ಕೃಷಿ ಪ್ರದೇಶಕ್ಕೆ ಡಿಸಿ ಸ್ವರೂಪಾ ಟಿ.ಕೆ. ಭೇಟಿ

ಈ ವರ್ಷದ ಮುಂಗಾರು ಕೈಕೊಟ್ಟಿದ್ದು, ಪ್ರಸ್ತುತ ಭತ್ತದ ಬೆಳೆ ಶೋಚನೀಯ ಸ್ಥಿತಿಗೆ ತಲುಪಿ ಬರಗಾಲದ ಛಾಯೆ ಎದುರಾಗಿದೆ. ರಾಜ್ಯ ಸರ್ಕಾರದ ಆದೇಶ ಹಿನ್ನೆಲೆಯಲ್ಲಿ ಉಡುಪಿ ಜಿಲ್ಲಾಧಿಕಾರಿ ಸ್ವರೂಪಾ ಟಿ.ಕೆ. ಕೋಟದ ಮಣೂರು ನಡುಬೆಟ್ಟು ಕೃಷಿ ಪ್ರದೇಶಕ್ಕೆ ಭೇಟಿ ನೀಡಿ ಬೆಳೆ ವೀಕ್ಷಿಸಿ ರೈತರೊಂದಿಗೆ ಸಂವಾದ ನಡೆಸಿದರು.

ಈ ಬಾರಿಯ ಮಳೆ ರೈತರನ್ನು ಕಂಗೆಡಿಸಿದ ಬಗ್ಗೆ ರೈತರು ಡಿಸಿಗೆ ಮಾಹಿತಿ ನೀಡಿ, ಪೂರ್ಣ ಪ್ರಮಾಣದ ಬೆಳೆ ನಿರೀಕ್ಷಿಸಲು ಸಾಧ್ಯವಿಲ್ಲ ಎಂದು ರೈತ ಮುಖಂಡ ಭಾಸ್ಕರ ಶೆಟ್ಟಿ ಮನವರಿಕೆ ಮಾಡಿದರು.

ಮಣೂರು ಸೇರಿದಂತೆ ಉಪ್ಪು ನೀರಿನ ಹೊಳೆಯ ಎಲ್ಲ ಭಾಗದಲ್ಲೂ ಕಾಂಡ್ಲ ವನ ಆವರಿಸಿದ್ದು, ಈ ಪ್ರದೇಶಗಳಲ್ಲಿ ನೀರು ಸರಾಗವಾಗಿ ಹರಿಯದೆ ಕೃತಕ ನೆರೆ ತುತ್ತಾಗುತ್ತಿರುವ ಬಗ್ಗೆ ಅಹವಾಲು ಸಲ್ಲಿಸಲಾಯಿತು. ಕೋಟ ಮಣೂರು ಪಡುಕರೆ ಹೊಳೆಯ ಭಾಗಕ್ಕೆ ಭೇಟಿ ನೀಡಿ ಕಾಂಡ್ಲವನವನ್ನು ಡಿಸಿ ಪರಿಶೀಲಿಸಿದರು.

ಬ್ರಹ್ಮಾವರ ತಹಸೀಲ್ದಾರ್ ಶ್ರೀಕಾಂತ್ ಎಸ್.ಹೆಗ್ಡೆ, ಕೋಟ ಕಂದಾಯ ಅಧಿಕಾರಿ ಮಂಜು ಬಿಲ್ಲವ, ಗ್ರಾಮ ಲೆಕ್ಕಿಗ ರಾಘವೇಂದ್ರ, ಕೋಟ ಪಿಡಿಒ ಉಮೇಶ್, ಜಂಟಿ ಕೃಷಿ ನಿರ್ದೇಶಕಿ ಪೂರ್ಣಿಮಾ, ಕೃಷಿ ಇಲಾಖೆ ಉಪ ನಿರ್ದೇಶಕ ಚಂದ್ರಶೇಖರ ನಾಯ್ಕ, ಸಹಾಯಕ ಕೃಷಿ ನಿರ್ದೇಶಕಿ ಮಮತಾ, ಕೃಷಿ ಅಧಿಕಾರಿ ಸುರೇಶ್ ಬಂಗೇರ ಮತ್ತಿತರರಿದ್ದರು.

ಅಂಬಾಲಕೆರೆ ಕಳಪೆ ಕಾಮಗಾರಿಯಿಂದ ಕುಸಿತಗೊಂಡ ಹಿನ್ನೆಲೆಯಲ್ಲಿ ಸ್ಥಳಕ್ಕೆ ಮಂಗಳವಾರ ಭೇಟಿ ನೀಡಿ ಪರಿಶೀಲಿಸಿದ ಜಿಲ್ಲಾಧಿಕಾರಿ ಸ್ವರೂಪಾ ಟಿ.ಕೆ., ಸ್ಥಳದಲ್ಲಿದ್ದ ಕೆಆರ್‌ಐಡಿಎಲ್ ಇಂಜಿನಿಯರ್ ಯೋಗೀಶ್ ಅವರನ್ನು ತರಾಟೆಗೆ ತೆಗೆದುಕೊಂಡರು. ಕಾಮಗಾರಿ ಪ್ರಾರಂಭದಿಂದಲೂ ಲೋಪವಾಗಿದೆ ಎಂಬ ಮಾಹಿತಿ ನೀಡಿದರೂ ಸಂಬಂಧಿಸಿದ ಇಲಾಖೆ ನಿರ್ಲಕ್ಷಿಸಿದೆ. ಇದರಿಂದ ಈ ಸಮಸ್ಯೆ ಸೃಷ್ಟಿಯಾಗಿದೆ ಎಂದು ಗುತ್ತಿಗೆದಾರ ಮತ್ತು ಇಂಜಿನಿಯರ್‌ಗಳ ಮೇಲೆ ಸ್ಥಳೀಯರು ಡಿಸಿ ಸಮ್ಮುಖದಲ್ಲಿ ಬೇಸರ ಹೊರಹಾಕಿದರು.