗೆ ಸಾಂಕ್ರಾಮಿಕ ರೋಗದಿಂದ ಸಾವು ಸಂಭವಿಸಬಹುದಾದ ಸಾಧ್ಯತೆಯಿದ್ದು, ಸೋಂಕು ಮನುಷ್ಯರಿಗೂ ಹರಡುವ ಸಾಧ್ಯತೆ ಇದೆ. ಹೀಗಾಗಿ ಕಾಡಿಗೆ ಹೋಗುವ ಕಾರ್ಮಿಕರು, ರೈತರು ಎಚ್ಚರ ವಹಿಸುವಂತೆ ಹಾಗೂ ಸ್ವಚ್ಛತೆ ಕಾಪಾಡುವಂತೆ ಸೂಚನೆ ನೀಡಲಾಗಿದೆ.

ನಾಡ, ಹಕ್ಲಾಡಿ, ವಂಡ್ರೆ, ಚಿತ್ತೂರು, ಕೆರಾಡಿ, ಆಜ್ರಿ, ಆಲೂರು, ಹೊಸೂರು ಹೀಗೆ ಬಹುತೇಕ ಕಾಡಂಚಿನ ಪ್ರದೇಶಗಳಲ್ಲಿ ಕಾಡು ಹಂದಿಗಳು ಅಲ್ಲಲ್ಲಿ ಬಿದ್ದು ಸಾಯುತ್ತಿವೆ. ನಾಡ ಗ್ರಾಮದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಕಾಡು ಹಂದಿಗಳು ಸತ್ತಿವೆ ಎನ್ನಲಾಗುತ್ತಿದೆ. ಕಾಡು ಹಂದಿಗಳು ಹೆಚ್ಚು ರೋಗನಿರೋಧಕ ಶಕ್ತಿ ಉಳ್ಳ ಗಟ್ಟಿಯಾದ ದೇಹ ರಚನೆ ಹೊಂದಿರುತ್ತವೆ. ಆದರೆ ಅವುಗಳು ದಿಢೀರ್ ಕೆಲವೆಡೆ ಸಂಶಯಾಸ್ಪದವಾಗಿ ಸಾವಿಗೀಡಾಗುತ್ತಿರುವುದು ಜನಸಾಮಾನ್ಯರ ಆತಂಕಕ್ಕೆ ಕಾರಣವಾಗಿದೆ.

ಕಾಡು ಹಂದಿಗಳ ಮೃತದೇಹ ಕಂಡುಬಂದರೆ ವಾಹಿತಿ ಕೊಡಿ. ಕಾಡುಹಂದಿ, ಇತರ ಕಾಡು ಪ್ರಾಣಿಗಳ ಮೃತದೇಹಗಳು ಕಂಡು ಬಂದರೆ ಕೂಡಲೇ ಸ್ಥಳೀಯ ಗ್ರಾಮ ಪಂಚಾಯಿತಿ, ಪಶು ವೈದ್ಯರು, ಅರಣ್ಯ ಇಲಾಖೆ, ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಮಾಹಿತಿ ನೀಡುವಂತೆ ತಿಳಿಸಲಾಗಿದೆ. ಸಾರ್ವಜನಿಕರು ನೀಡುವ ಮಾಹಿತಿಯಿಂದ ಮೃತದೇಹಗಳನ್ನು ಪರೀಕ್ಷೆಗೆ ಕೇಂದ್ರಕ್ಕೆ ಕಳುಹಿಸಲು ಸಹಕಾರಿಯಾಗುತ್ತದೆ. ಸಾವಿಗೆ ನಿಖರ ಕಾರಣ ಕಂಡುಹಿಡಿಯಲು ಸಾಧ್ಯವಾಗುತ್ತದೆ.

— ಡಾ.ಅರುಣ್ ಕುಮಾರ್ ಕುಂದಾಪುರ ಪಶು ಇಲಾಖೆ ಸಹಾಯಕ ನಿರ್ದೇಶಕ