ಮೀನುಗಾರಿಕಾ ರಸ್ತೆ ಅಭಿವೃದ್ಧಿಗೆ ಅನುದಾನಕ್ಕೆ ಒತ್ತಾಯ

ಪ್ರವಾಸೋದ್ಯಮ ಬೆಳವಣಿಗೆ ದೃಷ್ಟಿಯಿಂದ ಮೀನುಗಾರಿಕಾ ರಸ್ತೆಗಳ ಅಭಿವೃದ್ಧಿಗೆ ಅನುದಾನ ನೀಡುವಂತೆ ರಾಜ್ಯ ಸರ್ಕಾರವನ್ನು ಒತ್ತಾಯಿಸಿದ್ದೇನೆ. ಸಾಗರಮಾಲಾ ಯೋಜನೆ ಮೂಲಕವೂ ಕೇಂದ್ರ ಸರ್ಕಾರದ ಅನುದಾನ ದೊರಕಿಸಿಕೊಳ್ಳಲು ಪ್ರಯತ್ನಿಸಲಾಗುವುದು ಎಂದು ಶಾಸಕ ಗುರ್ಮೆ ಸುರೇಶ್ ಶೆಟ್ಟಿ ಹೇಳಿದರು.

ಹೆಜಮಾಡಿ ಶ್ರೀ ನಾರಾಯಣ ಗುರು ರಸ್ತೆ ಅಭಿವೃದ್ಧಿಗೆ ಗುರುವಾರ ಗುದ್ದಲಿಪೂಜೆ ನೆರವೇರಿಸಿ ಮಾತನಾಡಿದರು. ನಾರಯಣ ಗುರು ರಸ್ತೆಯನ್ನು 50 ಲಕ್ಷ ರೂ. ವೆಚ್ಚದಲ್ಲಿ 350 ಮೀಟರ್ ವ್ಯಾಪ್ತಿಗೆ ಅಭಿವೃದ್ಧಿಪಡಿಸಲಾಗುವುದು. ಮಿಕ್ಕುಳಿದ 70 ಮೀಟರ್ ರಸ್ತೆಯನ್ನು ಸಾರ್ವಜನಿಕರ ಒತ್ತಾಸೆಗಳಿಗಾಗಿ ಮುಂಗಡ ಕಾಮಗಾರಿಯಾಗಿ ಪೂರ್ಣಗೊಳಿಸುವಂತೆ ಗುತ್ತಿಗೆದಾರರಿಗೆ ಸೂಚಿಸಲಾಗಿದೆ.

ಹೆಜಮಾಡಿ ಕ್ರೀಡಾಂಗಣವನ್ನು ಬಳಸಿಕೊಳ್ಳಲು ಈಗಿರುವ 5,900 ರೂ. ದಿನವಹಿ ಪಾವತಿಯನ್ನು ಸ್ಥಳೀಯರಿಗಾಗಿ ಸಡಿಲಿಸುವಂತೆ ಶಾಸಕರ ಗಮನ ಸೆಳೆದಾಗ, ಈ ಕುರಿತಾಗಿ ಕ್ರೀಡಾ ಸಚಿವರಲ್ಲಿ ಚರ್ಚಿಸುವುದಾಗಿ ತಿಳಿಸಿದರು. ಬಹು ನಿರೀಕ್ಷೆಯ ಹೆಜಮಾಡಿ ಸರ್ವಋತು ಬಂದರು ಮುಂದಿನ ಜನವರಿ ವೇಳೆಗೆ ಲೋಕಾರ್ಪಣೆಗೊಳ್ಳಲಿರುವುದಾಗಿ ಶಾಸಕರು ಪುನರುಚ್ಚರಿಸಿದರು.