ಶಿರಿಯ ಹೊಳೆಗೆ ಸೇತುವೆ ಬೇಡಿಕೆ

ಪೂವನುಡ್ಕದಲ್ಲಿರುವ ಶಿರಿಯ ಹೊಳೆಗೆ ಅಣೆಕಟ್ಟು ಮತ್ತು ಸೇತುವೆ ನಿರ್ಮಿಸಬೇಕೆಂಬ ದಶಕಗಳ ಬೇಡಿಕೆ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ. ಶಿರಿಯ ಹೊಳೆಗೆ ಪೂವನುಡ್ಕದಲ್ಲಿರುವ ಕರ್ನಾಟಕದ ಭಾಗವಾದ ವಾಣಿಲದೊಂದಿಗೆ ಸಂಪರ್ಕ ಬೆಸೆಯಲು ಹಾಗೂ ಹೊಳೆಯ ಎರಡೂ ಬದಿಗಳ ಕೃಷಿ ಉದ್ದೇಶಕ್ಕಗಿ ನೀರು ಸಂಗ್ರಹಿಸಲು ಸೇತುವೆ ಹಾಗೂ ಅಣೆಕಟ್ಟು ನಿರ್ಮಿಸಬೇಕೆಂದು ಸ್ಥಳೀಯ ಕೃಷಿಕರು ಒತ್ತಾಯಿಸಿದ್ದಾರೆ.

ಪೂವನಡ್ಕದಲ್ಲಿ ಪೆರ್ಲ-ಪೂವನುಡ್ಕ ಸಂಪರ್ಕ ರಸ್ತೆ ಇದ್ದು, ಈ ಭಾಗದಲ್ಲಿ ಕೃಷಿ ಉತ್ಪನ್ನಗಳ ಸಾಗಿಸಲು ಹಾಗೂ ತುರ್ತು ಸಂದರ್ಭ ಉಪ್ಪಳ, ವಿಟ್ಲ, ಮಂಗಳೂರಿಗೆ ಕಡಿಮೆ ಸಮಯದಲ್ಲಿ ಸಂಚರಿಸಲು ಸಾಧ್ಯವಿದೆ. ಕೃಷಿಗೆ ನೀರಾವರಿ ವ್ಯವಸ್ಥೆ, ಸ್ಥಳೀಯ ನಿವಾಸಿಗಳ ಕೆರೆ, ಬಾವಿಗಳಲ್ಲಿ ನೀರಿನ ಒರತೆ ಹೆಚ್ಚಳಕ್ಕೆ ಅಣೆಕಟ್ಟು ಸಹಕಾರಿಯಾಗಲಿದ್ದು, ಈ ನಿಟ್ಟಿನಲ್ಲಿ ಸೇತುವೆ ಹಾಗೂ ಅಣೆಕಟ್ಟು ನಿರ್ಮಾಣ ಶೀಘ್ರವೇ ನಡೆಯಬೇಕಿದೆ. ಎರಡೂ ಕಾಮಗಾರಿಗಳಿಂದ ಪೂವನುಡ್ಕ, ಪೆರ್ತಾಜೆ, ಸೇರಾಜೆ, ಸೋವಾಜೆ ಮತ್ತು ಬೆಂಗಪದವಿನ ಸ್ಥಳೀಯ ರೈತರಿಗೂ ಸಹಕಾರಿಯಾಗಲಿದೆ.

ಶಿರಿಯ ಹೊಳೆ ಸಾಗುವ ಗಡಿ ಗ್ರಾಮಗಳಲ್ಲಿ ಅಂತಾರಾಜ್ಯ ಸಂಪರ್ಕ ಸಮಸ್ಯೆ ದಶಕಗಳಿಂದಲೂ ಇದ್ದು, ಎಣ್ಮಕಜೆ ಪಂಚಾಯಿತಿಯ ಬಾಕಿಲಪದವು ಪ್ರಹ್ಲಾದಪುರದಲ್ಲೂ ಶಿರಿಯ ಹೊಳೆಗೆ ಸೇತುವೆ ನಿರ್ಮಿಸಬೇಕೆಂಬ ಬೇಡಿಕೆ ಇನ್ನೂ ಈಡೇರಿಲ್ಲ. ಇಲ್ಲಿ ಸೇತುವೆ ನಿರ್ಮಾಣವಾದರೆ ಕರ್ನಾಟಕದ ಅಡ್ಯನಡ್ಕ, ವಿಟ್ಲ ಸಹಿತ ಹಲವೆಡೆಗೆ ನೇರ ಪ್ರಯಾಣ ಸಾಧ್ಯವಾಗಲಿದೆ. ಕಳೆದ ಕೆಲವು ವರ್ಷಗಳಿಂದ ಯೋಜನೆ ರೂಪಿಸುತ್ತಿದ್ದರೂ ತಾಂತ್ರಿಕ, ಸಾವಾಜಿಕ ಕಾರಣಗಳಿಂದ ನನೆಗುದಿಗೆ ಬೀಳುತ್ತಲೇ ಇದೆ.